ޕެރިސް (ނޮވެމްބަރު 16) - ޖަރުމަނުގެ އާރްބީ ލައިޕްޒިގަށް މޮޅު ކުޅުމެއް ދައްކަމުން އަންނަ ވިންގް، ކްރިސްޓޮފާ އެންކުންކޫގެ ފަޔަށް ލިބުނު އަނިޔާގެ ސަބަބުން މި ފަހަރުގެ ވޯލްޑް ކަޕްގައި ނުކުޅެވޭނެ ކަމަށް ނިންމައިފި އެވެ.
ޖަރުމަނު ލީގުގައި މި ސީޒަނު، 15 މެޗުން 12 ގޯލު ޖަހައި ލަނޑު ލިސްޓުގެ އެއް ވަނައިގައި އޮތް އެންކުންކޫ، 25، އަކީ މި ފަހަރުގެ ވޯލްޑް ކަޕާ ކުރިމަތިލިއިރު، ފްރާންސްގައި އެންމެ ރަނގަޅު ފޯމުގައި ހުރި އެއް އެޓޭކަރެވެ.
އެކަމަކު، އިއްޔެ ފްރާންސްގެ ސްކޮޑުން ބޭއްވި ފަރިތަކުރުންތަކުގައި، މިޑްފީލްޑަރު، އެޑޮއާޑޯ ކަމަވިންގާ ބޯޅަ ހޯދަން ކުރި މަސައްކަތުގެ ތެރެއިން ޖެހި ޓެކަލްއަކުން އެންކުންކޫ އަށް އަނިޔާވެ، އޭނާ އަށް ވޯލްޑް ކަޕްގެ ފުރުސަތު ގެއްލުނީ އެވެ.
ވޯލްޑް ކަޕްގައި ވާދަކުރަން ފްރާންސް ޓީމު ގަތަރަށް ދާނީ މިއަދުގެ ވަގުތެއްގަ އެވެ. އެންކުންކޫގެ ބަދަލުގައި ފްރާންސް ސްކޮޑަށް ނަގާނެ ކުޅުންތެރިއަކު އަދި އިއުލާނުކޮށްފައެއް ނުވެ އެވެ.
ފްރާންސްގެ ފަރިތަކުރުމުގެ ތެރެއިން އަނިޔާވުމުން އެންކުންކޫ (ކ) އެ ޓީމުގެ އޮފިޝަލަކާ އެކު.
މި ފަހަރުގެ ވޯލްޑް ކަޕާ ކުރިމަތިލާއިރު، އަނިޔާގެ ސަބަބުން އެންމެ ބޮޑަށް ބަލިކަށިވެފައިވާ އެއް ޓީމަކީ ފްރާންސް އެވެ.
އެންމެ ފަހުގެ ޗެމްޕިއަން، ފްރާންސް އިން މި ފަހަރުގެ ވޯލްޑް ކަޕަށް ނުކުންނާނީ އަނިޔާ އާއި ފިޓްނަސް މައްސަލަތަކާ ހެދި ޗެލްސީ އަށް ކުޅޭ، މިޑްފީލްޑަރު، އެންގޯލޯ ކާންޓޭ އާއި ޔުވެންޓަސްގެ މިޑްފީލްޑަރު، ޕައުލް ޕޮގްބާ އަދި ޕީއެސްޖީގެ ޑިފެންޑަރު، ޕްރެސްނެލް ކިމްޕެމްބޭ ވެސް ނެތި އެވެ.
އެ ލިސްޓަށް ދެން އިތުރުވެފައި މިވަނީ ރަނގަޅު ފޯމެއްގައި ކުޅެމުން އައި އެންކުންކޫ އެވެ. ފަހަކަށް އައިސް ފްރާންސްގެ ކޯޗު ޑިޑިއޭ ޑެޝޯމްޕްސް ގިނަ މެޗުތަކެއްގައި އައީ އެންކުންކޫ އަށް ފުރުސަތު ދެމުންނެވެ.
ފްރާންސްގެ ސްކޮޑުގައި ހިމެނި ކުޅުންތެރިންގެ ތެރެއިން ރަފައެލް ވަރާން އަންނަނީ އަނިޔާ އަކުން ރިކަވާވަމުންނެވެ. ވޯލްޑް ކަޕްގައި ފްރާންސް ކުޅޭ ފުރަތަމަ މެޗަށް ވަރާން ފިޓްވާނެ ކަމަށް ފްރާންސްގެ މެޑިކަލް ޓީމުން ވަނީ ބުނެފަ އެވެ.
