ދީނީ ހަރުކަށި ފިކުރަށް ފާޑުކިޔަމުން ދިޔަ އެމެރިކާގެ ބްލޮގަރެއް މަރާލުމުގެ ކުށުގައި މަރުގެ ހުކުމް އިއްވާފައި ތިބި ދެ ޓެރަރިސްޓުން ބަންގްލަދޭޝްގެ ދާކާގެ ތޮއްޖެހިފައިވާ ޖަލަަކުން ފިލައިފި އެވެ.
ބަންގްލަދޭޝް ދަރިކޮޅަށް ނިސްބަތްވާ އަވީޖީތު ރޯއީއަކީ އެމެރިކާގެ އިންޖިނިއަރެކެވެ. އޭނާ މަރާލީ ކަތިވަޅިއަކުން ހަމަލާދީ ފެބްރުއަރީ 2015 ގަ އެވެ.
ހަމަލާ ދިނީ ރޯއީ އާއި އޭނާގެ އަންހެނުން ރަފީދާ ބޮންޔާ އަހްމަދު ދާކާގައި އޮތް ފޮތް މައުރަޒަކުން އެނބުރި ގެޔަށް ދިޔަ މަގުމަތީގަ އެވެ.
އެ ހަމަލާގައި ރޯއީ މަރުވި އިރު، ރަފީދާގެ ބޮލަށް އަނިޔާވެ، އަތުގެ ބޮޑުވާ އިނގިއްޔެއް ބުރިވި އެވެ.
ހަރުކަށި ފިކުރުގެ ޓެރަރިސްޓު ޖަމާއަތަކަށް ނިސްބަތްވާ ހަ މީހެއްގެ މައްޗަށް އެ ކުށް ސާބިތުވި ކަމަށް ކަނޑައެޅީ މިދިޔަ އަހަރު އެވެ. ފަސް މީހުން މަރަން ހުކުމް ކުރި އިރު، ހަ ވަނަ މީހާއަށް އިއްވީ އުމުރު ދުވަހުގެ ޖަލު ހުކުމެކެވެ.
ފުލުހުން ބުނީ މަރުގެ ހުކުމަށް ފަހު ބަންދުކުރި ދެ މީހަކު އާދީއްތަ ދުވަހު ފިލީ، ސައިކަލެއްގަައި އައި ބަޔަކު އެހީވެގެން ކަމަށެވެ. އެ މީހުން ވަނީ ސެކިއުރިޓީ ފުލުހުންނަަށް ކެމިކަލްއިން ހަމަލާދީފަ އެވެ.
ހޯމް މިނިސްޓަރު އަސަދުއްޒަމާން ހާން ވިދާޅުވީ ފިލި މީހުންނާއި އެ މީހުންނަށް އެހީވި ފަރާތްތައް ހޯދަން ބޮޑު އޮޕަރޭޝަނެއް ކުރިއަށްދާ ކަމަށެވެ.
ބޯޑަރު ސެކުއިރުޓީ އެލާޓުކޮށްފައިވާ އިރު، އެ މީހުންނާ ބެހޭ މައުލޫމާތު ފޯރުކޮށްދޭ ބަޔަކަށް 19،350 ޑޮލަރުގެ ފައިސާގެ އިނާމެއް ހުށަހަޅާފައިވެ އެވެ.
ޖަލުން ފިލި މީހުންނަކީ އަލް ގައިދާއާ ގުޅުން އޮންނަ އަންސަރުﷲ ބަންގްލާ ޓީމް ގްރޫޕްގެ މީހުންނެވެ. އެ ގްރޫޕުން ވަނީ ގިނަ އެކްޓިވިސްޓުންނަށް މަރުގެ ހަމަލާތައް ދީފަ އެވެ.
