ސޯލް, ދެކުނު ކޮރެއާ (ނޮވެމްބަރު 13) - ވޯލްޑް ކަޕަށް ދެކުނު ކޮރެއާ އިން ނެގި ސްކޮޑުގައި ޓޮޓެންހަމް ހޮޓްސްޕާސް އަށް ކުޅެމުންދާ ފޯވަޑް ސޮން ހެއުން މިން ހިމަނައިފި އެވެ.
އަނިޔާގެ ސަބަބުން ކުޅުމާ ދުރުގައި މި ވަގުތު ހުރި ސޮން ސްކޮޑުގައި ހިމެނި ނަމަވެސް، ވޯލްޑް ކަޕަށް އޭނާ ފިޓުވާނެކަމުގެ ޔަގީންކަމެއް ނެތެވެ.
ސޮން ،30، ގެ ކަނާތު ލޮލުގެ ކަށިގަނޑަށް އަނިޔާވީ ޗެމްޕިއަންސް ލީގުގައި މި މަހުގެ އެއް ވަނަ ދުވަހު މާސޭ އަތުން ޓޮޓެންހަމް މޮޅުވި މެޗުގަ އެވެ. މި އަނިޔާ ރަނގަޅުކުރުމަށް ސޮން ވަނީ ސާޖަރީއެއް ވެސް ހަދައިފައެވެ.
ވޯލްޑް ކަޕްގައި ކުޅެވޭނެކަމުގެ ޔަގީންކަން ސޮން ސަޕޯޓަރުންނަށް ދިނީ މިދިޔަ ބުދަ ދުވަހު އެވެ. އެކަމަކު, ސްކޮޑް އިއުލާންކުރުމަށް ފަހު ދެކުނު ކޮރެއާގެ ކޯޗު ޕައުލޯ ބެންޓޯ ބުނީ ސޮން ގައުމީ ޓީމުގެ ފަރިތަކުރުންތަކުގައި ބައިވެރިވާނެ ދުވަހެއް އަދި ބުނަން ނޭނގޭ ކަމަށެވެ.
ސޮން އަށް ވޯލްޑް ކަޕްގައި ނުކުޅެވެދާނެ ކަމަށް ބަލައި، ބެންޓޯ ވަނީ 27 ވަނަ ކުޅުންތެރިއެއްގެ ގޮތުގައި ދެކުނު ކޮރެއާގެ ލީގުގައި ކުޅޭ ފޯވަޑް އޯ ހިޔޮން ގިއޫ ސްކޮޑްގައި ހިމަނައިފަ އެވެ. ވޯލްޑް ކަޕަށް ސޮން ފިޓުނުވެއްޖެނަމަ، އޭނާގެ ބަދަލުގައި ސްކޮޑަށް ނަގަނި ހިޔޮން ގިއޫ އެވެ.
ބެންޓޯ ބުނީ ވޯލްޑް ކަޕްގައި ސޮން ކުޅުމާ ގުޅޭގޮތުން އަދި ވަކި ގޮތެއް ނުނިންމާ ކަމަށެވެ.
"އަހަރަމެން އެބަޖެހޭ ކެތްތެރިވާން. ސޮންގެ ހާލަތު ކޮންމެ ދުވަހަކު ވެސް ބަލަންޖެހޭ. އަދި އެބައޮތް ގޮތެއް ނިންމަން ވަގުތު. އެންމެ މުހިންމު ކަމަކީ ސޮން ވީހާވެސް އަވަހަށް ރިކަވާވެ، އަދި އޭނާ ތައްޔާރުވުން. އެ ހިސާބުން އަހަރަމެން ވަކި ގޮތެއް ނިންމާނީ،" ބެންޓޯ ބުންޏެވެ.
ވޯލްޑް ކަޕްގެ ގުރޫޕް އެޗްގައި ދެކުނު ކޮރެއާއާއެކު ދެން އޮތީ އުރުގުއޭ އާއި ގާނާ އަދި ޕޯޗުގަލް އެވެ.
