އިންޑޮނީޝިއާގެ ޖާވާ ރަށަށް އައި ބިންހެލުމެއްގައި 162 މީހުން މަރުވެ އެތައް ސަތޭކަ ބަޔަކަށް އަނިޔާވެއްޖެ އެވެ.
ހުޅަނގު ޖާވާގެ ކިއަންޖޫރް އަވަށަށް ބިންހެލުން އައީ 5.6 މެގްނިޓިއުޑްގައި ބިމުގެ 10 ކިލޯމީޓަރު އަޑިން ކަމަށް އެމެރިކާގެ ޖިއޮލޮޖިކަލް ސާވޭގެ ތަފާސްހިސާބުން ދައްކަ އެވެ.
ގިނަ އަދަަދެއްގެ މީހުންނަށް ފަރުވާ ދިނުމަށް ހޮސްޕިޓަލަށް ގެންދިޔަ އިރު، ބައެއް މީހުންނަށް ފަރުވާ ދިނީ މަގުމަތީގައި ތިބެގެންނެވެ.
ވެއްޓިފައިވާ އިމާރާތްތަކުގެ ދަށުން މީހުން ސަލާމަތް ކުރެވޭތޯ ރެސްކިއު ޓީމުތަކުން ދަނީ އަދިވެސް މަސައްކަތް ކުރަމުންނެވެ.
ބިންހެލުން އައި ސަރަހައްދަކީ ގިނަ ބަޔަކު ތޮއްޖެހިގެން ދިރިއުޅޭ ސަރަހައްދެކެވެ. އިންޑޮނީޝިއާގެ ނޭޝަނަލް ޑިޒާޒްޓާ މިޓިގޭޝަން އެޖެންސީ (ބީއެންޕީބީ) އިން ބުނީ 162 މީހުން މަރުވި ކަމަށެވެ.
އޭގެ އިތުރުން ކިއަންޖޫރްގައި 5،000 އަށް ވުރެ ގިނަ މީހުން ހާލުގައި ޖެހިފައިވާ ކަމަށާއި 2،200 އަށް ވުރެ ގިނަ ގެޔަށް ގެއްލުން ލިބިފައިވާ ކަމަށް ބީއެންޕީބީއިން ބުންޏެވެ.
ހުޅަނގު ޖާވާގެ ގަވަރުނަރު ރިދްވަން ކާމިލް ވިދާޅުވީ 700 އަށް ވުރެ ގިނަ މީހުންނަށް އަނިޔާވި ކަމަށެވެ. އަނިޔާވި މީހުންނާއި މަރުވި މީހުންގެ އަދަދުތައް އަދިވެސް އިތުރުވާނެ ކަމަށް ލަފާކުރެވެ އެވެ.
ބިންހެލުމުގެ އަސަރު ވެރިރަށް ޖަކާޓާއަށް ވެސް ކުރި އެވެ. ކިއަންޖޫރްއާ 100 ކިލޯމީޓަރު ދުރުގައި އޮންނަ ޖަކާޓާގެ އުސް އިމާރާތްތަކުން މީހުން ހުސްކުރި އެވެ.
އިންޑޮނީޝިއާއަކީ ވަރަށް ގިނައިން ބިންހެލުން ކުރިމަތިވާ ގައުމެކެވެ. އެ ގައުމު އޮންނަނީ ބިންހެލުންތައް އާއްމުކޮށް އަންނަ ޕެސިފިކް ކަނޑުގެ "ރިންގް އޮފް ފަޔާ" ގަ އެވެ.
