ޔޫކްރެއިން ހަނގުރާމަ ހުއްޓުވުމަށް ޗައިނާއިން ރަޝިއާއަށް ޕްރެޝަރު ކުރުމަށް ޖަރުމަނުގެ ޗާންސެލަރު އޯލާފް ޝޯލްޒް އެދިވަޑައިގެންފި އެވެ.
އެގޮތަށް އެދިވަޑައިގެންނެވީ ބެއިޖިންއަށް ކުރައްވަމުންދާ ދަތުރުގެ ތެރެއިން ޗައިނާގެ ރައީސް ޝީ ޖިންޕިންއާ ބައްދަލުކުރެއްވުމަށް ފަހު އެވެ.
ޝޯލްޒް ވިދާޅުވީ ރަޝިއާއިން ދެމުންދާ ނިޔުކްލިއާ އިންޒާރުތަކަކީ "ޒިންމާދާރުކަން ކުޑަ އަދި އިންތިހާއަށް ނުރައްކާތެރި" ވާހަކަތަކެއްގެ ގޮތުގައި ދެ ގައުމުން ވެސް ދެކޭ ކަމަށެވެ.
ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށީ ފެބްރުއަރީ މަހު އެވެ. މިއަދާ ހަމައަށް ވެސް ޗައިނާއިން އެކަން ކުށްވެރިކޮށްފައެއް ނުވެ އެވެ.
ޝޯލްޒްއާ ބައްދަލުކުރެއްވުމަށް ފަހު ވެސް ރަޝިއާގެ ރައީސް ލެޑިމިއަ ޕުޓިންގެ ނިންމެވުން ކުށްވެރި ކުރަން ޝީ ބޭނުންވެވަޑައިނުގެންނެވި އެވެ.
އެހެން ނަމަވެސް ޝީ ވިދާޅުވީ ސުލްހަވެރިކަމާ އެކު މައްސަލަ ހައްލު ކުރަން ބައިނަލްއަގްވާމީ މުޖުތަމައިން މަސައްކަތް ކުރަން ޖެހޭ ކަމަށާއި ނިޔުކްލިއާ ހަތިޔާރު ބޭނުން ކުރުމާއި ބޭނުން ކުރާނެ ކަމުގެ އިންޒާރު ދިނުމާ ޗައިނާއިން ދެކޮޅު ކަމަށެވެ.
ޖަރުމަނުގެ ޗާންސެލަރު ޗައިނާއަށް ކުރައްވާ ދަތުރާ ގުޅިގެން ޔޫރަޕުގެ ގައުމުތަކުން ކަންބޮޑުވެ އެވެ. ޝޯލްޒްއަކީ ކޮވިޑް ބަލިމަޑުކަމަށް ފަހު ޗައިނާއަށް ވަޑައިގެންނެވި ހުޅަނގުގެ ފުރަތަމަ ލީޑަރެވެ.
