މާލޭ ރާޅުގަނޑު ސަރަަހައްދުގައި މިހާރު ކުރިއަށްދާ ގައުމީ ސާފިން ލީގުގެ ފަހު މުބާރާތް، "ރަންނަމާރި ޗެލެންޖް"ގެ ޓީމު އިވެންޓް ބައި މި ފަހަރު "މަރުހަބާ ކަޕް"ގެ ނަމުން ހާއްސަކޮށްފައިވާއިރު، ފޯރިގަދަ ހީޓްތަކަކާ އެކު އިއްޔެ މި އިވެންޓް ފަށައިފި އެވެ.
މިދިިޔަ އަހަރު ގައުމީ ސާފިން މުބާރާތު (ރަންނަމާރި ޗެލެންޖް)ގައި 14 ރަށަކަށް ނިސްބަތްވާ ޓީމުތަކަކުން ވާދަކުރި އެވެ. އެއީ އެއް ސާފަރަކަށް ވުރެ ގިނައިން އެއް ރަށަކުން ބައިވެރިވާނަމަ އެއީ ޓީމެއް ގޮތަށް ގުނަން އެމްއެސްއޭ ނިންމާފައިވުމުން، ރަށްރަށުން ބައިވެރިވި ޓީމުތަކުގެ އަދަދެވެ. އެކަމަކު، މި ފަހަރު ރަސްމީކޮށް ޓީމު އިވެންޓް ރަނގަޅު އުސޫލެއްގެ ތެރެއިން ފަށަން، އެމްއެސްއޭ އިން ނިންމީ "މަރުހަބާ ކަޕް" ގެ ނަމުންނެވެ.
މި ފަހަރު މަރުހަބާ ކަޕްގައި ޓީމު އިވެންޓް ކުރިއަށްގެންދާއިރު ހަ ރަށަކުން ޓީމު ވާދަކުރެ އެވެ. ކޮންމެ ޓީމެއްގައި ހަތަރު ރާޅާ އެޅުންތެރިން ވާދަކުރެ އެވެ. އެ ގޮތުން، މިދިޔަ އަހަރުގެ އެއް ވަނަ ހޯދި މާލޭ ޓީމުގައި ހިމެނެނީ މުހައްމަދު ފަޔާޒް، މުހައްމަދު އިރުޝާދު، އަހުމަދު އަރްޒަން އަދި ޔޫސުފް ކަޔާން އެވެ. މިދިޔަ އަހަރު ދެ ވަނަ ހޯދި ގދ. ގައްދޫ ޓީމުގައި ހިމެނެނީ އިސްމާއިލް ރަޝީދު (ސްމައިލީ)، ހޫދު އަހުމަދު (ހޫބްސް)، ޖައިލަމް ނިޒާރު އަދި ނަޖާހު މުހައްމަދު (ކަބޯ) އެވެ.
ރަސްމާދޫ ޓީމުގައި ހިމެނޭ އިބޫ: އިއްޔެ ހީޓް ނިންމާލުމަށް ފަހު.--- ފޮޓޯ: މުހައްމަދު ޝާބިން/ އަދަދު
އެންމެ ފަހުން މުބާރާތުގެ ތިން ވަނަ އަށް ދިޔަ، ރ. ރަސްމާދޫ ޓީމުގައި މި ފަހަރު ހިމެނެނީ ހުސެއިން އަރީފް (އިބޫ)، އަބްދުﷲ އަރީފް (ފުކޫ)، އިބްރާހިމް އަރީފް އަދި މުހައްމަދު އާރިފް އެވެ. މުބާރާތުގައި ވާދަކުރާ ކ. ތުލުސްދޫ ޓީމުގައި ހިމެނެނީ އަހުމަދު އާގިލް (އައްމަޑޭ)، އާދަމް މުއީން، މުހައްމަދު ނުސްރަތު އަދި ރިފާސް އަބްދުލް އެވެ.
މ. މުލި ޓީމުގައި ހިމެނެނީ އައިހަމް އަދުނާން، ޝާނިފް ޝަފީގު، އަލީ ރިޒާ އަދި އިބްރާހިމް ލަތީފް އެވެ. އަދި ގދ. ވާދޫ ޓީމުގައި ތިބީ ޖީހާން އަހުމަދު، ޖިނާން އަހުމަދު، އަހުމަދު ޒަޔާން އަދި އަހުމަދު ލުޒެއިން އެވެ.
މަރުހަބާ ކަޕްގެ ހީޓުތައް ބެލުމަށް ރަށްރަށުގެ ގިނަ ޒުވާނުން އަންނަނީ ރާޅުގަނޑަށް އެއްވަމުންނެވެ.
ގައުމީ ސާފިން މުބާރާތުގެ ހީޓްތައް ބަލާލުމަށް ސާފަރުންނާއި ސަޕޯޓަރުން އިށީދެނލައިގެން.--- ފޮޓޯ: މުހައްމަދު ޝާބިން/ އަދަދު
ސަތޭކަ އަށް ވުރެ ގިނަ ސާފަރުން ވާދަކުރާ ރަންނަމާރި ޗެލެންޖް މިއީ މި އަހަރު ގައުމީ ސާފިން ލީގުގެ ފަހު މުބާރާތެވެ. މީގެ ކުރިން ވަނީ ހަތަރު މުބާރާތެއް ރާއްޖޭގެ އެކި ކަންކޮޅުތަކުގައި ބާއްވައިފަ އެވެ. އެންމެ ފުރަތަމަ މުބާރާތް ބޭއްވީ ގދ. ގައްދޫގަ އެވެ.
އެ އަށް ފަހު މ. މުއްޔާއި ރ. ކިނޮޅަސް އަދި ކ. ހިންމަފުށީގައި ވަނީ ސާފިން ލީގުގެ މުބާރާތްތައް ބާއްވައިފަ އެވެ. އެންމެ ފަހު، ބޮޑު މުބާރާތް ކަމަށްވާ ގައުމީ މުބާރާތް މި ކުރިއަށްދަނީ މާލޭގަ އެވެ.
މި މަހު 19 ވަނަ ދުވަހުގެ ނިޔަލަށް ރާޅުގަނޑު ސަރަހައްދުގައި ކުރިއަށްދާ ގައުމީ ސާފިން މުބާރާތުގައި ރޭންކިންގެ ކުރީގައި އުޅޭ އެތުލީޓުން އަންނަނީ ވާދަކުރާ ހީޓްތަކުގައި ރަނގަޅު ކާމިޔާބެއް ހޯދަމުންނެވެ.
