ރާއްޖޭގައި އެންމެ ފުޅާ ދާއިރާއެއްގައި ސިނާއީ މަސައްކަތް ކުރާ ކުންފުނި، އެމްޓީސީސީއަށް މި ކުއާޓަރުގައި ލިބުނު ފައިދާ މި އަހަރުގެ ކުރީ ދެ ކުއާޓަރުގައި ލިބުނު ފައިދާއަށް ވުރެ ދަށްވެއްޖެ އެވެ.
އެ ކުންފުނިން އާއްމު ކޮށްފައިވާ ތަފާސް ހިސާބުތަކަށް ބަލާއިރު، މިއަހަރުގެ ފުރަތަމަ ދެ ކުއާޓަރުގައި އެ ކުންފުންޏަށް ސާފު ފައިދާގެ ގޮތުގައި ޖުމްލަ 130 މިލިއަން ރުފިޔާ ލިބުނެވެ. އެއީ ފުރަތަމަ ކުއާޓަރުގައި 64 މިލިއަން ރުފިޔާ އަދި ދެވަނަ ކުއާޓަރުގައި 66 މިލިއަން ރުފިޔާ އެވެ.
ނަމަވެސް، ތިންވަނަ ކުއާޓަރުގައި އެ ކުންފުންޏަށް ފައިދާގެ ގޮތުގައި ލިބިފައިވަނީ 40 މިލިއަން ރުފިޔާ އެވެ. މިއީ މިދިޔަ ކުއާޓަރާއި އަޅާ ބަލާއިރު 24 މިލިއަން ރުފިޔާގެ ވެއްޓުމެކެވެ.
އެހެންނަމަވެސް އެ ކުންފުންޏަށް އާމްދަނީގެ ގޮތުގައި މި ކުއާޓަރުގައި ވެސް 153 މިލިއަން ރުފިޔާ ލިބުނެވެ. އެއީ މިދިޔަ ކުއާޓަރުގައި ވެސް އެކުންފުންޏަށް އާމްދަނީގެ ގޮތުގައި ލިބުނު މިންވަރެވެ.
މި ކުއާޓަރުގައި ވެސް އެ ކުންފުންޏަށް އެންމެ ބޮޑު އާމްދަނީއެއް ލިބިފައިވަނީ ކޮންޓްރެކްޓިންއާއި ޓްރޭޑިންގެ އިތުރުން ޑުރެޖިން އިންނެވެ. އަދި އެންމެ ކުޑަކޮށް އެ ކުންފުންޏަށް އާމްދަނީ ލިބިފައި ވަނީ ދަތުރުފަތުރު ކުރުމުގެ ދާއިރާއިންނެވެ. އެގޮތުން ކޮންޓްރެކްޓިން އިން އެ ކުންފުންޏަށް 19 މިލިއަން ރުފިޔާ ލިބިފައި ވާއިރު، ދަތުރުފަރު ކުރުމުގެ ދާއިރާއިން ލިބިފައިވަނީ 3.2 މިލިއަން ރުފިޔާ އެވެ. މިއީ މިދިޔަ ދެ ކުއާޓަރާ އަޅާ ބަލާއިރު ވެސް ދަތުރުފަތުރު ކުރުމުގެ ދާއިރާއިން އެންމެ ފައިދާ ބޮޑުވި ފަހަރެވެ.
ޖުމްލަ 300 މިލިއަން ރުފިޔާގެ ފައިދާއެއް މިއަހަރު ހޯދުމަށް އެކުންފުނިން އަމާޒު ހިފާފައިވާއިރު، މި ނިމުނު ކުއާޓަރާ އެކު މިހާތަނަށް އެ ކުންފުންޏަށް ފައިދާގެ ގޮތުގައި ލިބުނު ޖުމްލަ ވަނީ 170 މިލިއަނަށް އަރާފަ އެވެ.
މިއީ މިދިޔަ އަހަރުގެ މިހާ ހިސާބަށް ބަލާއިރު 9.6 މިލިއަން ރުފިޔާ މަދު އަދަދެކެވެ. މިދިޔަ އަހަރަކީ އެ އެމްޓީސީސީގެ ތާރީހުގައި އެންމެ ބޮޑު ފައިދާއެއް އެ ކުންފުންޏަށް ލިބުނު އަހަރެވެ. މިދިޔަ އަހަރު އެ ކުންފުންޏަށް ސާފު ފައިދާގެ ގޮތުގައި ޖުމްލަ 271 މިލިއަން ރުފިޔާ ލިބުނެވެ.
