ލަންޑަން (ނޮވެމްބަރު 21) - ފީފާ ވޯލްޑް ކަޕް ފުޓްބޯޅަ މުބާރާތަށް ހާއްސަކޮށް އިންގްލެންޑްގެ ސަޕޯޓަރުންނަށް ވިއްކަން ނެރުނު ގައުމީ ޓީމުގެ މެޗު ޖާޒީ އާއި ސަޕޯޓަރުންގެ ޖާޒީތައް އަގުބޮޑުވެގެން އިނގިރޭސި ސަޕޯޓަރުން ރުޅިގަދަވެއްޖެ އެވެ.
މި އަހަރުގެ ވޯލްޑްކަޕްގެ ފުރަތަމަ މެޗުގައި އިނގިރޭސިން މިއަދު ނުކުންނާނީ އީރާންއާ ދެކޮޅަށެވެ. ރާއްޖެ ގަޑިން އިރުއޮއްސި ހައެއް ޖަހާއިރު ފަށާ މި މެޗަށް ސަޕޯޓަރުން ތައްޔާރުވަމުން އަންނައިރު މިވަގުތު އިނގިރޭސި ސަޕޯޓަރުންގެ ތެރެއިން އެންމެ ގިނަ ބަޔަކު ހިތްހަމަނުޖެހުން ފާޅުކުރަމުން އަންނަނީ ޖާޒީތަކުގެ އަގު ބޮޑުވެގެންނެވެ.
މުބާރާތަށް ހާއްސަކޮށް އިންގްލެންޑްގެ ގައުމީ ޓީމްގެ ސަޕޯޓަރުންނަށް ވިއްކަން ނެރުނު ޖާޒީތަކަށް ބަލާއިރު އަގު އުޅެނީ 75 ޕައުންޑަށް (88 ޑޮލަރު) ވުރެ މަތީގަ އެވެ. ސަޕޯޓަރުންނަށް ހާއްސަ ސްޓޭޑިއަމް ޖާޒީތައް 75 ޕައުންޑަށް (88 ޑޮލަރަށް) ވިއްކަމުން އަންނައިރު މެޗު ޖާޒީތައް އުޅެނީ 115 ޕައުންޑް (136 ޑޮލަރު) އަށެވެ. ކުޑަކުދިންގެ ޖާޒީތައް 60 ޕައުންޑު (70 ޑޮލަރު) އަށް އުޅޭއިރު ނަމާއި ނަންބަރު ޖަހާކަމަށް ވާނަމަ އިތުރު 15 ޕައުންޑް (18 ޑޮލަރު) ހޭދަ ކުރަން ޖެހެ އެވެ.
"މިއީ ރޮމާ ދުވާލު އަހަރުމެން އަތުން ވައްކަންކުރުން ކަހަލަ ކަމެއް. އިގްތިސާދީ ގޮތުން ހުރިހާ ގައުމެއްވެސް އޮތީ އެހާ ރަނގަޅު ހާލަތެއްގައެއް ނޫން. މި އަގުގައި ޖާޒީ ގަނެވޭނެ ފެންވަރެއް އަހަރެންގެ އެއް ނެތް. މިއީ މަހުޖަނުންނަށް ވިއްކަން ނެރުނު އެއްޗެއްހެން ހީވަނީ" ރުޅިގަދަވެފައި ހުރި އިންގްލެންޑްގެ ސަޕޯޓަރެއް ބުންޏެވެ.
އިނގިރޭސި ނޫސްތަކުން ބުނާ ގޮތުން މި ޖާޒީތައް ތައްޔާރުކޮށްފައިވަނީ ކޮން ގައުމަކުންކަން ބުނަން އިނގިރޭސި އެފްއޭއިން ދެކޮޅު ހަދަ އެވެ. ނަމަވެސް ޖާޒީތަކުގެ އެތެރޭގައިވާ ލޭބަލްގައިވާ ގޮތުން މި ޖާޒީތައް ތައްޔާރުކޮށްފައިވަނީ ތައިލެންޑުގައި ހުންނަ ނައިކީގެ ފެކްޓަރީ ތަކުންނެވެ.
ތައިލެންޑުގެ ފެކްޓަރީތަކުން ދީފައިވާ މައުލޫމާތުތަކަށް ބަލާއިރު މީގެ ޖާޒީއެއް އުފައްދަން ހޭދަވަނީ 11 ނުވަތަ 12 ޕައުންޑް (12 ނޫނީ 13 ޑޮލަރު) އެވެ. އެއީ އެއަށް ބޭނުންވާ ސާމާނަށް ހަރަދުވާ ހަތް ޕައުންޑާއި އުފެއްދުމަށް ހޭދަވާ ހަތަރު ޕައުންޑް (4.72 ޑޮލަރާއި 8.27 ޑޮލަރު) އެވެ.
ފެކްޓަރީތަކުން މިހާ ކުޑަ އަގެއްގައި ޖާޒީތައް ތައްޔާރުކުރެވޭއިރު، ބޮޑު އަގުގައި ޖާޒީ ވިއްކުމަކީ އިނގިރޭސި އެފްއޭއިން ކުރާ ބޮޑު ވައްކަމެއްގެ ގޮތުގައި ގިނަ ބަޔަކު އަންނަނީ ސިފަކުރަމުންނެވެ.
އިނގިރޭސި ގައުމީ ޓީމްގެ ޖާޒީ އަގުބޮޑުކޮށް ވިއްކާ މައްސަލަ މީގެ ކުރިންވެސް އެތައް ފަހަރަކު ފެންމަތިވި އެވެ. 2008ގައި 40 ޕައުންޑް (47 ޑޮލަރު) އަށް ވިއްކަމުން އައި ޖާޒީތަކުގެ އަގު މިހާރު 70 ޕައުންޑް (82 ޑޮލަރު) އަށް އަރައިގެން ދިޔުމަކީ ސަޕޯޓަރުންނަށް ލިބޭނެ ބޮޑު މާޔޫސްކަމެކެވެ.
