މެދުއިރުމަތީގައި ހިންގާ "ގްރީން" މަޝްރޫއަށް ސައުދީ އަރަބިއްޔާ އިން 10 އަހަރުގެ ތެރޭގައި 2.5 ބިލިއަން ޑޮލަރު ހޭދަކުރާނެ ކަމަށް ވަލީ އަހުދު އަމީރު މުހައްމަދު ބިން ސަލްމާން ވިދާޅުވެއްޖެ އެވެ.
މިޑްލް އީސްޓް ގްރީން އިނީޝިއޭޓިވްގެ ނަމުގައި މޫސުމީ ބަދަލާ ގުޅޭ އަސަރުތައް ކުޑަކުރަން ހާއްސަ ފިޔަވަޅު އަޅާ މަޝްރޫއެއް ފެށީ މިދިޔަަ އަހަރު އެވެ.
މިދިޔަ އަހަރު ސައުދީ އަރަބިއްޔާއިން ބުނީ އިއާދަކުރަނިވި ހަކަތައާ ގުޅޭ މަޝްރޫއުތަކަށް ބޭނުންވާ 10.4 ބިލިއަން ޑޮލަރުގެ 15 ޕަސެންޓް އެ ގައުމުން ފޯރުކޮށްދޭން ލަނޑުދަނޑި ކަނޑައަޅާފައިވާ ކަމަށެވެ.
މިޑްލް އީސްޓް ގްރީން އިނީޝިއޭޓިވްގެ އަމާޒަކީ އެ ސަރަހައްދުގައި ކާބަން ބޭރު ކުރާ މިންވަރު 60 ޕަސެންޓު މަދު ކުރުމެވެ. އެކަން ކުރެވޭނީ އިއާދަކުރަނިވި ހަކަތައިގެ މަޝްރޫއުތަކުންނެވެ.
އޭގެ އިތުރުން މެދުއިރުމަތީގައި 50 ބިލިއަން ގަސް އިންދައި، 200 މިލިއަން ހެކްޓަރުގެ ބިން އަލުން ޖަންގަލީގެ ގޮތުގައި ތަރައްގީ ކުރުން ވެސް މަޝްރޫއުގައި ހިމެނެ އެވެ.
ސައުދީ އަރަބިއްޔާއިން ބޭނުން ވަނީ 2030 ގެ ކުރިން އެ ގައުމަށް ބޭނުންވާ ކަރަންޓުގެ 50 ޕަސެންޓު އިއާދަކުރަނިވި ގޮތްތަކުން ޖެނެރޭޓް ކުރުމަށެވެ.
އެކަން ހާސިލްކުރެވިއްޖެ ނަމަ 2035 އާ ހަމައަށް ދާއިރު، ދުނިޔޭގެ އެޓްމޮސްފިއާއިން 44 މިލިއަން ޓަނުގެ ކާބަން މަދުކުރެވޭނެ ކަމަށް ވަލީ އަހުދު ދެކިވަޑައިގަންނަވަ އެވެ.
