އިންޑިއާއަށް ދަތުރު ކުރާ އެހެން ގައުމުތަކުން މީހުންގެ ސެލްފް ޑެކްލެރޭޝަން ފޯމް، އެއާ ސުވިދާ، ފުރަން ނުޖެހޭ ގޮތަށް ހަދައިފި އެވެ.
އެއާ ސުވިދާ ފޯމު ތައާރަފު ކުރީ ކޮވިޑް ބަލިމަޑުކަމާ ގުޅިގެން ޕަސެންޖަރުން ސްކްރީން ކުރުމަށެވެ. އެ ފޯމު ބޭނުން ކުރުން ހުއްޓާލައި، ކޮވިޑަށް ނެގެޓިވް ޕީސީއާރް ޓެސްޓުގެ ނަތީޖާ ވެސް ދެން ހުށަހަޅަން ނުޖެހޭނެ އެވެ.
ހޯމަ ދުވަހުން ފެށިގެން އެ ބަދަލުތައް ގެނައި އިންޑިއާގެ ހެލްތު މިނިސްޓްރީގެ އާ ގައިޑްލައިނާ އެއް ގޮތްވާ ގޮތުގެ މަތިންނެވެ.
"ހުރިހާ ދަތުރުވެރިން ވެސް، އެ މީހަކު ނިސްބަތްވާ ގައުމެއްގައި ފާސްކޮށްފައިވާ ކޮވިޑް ވެކްސިންގެ ޝެޑިއުލާ އެއް ގޮތަށް ފުރިހަމައަށް ވެކްސިން ޖަހާފައިވުން ވަރަށް ބޮޑަށް އެދެވިގެންވޭ،" އެ ގައިޑްލައިންގައި ބުނެފައިވެ އެވެ.
ޕަސެންޖަރުންނަށް ލުއިތަކެއް ލިބުނު ނަމަވެސް، ފްލައިޓް ދަތުރު ފެށުމުގެ ކުރިން ކޮވިޑުން ރައްކާތެރިވުމަށް މާސްކް އެޅުމާއި ގައިދުރުކަން ބެހެއްޓުމަށް އަންގައި ކްރޫ މެމްބަރުން އަދިވެސް އިއުލާން ކުރަން ޖެހޭނެ އެވެ.
އިންޑިއާއަށް އެތެރެވުމާ އެކު ޕަސެންޖަރުންގެ ހުން ބެލުމަށް ތާމަލް ސްކްރީނިން ކުރެވޭނެ އެވެ. ކޮވިޑްގެ އެއްވެސް އަލާމާތެއް ހުރިކަމަށް ފާހަގަވާ ފަރާތްތައް އައިސޮލޭޝަން ފެސިލިޓީއަށް ގެންދާނެ އެވެ.
