ނިޔޯން، ސްވިޒަލެންޑް (ނޮވެމްބަރު 7) - ޔޫރޮޕާ ލީގުގެ ގަދަ 16 ޓީމުގެ ބުރަށް ކޮލިފައިވާން ކުޅޭ ނޮކައުޓް ޕްލޭއޮފްގައި ބާސެލޯނާ އާއި މެންޗެސްޓާ ޔުނައިޓެޑް ބައްދަލުކުރަން ޖެހިއްޖެ އެވެ.
ޔުނައިޓެޑް ޕްލޭއޮފްގައި ކުޅެން ޖެހުނީ ޔޫރޮޕާ ލީގުގައި ވާދަކުރި ގްރޫޕްގެ ދެ ވަނަ އަށް ދިއުމުންނެވެ. ބާސެލޯނާ ޔޫރޮޕާ ލީގުގައި ކުޅެން ޖެހުނީ ޖެހިޖެހިގެން ދެ ވަނަ ފަހަރަށް ޗެމްޕިއަންސް ލީގުގެ ގްރޫޕް ސްޓޭޖުން ކެޓުމުންނެވެ.
ބާސެލޯނާގެ ކޯޗު ޒަވީ ހެނާންޑޭޒް މީގެ ކުރިން ވަނީ އެ ޓީމުން ޔޫރޮޕާ ލީގަށް ނުކުންނާނީ އެ މުބާރާތް ކާމިޔާބު ކުރުމުގެ އަމާޒުގައި ކަމަށް ބުނެފަ އެވެ. ޕްލޭއޮފްގައި ޔުނައިޓެޑާ ދެކޮޅަށް ކުޅެން ޖެހުމުން އެ ކަމާ ބެހޭގޮތުން ޒަވީ ބުނީ "މިއީ ވަރުގަދަ ޗެެލެންޖެއް" ކަމަށެވެ.
"ޔުނައިޓެޑާ ދެކޮޅަށް ވަރަށް ރަނގަޅު ވާދައެއް ކުރަން ޖެހޭނެ. ވަރުގަދަ ތާރީހެއް އޮތް ޔުނައިޓެޑުން އެ އަންނަނީ އާ ކޯޗު (ޓެން ހާގް)އާ އެކު ރަނގަޅު ކުރިއެރުންތަކެއް ހޯދަމުން،" ޒަވީ ބުންޏެވެ.
މިއަދު ކުރިއަށްދިޔަ ޔޫރޮޕާ ލީގުގެ ނޮކައުޓް ޕްލޭއޮފް ބުރުގެ ގުރުއަތުލުން ނެގުނު ގޮތް.
ޗެމްޕިއަންސް ލީގުގެ ގްރޫޕްތަކުގެ ތިން ވަނަ އަށް ދިޔަ ޓީމުތައް ޔޫރޮޕާ ލީގުގެ ޕްލޭއޮފް ބުރުގައި ކުޅޭއިރު، ދެން ބާސެލޯނާގެ އިތުރުން މި ބުރުން ފެންނާނީ އަޔަކްސް، ބަޔާ ލެވަކޫސަން، ސްޕޯޓިން، ރެޑްބުލް ސަލްޒްބާގް، ޝަހުތަރު ޑޮނެސްކް، ސެވިއްޔާ އަދި ޔުވެންޓަސް އެވެ.
ޕްލޭއޮފް ބުރުގައި ޔުވެންޓަސް ކުޅޭނީ ފްރާންސްގެ ނޯންޓެސްއާ އެވެ. ސްޕޯޓިން ލިޒްބަން އިން ނުކުންނާނީ ޑެންމާކްގެ މިޓްޔައެލަންޑާ ދެކޮޅަށެވެ. ޔޫކްރެއިންގެ ޝަހުތަރު ޑޮނެސްކުން ކުޅޭނީ ފްރާންސްގެ ރެނެސްއާ އެވެ. އަޔަކްސް އިން ޖަރުމަނު ލީގަށް ވާދަކުރަމުން އަންނަ ޔޫނިއަން ބާލިންއާ ކުޅޭއިރު، ޒަބީ އަލޮންސޯ ކޯޗުކޮށްދޭ ބަޔާ ލެވަކޫސަން ބައްދަލުކުރާނީ ފްރާންސްގެ މޮނާކޯއާ އެވެ.
ޔޫރޮޕާ ލީގުގައި ކާމިޔާބު ހޯދުމުގައި ރަނގަޅު ރެކޯޑެއް އޮތް ސެވިއްޔާ އިން ޕްލޭއޮފް ބުރުގައި ކުޅޭނީ ޕީއެސްވީއާ އެވެ. އަދި ޔޫރޮޕާ ލީގުގެ ތަށި ޕޯޓޯ އާއި ޔުނައިޓެޑަށް ހޯދައިދިން ކޯޗު ހޯސޭ މޮރީނިއޯ މިހާރު ހަވާލުވެހުރި، ރޯމާ އިން ޕްލޭއޮފް ބުރުގައި ބައްދަލުކުރާނީ އޮސްޓްރިއާގެ ރެޑްބުލް ސަލްޒްބާގާ އެވެ.
