ފަރުކޮޅުފުއްޓަށް ބަދަލު ކުރި އެސްޖެހި ގަނޑުވަރު ތަރައްގީކޮށް، އެތަނުގައި ރެސްޓޯރެންޓެއް ހިންގާނެ ބަޔަކު ހޯދަން އެޗްޑީސީން މިއަދު އިއުލާނުކޮށްފި އެވެ.
އެޗްޑީސީން މިއަދު ކުރި އިއުލާނުގައި ބުނީ، އެ ޕުރޮޖެކްޓު ހިންގުމަށް އެ ކޯޕަރޭޝަނުން ބޮޑަށް އެދެނީ އެތަން ތަރައްގީކުރާ ފަރާތުން އެތަން ހިންގާ މޮޑެލްއަށް ކަމަށެވެ. އެހެންނަމަވެސް، އެނޫން މޮޑެލްއަކަށް އެ ޕުރޮޖެކްޓު ހިންގުމަށް ޝައުގުވެރިވާ ފަރާތްތަކަށް ވެސް ޕުރޮޕޯސަލް ހުށަހެޅުމުގެ ފުރުސަތު ވަނީ ހުޅުވާލާފަ އެވެ.
އަދި، އެ ގޮތަށް ހުށަހަޅާ ޕުރޮޕޯސަލްތަކުގައި ހުށަހަޅާ މޮޑެލްއާ އެއްގޮތަށް އެ ޕުރޮޖެކްޓު ހިންގުމުން އެޗްޑީސީއަށާއި އެ ހުށަހަޅާ ފަރާތަކަށް ވާނެ ފައިދާތައް ތަފްސީލުކޮށް ބަޔާންކޮށް ޕްރޮޕޯސަލް ހުށަހަޅަން ވަނީ ހުޅުވާލާފަ އެވެ./
އެ ކޯޕަރޭޝަނުން ބުނީ އެއް ފަރާތަށް ވުރެ ގިނަ ފަރާތްތަކުން އެ މަސައްކަތް ކުރުމަށް އެދި ހުށަހަޅައިފި ނަމަ، މަސައްކަތް ހަވާލު ކުރުމުގައި އިސްކަން ދޭނީ އެޗްޑީސީގެ މާސްޓާޕުލޭނާއި އެ ތަން ތަރައްގީ ކުރުމުގައި އެ ކޯޕަރޭޝަނުން ގެންގުޅޭ ވިސްނުމާ އެންމެ އެއްގޮތް މޮޑެލްއެއް ހުށަހަޅާ ފަރާތަކަށް ކަމަށެވެ.
އޭގެއިތުރުން ހުށަހަޅާ ހުށަހެޅުންތައް އިވެލުއޭޓު ކުރުމުގައި އެ ހުށަހަޅާ ފަރާތުގެ އަމަލީ ތަޖުރިބާއާއި، މާލީ ގާބިލިއްޔަތުކަމާއި، ފަންނީ ފެންވަރާއި، މަސައްކަތް ކުރުމުގެ ގާބިލުކަން ހުރި މިންވަރު ވެސް ބަލާނެ ކަމަށް އެ ކޯޕަރޭޝަނުން ކުރި އިއުލާނުގައި ބުންޏެވެ.
އެސްޖެހިގެ ތަރައްގީކޮށް ހިންގުމަށް ޝައުގުވެރިވާ ފަރާތްތަކުން އެޗްޑީސީގެ އިންވެސްޓުމަންޓު ގައިޑްލައިންއާ އެއްގޮތަށް ފުރިހަމަކޮށްފައިވާ އެކްސްޕުރެޝަން އޮފް އިންޓަރެސްޓު (އީއޯއައި) އެޕްލިކޭޝަން ފޯމު މި މަހުގެ 23، ވަނަ ދުވަހުގެ މެންދުރު 2:00 ގެ ކުރިން ހުށަހަޅަން ޖެހެ އެވެ.
ނަވާރަ ވަނަ ގަރުނުގެ މެދުތެރޭގައި ބިނާކުރި އެސްޖެހިގެ ނުވަތަ ކުރީގެ ނަމުންނަމަ އެސްޖެހި ގަނޑުވަރަކީ މާލޭގައި ހުރި އެންމެ ދުވަސްވީ އަދި އެންމެ ތާރީހީ ތަންތަނުގެ ތެރޭގައި ހިމެނޭ ތަނެކެވެ. ރާއްޖެއަށް އެކިފަހަރު މަތީން އުރުނު ނައުފަހަރުތަކުގެ ލަކުޑިއާއި އެކަމަށް ހާއްސަކޮށް ބޭރުން ގެނައި ލަކުޑިން ބިނާކުރެވުނު އެތަނުގެ އޮނިގަނޑު އެޗްޑީސީން ގަތީ 2017، ވަނަ އަހަރު އެވެ. ހުޅުމާލޭ ދެވަނަ ފިޔަވަހި ހިއްކައި، ފަރުކޮޅުފުށީގައި އެސްޖެހިގެ ބެހެއްޓުމުގެ މަސައްކަތް އެ ކޯޕަރޭޝަނުން ފެށީ މިއަހަރު ކުރީކޮޅެވެ.
