އިނގިރޭސި ސިފައިން އަފްގާނިސްތާނުގައި މަރާލި 64 ކުޑަކުދިންގެ އާއިލާތަކަށް އިނގިރޭސި ސިފައިން ފައިސާގެ ބަދަލު ދީފި އެވެ.
މީގެ ކުރިން އިނގިރޭސި ސަރުކާރުން ބުނީ މަރާލީ 16 ކުދިން ކަމަށެވެ. އެކަމަކު ފައިސާގެ ބަދަލު ދިނީ ޖުމްލަ 64 ކުދިންގެ އާއިލާއަށެވެ.
އެ ހުރިހާ ކުދިން ވެސް މަރާލީ 2006 އިން 2014 އަށް އިނގިރޭސި ސިފައިން އަފްގާނިސްތާނުގައި ތާލިބާނުންނާ ދެކޮޅަށް ހަނގުރާމަ ކުރަން އުޅުނު ދުވަސްވަރެވެ.
އިނގިރޭސި ސިފައިން 64 ކުދިން މަރާލިކަން ހާމަވީ އެކްޝަން އޮން އާމްޑް ވަޔަލެންސް (އޭއޯއޭވީ) ޖަމިއްޔާއިން މައުލޫމާތު ހޯދަން އެދި ހުށަހެޅުމުންނެވެ.
ގިނަ ކުދިން މަރުވީ ވައިގެ ހަމަލާތަކާއި ބަޑީގެ ހަމަލާތަކުގެ ތެރެއިން ކަމަށް އިނގިރޭސި ސަރުކާރުން އެ ޖަމިއްޔާއަށް ފޯރުކޮށްދިން މައުލޫމާތުގައި ވެ އެވެ.
އިނގިރޭސި ސިފައިންގެ ސަބަބުން އަފްގާނިސްތާނުގައި މަރުވި 881 މީހުންގެ އާއިލާއިން ފައިސާގެ ބަދަލު ހޯދަން އެދުނެވެ. އެހެން ނަމަވެސް، ގިނަ ހުށަހެޅުންތައް ބަލައިނުގަނެ އެވެ.
ބަލައިގަނެ، ފައިސާގެ ބަދަލު ލިބުނު އެއް މައްސަލައިގައި އެއް އާއިލާއެއްގެ އަށް މެމްބަރުން މަރުވެފައި ވެ އެވެ. އެއީ 2009 ގައި ހެލްމަންދް ޕްރޮވިންސްގައި ދިން ވައިގެ ހަމަލާއެއްގައި މަރުވި ބަޔެކެވެ.
އެ މައްސަލައިގައި ގޮތެއް ނިންމަން 144 ދުވަސް ނެގި އިރު، ބަދަލުގެ ގޮތުގައި ދިނީ 7،205 ޕައުންޑެވެ.
އިނގިރޭސިވިލާތުން ވަނީ 2006 އާއި 2014 އާ ދެމެދު އަފްގާނިސްތާނުގައި މަރުވި އާއްމުންގެ 289 މީހުންނަށް ބަދަލުގެ ގޮތުގައި ޖުމްލަ 688،000 ޕައުންޑް ހޭދަކޮށްފަ އެވެ.
