އެމްޑީޕީގެ ރިޔާސީ ޕްރައިމަރީގައި ވާދަނުކުރަައްވާނެ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.
"އަޅުގަނޑު [ޕްރައިމަރީގައި] ވާދައެއް ނުކުރަން. ތާއިދު ކުރަނީ ރައީސް ސޯލިހަށް،" ޕްރައިމަރީގައި ޝާހިދު ވާދަކޮށް ކުރައްވަފާނެ ކަމުގެ އަޑުތައް ފެތުރިފައިވާއިރު، "އަދަދު" ނޫހަށް ރޭ އޭނާ ވިދާޅުވި އެވެ.
އެމްޑީޕީގެ ޕްރައިމަރީ ބާއްވާނެ ވަކި ތާރީހެއް އަދި އިއުލާނު ނުކުރާއިރު، ޕްރައިމަރީގައި ރައީސް ސޯލިހު ވާދަ ކުރައްވަން ވަނީ ނިންމަވައިފަ އެވެ.
މި އަހަރު ބޭއްވި ނޫސްވެރިންގެ ބައްދަލުވުމެއްގައި ރައީސް ސޯލިހު ވަނީ އެފަދަ އިޝާރާތެއް ކުރައްވާފަ އެވެ. އެ ދުވަހު ރައީސް ސޯލިހު ވިދާޅުވީ އެމްޑީޕީއިން ރިޔާސީ އިންތިހާބު ކާމިޔާބު ކުރަން ބޭނުންނަމަ އެ މަނިކުފާނަކީ ޕާޓީއަށް "ޗޮއިސް" އެއް ކަމަށެވެ.
ރައީސް އޮފީހުގެ ތަރުޖަމާނު މިއުވާން މުހައްމަދު ރޭ "އަދަދު" އަށް ވިދާޅުވީ އެ ދުވަހުގެ ޕްރެސް ކޮންފަރެންސްގައި ރައީސް ސާފުކޮށް އެ ވިދާޅުވީ ޕްރައިމަރީގައި ވާދަކުރައްވާނެކަން ކަމަށެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ޕްރައިމަރީގައި ވާދަ ކުރައްވާނެ ކަމަށް ކުރިން ވިދާޅުވެފައިވާއިރު، އެކަމާ ގުޅޭ ގޮތުން މި ފަހަކަށް އައިސް އެ މަނިކުފާނު ވާހަކަ ދައްކަވާފައެއް ނެތެވެ.
އެމްޑީޕީގެ ޕްރައިމަރީ ފުރަތަމަ ބާއްވާނެ ކަމަށް އަޑު ފެތުރުނީ ނިމިދިޔަ އޮގަސްޓު މަހު އެވެ. އެއަށްފަހު މި މަހު ބާއްވާނެ ކަމަށް އަޑު ފެތުރިފައިވަނިކޮށް މިހާރު އިވެމުންދަނީ އަންނަ އަހަރަށް ލަސްވި ވާހަކަ އެވެ.
އެމްޑީޕީގެ ތަރުޖަމާނު އަނަސް އަބްދުލް ސައްތާރު ކުރެއްވި ޓުވީޓެއްގައި ވިދާޅުވީ ރިޔާސީ ޕްރައިމަރީ ބޭއްވޭނެ ތާރީހެއް، ޕާޓީގެ އިދާރީ ކަންކަން ފުރިހަމަ ކުރުމަށްފަހު އިއުލާން ކުރެވިގެންދާނެ ކަމަށެވެ.
