މާލޭގައި ރޭ ހިނގި އަލިފާނުގެ ހާދިސާގައި ހާލުގައި ޖެހުނު މީހުންނަށް އެހީވުމުގެ ގޮތުން 90،000ރ. އަށް ވުރެ ގިނައިން މިހާތަނަށް ހަރަދުކޮށްފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީން (އެންޑީއެމްއޭ) އިން ބުނެފި އެވެ.
ރޭ މ. ނިރުފެހިގޭ ހިނގި އަލިފާނުގެ ހާދިސާގައި ޖުމްލަ 10 މީހުން މަރުވެފައިވާއިރު، އެއީ އިންޑިއާގެ އަށް މީހަކާއި ބަންގްލަދޭޝް ރައްޔިތެކެވެ. މަރުވި އެކަކު ދަނެގަނެވިފައެއްނުވެ އެވެ.
އަލިފާނުގެ ހާދިސާއާ ގުޅިގެން އެންޑީއެމްއޭ އިން ކުރަމުންދާ މަސައްކަތްތަކާ ގުޅޭ އެންމެ ފަހުގެ މައުލޫމާތު ހިއްސާކުރަމުން އެ އޮތޯރިޓީން ބުނީ، އަލިފާނުގެ ހާދިސާގެ މައުލޫމާތު އެ އޮތޯރިޓީއަށް ލިބުމާއެކު އެހާދިސާއަށް އިޖާބަ ދިނުމަށް އެއޮތޯރިޓީގެ އެމަޖެންސީ ރެސްޕޮންސް ޓީމެއް އެސަރަހައްދަށް ގޮސް ހަރަކާތްތެރިވި ކަމަށެވެ.
އެންޑީއެމްއޭ އިން ބުނީ އެ ހާދިސާއާ ގުޅިގެން ހާލުގައި ޖެހިފައިވާ ފަރާތްތަކަށް އެހީތެރިކަން ފޯރުކޮށްދިނުމުގެ ގޮތުން މާފަންނު ސްޓޭޑިއަމްގައި އިކުއޭޝަން ސެންޓެރެއް ގާއިމްކޮށް، ބެކްޕެއްގެ ގޮތުގައި ކަލާފާނު ސްކޫލު ވެސް ތައްޔާރު ކުރި ކަމަށެވެ.
އަލިފާން ރޯވި ސަރަހައްދުގައި ހުރި ހަތަރު އިމާރާތަކުން 35 ދިވެހިންނާއި އަލިފާނުގެ ހާދިސާ ހިނގި އިމާރާތުން ސަލާމަތް ކުރެވުނު 28 ބިދޭސީން ހިމެނޭހެން 33 ބިދޭސީން ރަޖިސްޓްރީ ކޮށްފައިވާއިރު، އޭގެ ތެރޭގައި ހަތް ކުޑަކުދިން ވެސް ހިމެނެ އެވެ.
އެމްޑީއެމްއޭއިން ބުނީ، މިހާދިސާއާއި ގުޅިގެން ހާލުގައި ޖެހުނު ފަރާތްތަކަށް ބޭނުންވާ ޒަރޫރީ އެހީތެރިކަމާއި ކެއިން ބުއިމާއި ބޭހާއި ބޯހިޔާވަހިކަން އަދި އަންނައުނު ފޯރުކޮށްދީފައިވާ ކަމަށެވެ. އެގޮތުން ހާލުގައި ޖެހުނު ފަރާތްތަކަށް ޖުމްލަ 90،133ރ. ހަރަދު ކުރެވިފައިވާ ކަމަށް އެންޑީއެމްއޭ އިން ބުނެ އެވެ.
އޭހެ ތެރޭގައި އިންސާނީ އެހީގެ ގޮތުގައި ފުރަތަމަ ފޭސްގެ ފަސް ދުވަހަށް ބޯހިޔާވަހިކަމަށް 33،500ރ. އާއި އަންނައުނު ނެތް ފަރާތްތަކުން އަންނައުނު ހޯދުމަށް 19،000ރ. އާއި ކެއިން ބުއުމަށް 29،000ރ. އާއި ހައިޖީން ކިޓު ހޯދުމާއި އޮޕަރޭޝަނަލް ހަރަދުގެ ގޮތުގައި 2،633ރ. ހަރަދުކޮށްފައިވާ ކަމަށް ވެސް އެ އޮތޯރިޓީން ބުނެ އެވެ.
