ޗައިނާގައި އެޕަލް ކުންފުނީގެ އައިފޯން އުފައްދާ ފެކްޓްރީ ހުންނަ ސަރަހައްދު ލޮކްޑައުން ކުރުމުން، ޝިޕްމަންޓްތައް ލަސްކުރަން ޖެހިފައިވާ ކަމަށް އެ ކުންފުނިން ބުނެފި އެވެ.
އެޕަލްއިން ބުނީ ޗައިނާގައި ހުންނަ ފެކްޓްރީ މިހާރު އޮޕަރޭޓް ކުރަނީ ކެޕޭސިޓީ ވަރަށް ބޮޑުތަނުން ދަށްކޮށްގެން ކަމަށެވެ. އެ ސަރަހައްދު ލޮކްޑައުން ކުރީ ނޮވެމްބަރު ދެ ވަނަ ދުވަހު އެވެ.
ޗައިނާއިން ގެންގުޅޭ ޒީރޯ ކޮވިޑް ސިޔާސަތުގެ ދަށުން އެ ސަރަހައްދު ލޮކްޑައުން ކުރީ ހަފުތާއަކަށެވެ. އެހެންކަމުން ކުރިއަށް އޮތް ދެ ދުވަސް ތެރޭގައި ފިޔަވަޅު މުރާޖައާ ކުރާނެ އެވެ.
"އައިފޯން14 ޕްރޯ އާއި އައިފޯން14 ޕްރޯ މެކްސް މޮޑެލްތަކަށް ޑިމާންޑު ބޮޑު. އެކަމަކު އައިފޯން14 ޕްރޯ އަދި އަދި އައިފޯން14 ޕްރޯ މެކްސްގެ ޝިޕްމަންޓްތައް ކުރިއަށް އޮތް ތަނުގައި ލަސްވާނެ،" އެޕަލްއިން ނެރުނު ބަޔާނެއްގައި ބުންޏެވެ.
އާދީއްތަ ދުވަހު ޗައިނާއިން ރިޕޯޓު ކުރީ ކޮވިޑްގެ 5،643 ކޭސް އެވެ. އެއީ ފާއިތުވި ހަ މަހުގެ ތެރޭގައި އަދަދުތައް އެންމެ މަތިވި ދުވަހެވެ.
އައިފޯން ހަދާ ފެކްޓްރީ ހުންނަ ޒެންގްޒައުއަކީ ޗައިނާގެ މެދުތެރޭގައި އޮންނަ ހެނާން ޕްރޮވިންސްގެ މައި ސިޓީ އެވެ. އެ ތަނުގައި 10 މިލިއަން މީހުން ދިރިއުޅެ އެވެ.
ޒެންގްޒަައުގައި ހޯމަ ދުވަހު 3،683 ކޭސް ރިޕޯޓު ކުރި އިރު، 22 މީހުން މަރުވި އެވެ. އައިފޯން ފެކްޓްރީގެ މުވައްޒަަފުންގެ ތެރެއިން ވެސް ކޭސްތަކެއް ފެނުނެވެ.
އެހެންވެ އެ ތަނުގައި ލޮކްޑައުން ނުވެ ގޭގައި ތިބުމަށް ގިނަ މުވައްޒަފުން ފެކްޓްރީ ދޫކޮށް ދިޔަ އެވެ. އެޕަލްއިން މިހާރު މަސައްކަތް ކުރަނީ ފެކްޓްރީ ދޫކޮށް ދިޔަ މުވައްޒަފުންނަށް 69 ޑޮލަރުގެ ބޯނަހެއް ދީގެން އަލުން މަސައްކަތަށް ނެރުމަށެވެ.
