ޓްރާންސްޕޯޓް މިނިސްޓްރީގެ ކޮރަޕްޝަން މައްސަލަތަކެއްގެ ވާހަކަ ފެންމަތިވެފައި އޮއްވައި، އެތަނުގެ ޑެޕިއުޓީ މިނިސްޓަރު ޝިމާޒް އަލީ މަގާމުން ވަކިކޮށްދެއްވުމަށް ރައީސުލްޖުމްހޫރިއްޔާގެ އޮފީހުގައި މިނިސްޓަރު އައިޝަތު ނަހުލާ އެދިވަޑައިގެންފައިވާ ކަމަށް ބައެއް މީޑިއާތަކުގައި ރިޕޯޓުކޮށްފައިވީ ނަމަވެސް ސިޓީގައި އެފަދަ ކަމަށް އެދިފައިނުވާނެ ކަމަށް މިނިސްޓަރު މިއަދު ވިދާޅުވެއްޖެ އެވެ.
ކުރު ފޯނު އިންޓަވިއުއެއްގައި ނަހުލާ މި ނޫހަށް ވިދާޅުވީ، ޓްރާންސްޕޯޓް މިނިސްޓްރީގެ ކޮރަޕްޝަންގެ މައްސަލަތަކެއްގެ ތުހުމަތު މުވައްޒަފަކަށް އަމާޒުވުމުން އެ މައްސަލަ ބަލައިދިނުމަށް އެދުމުގެ އިތުރުން، މީހަކު މަގާމުން ވަކި ކުރުމަށް އެދިވަޑައިގެންފައިނުވާނެ ކަމަށެވެ.
"އެފަދަ ތުހުމަތެއް ކުރެވިއްޖެއްޔާ އަޅުގަނޑަށް މަޖުބޫރުވާނެ އެ މައްސަލައެއް ބަލަން. އެ މައްސަލައެއް އަންގަންޖެހޭ ފަރާތްތަކަށް އެންގުމަކީ އަޅުގަނޑު ކުރަންޖެހޭ ކަމެއް. އެކަމަކު އެއްވެސް މީހަކު ވަކިކޮށްދިނުމަށް އަޅުގަނޑު އެދިފައެއް ނޯންނާނެ،" ނަހުލާ ވިދާޅުވި އެވެ.
ބައެއް މީޑިއާތަކުގައި އިއްޔެ ބުނެފައި އޮތީ، ޝިމާޒް ވަކި ކުރުމަށް ނަހުލާ އެދިވަޑައިގެންނެވީ، ނުގަވާއިދުން ވެހިކަލްތަކެއް ރަޖިސްޓްރީ ކުރި މައްސަލައެއްގައި ކަމަށެވެ. މި މައްސަލަ ފެންމަތިވީ، ގަވާއިދާ ހިލާފަށް ރަޖިސްޓްރީކޮށްފައިވާ ވެހިކަލްތަކުގެ ހުއްދަ މިނިސްޓްރީން ބާތިލް ކުރަމުންދާ ދުވަސްވަރެއްގަ އެވެ.
ޝިމާޒްގެ އެއްވެސް މައްސަލައެއް ބަލައިދިނުމަށް އޮފީހުގެ ފަރާތުން އެދުނުކަން ނުވަތަ ނޫންކަން އޭނާއަށް ނޭނގޭ ކަމަށް މި ނޫހާ ވާހަކަ ދައްކަވަމުން ޝިމާޒް ވިދާޅުވި އެވެ. އަދި އޭނާގެ މައްސަލައެއް ބަލަމުންދާކަން މިހާތަނަށް އަންގާފައިނުވާ ކަމަށް ވެސް ޝިމާޒް ވިދާޅުވި އެވެ.
"އެއްވެސް މައްސަލައެއް އުޅޭކަމުގެ ވާހަކައެއް ވެސް އަޅުގަނޑު ކައިރި އޮފީހުން ނުބުނޭ. އެއްވެސް ތަނަކުން [އެހެން އިދާރާއަކުން] ވެސް އަޅުގަނޑުގެ މައްސަލައެއް ބަލާ ވާހަކަ ބުނެފައެއް ނުވޭ. މި ދިމާވެގެން އުޅޭ އެއްވެސް މައްސަލައެއް އަޅުގަނޑަކަށް ނޭނގޭ،" ޝިމާޒް ވިދާޅުވި އެވެ.
އެކަމާ ގުޅޭ ގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ތަރުޖަމާނު މިއުވާން މުހައްމަދު ވިދާޅުވީ މިނިސްޓަރުންނާއި ރައީސް ސޯލިހާ ދެމެދު ކުރައްވާ މުއާމަލާތްތައް ހާމަކުރެވެން ނެތް ކަމަށެވެ. ނަމަވެސް ޝިމާޒަށް އެއްވެސް ފިޔަވަޅެއް ނާޅާކަން މިއުވާން ޔަގީންކޮށްދެއްވި އެވެ.
"ޝިމާޒަށް އެއްވެސް ފިޔަވަޅެއް ނާޅާ. އޭނާއަކީ އަދި ވެސް ހަމަ ޑެޕިއުޓީ މިނިސްޓަރު، ހަމަ އެ މަގާމުގައި އެ ހުންނެވީ،" މިއުވާން ވިދާޅުވި އެވެ.
