އިރާނުން ސައުދީ އަރަބިއްޔާއަށް ހަމަލާ ދޭން އުޅޭ ކަމަށް ބުނެ ފެތުރޭ ހަބަރަކީ އެއްވެސް ހަގީގަތެއް ނެތް ދޮގެއް ކަމަށް އިރާނުން ބުނެފި އެވެ.
އެމެރިކާގެ ވޯލް ސްޓްރީޓް ޖާނަލް ނޫހުން ބުނީ އިރާނުން ހަމަލާ ދޭން އުޅޭ ކަމަށް ބުނެ، ސައުދީ އަރަބިއްޔާއިން އެމެރިކާއާ ޖާސޫސީ މައުލޫމާތު ފޯރުކޮށްދީފައިވާ ކަމަށެވެ.
"ބައެއް ހުޅަނގުގެ އަދި ޒަޔޮނިސްޓް ފަރާތްތަކުނެ ވަކި އަތަކަށް ޖެހިގެން ނެރޭ މިފަދަ ހަބަރުތަކުގެ ބޭނުމަަކީ އިރާނާ މެދު ނޭދެވޭ ވިސްނުން ފަތުރައި، މި ސަރަހައްދުގައި ހަމަނުޖެހުން އުފެއްދުން،" އިރާން ފޮރިން މިނިސްޓްރީގެ ތަރުޖަމާނު ނާސިރު ކަނާނީ ވިދާޅުވި އެވެ.
އަންގާރަ ދުވަހު ވޯލް ސްޓްރީޓް ޖާނަލް ނޫހުން ބުނީ ސައުދީ އަރަބިއްޔާއިން އެމެރިކާއަށް ފޯރުކޮށްދިން ޖާސޫސީ މައުލޫމާތުގައިވާ ގޮތުން އިރާނުގެ ހަމަލާއެއް އައުން ވަރަށް ގާތެވެ.
އެހެންވެ، ސައުދީ އަރަބިއްޔާ އާއި އެމެރިކާ އަދި މެދުއިރުމަތީގެ އެހެން ގައުމުތަކުގެ ސިފައިންގެ އެލާޓް ލެވެލް މަތިކޮށްފައިވާ ކަމަށް ވެސް އެ ނޫހުން ބުންޏެވެ.
އެމެރިކާއިން އަންގާރަ ދުވަހު ކަންބޮޑުވުން ފާޅުކޮށް ބުނީ އިރާނުން ހަމަލާއެއް ދީފި ނަމަ ރައްދުގައި ފިޔަވަޅު އަޅަން ފަސް ނުޖެހޭނެ ކަމަށެވެ.
އިރާނުގެ ރިވޮލިއުޝަނަރީ ގާޑުގެ ކޮމާންޑަރު ހުސެން ސަލާމީ މިދިޔަ މަހު ސައުދީ އަރަބިއްޔާއަށް ނުސީދާކޮށް އިންޒާރު ދެއްވި އެވެ. އޭނާ ވިދާޅުވީ ސައުދީ ވެރިން އިޒްރޭލަށް ބަރޯސާވުން ހުއްޓަަން ޖެހޭ ކަމަށާއި ސައުދީ ވެރިން އުޅެނީ "ބިއްލޫރި ގަނޑުވަަރުތަކެއްގައި" ކަމަށެވެ.
