ސްރީ ލަންކާއަށް ބޭނުންވާ ވަރަށް ތެޔޮ އިމްޕޯޓް ކުރުމަކީ އަދިވެސް ބޮޑު ގޮންޖެހުމެއް ކަމަށާއި ފައިސާ ދެއްކޭނެ ގޮތެއް ނެތް ކަމަށް ހަކަތައާ ބެހޭ މިނިސްޓަރު ކަންޗަނާ ވިޖެސޭކަރަ ވިދާޅުވެއްޖެ އެވެ.
ސްރީ ލަންކާއިން ދަނީ ތެލުގެ އިމްޕޯޓްތަކާ ގުޅިގެން ތެޔޮ އުފައްދާ ގައުމުތަކުގެ އެހީތެރިކަން ލިބޭތޯ މަސައްކަތް ކުރަމުންނެވެ. އެކަމަކު ތެލާ ގުޅޭ ގޮތުން މިހާތަނަށް އެއްބަސްވުމަކަށް ދެވުނީ އިންޑިއާއާ އެކު އެކަންޏެވެ.
"ކްރެޑިޓް ލައިނެއް ހޯދުން ނުވަތަ އަގު އަދާކުރުމުގައި ގެރެންޓީ ފޯރުކޮށްދިނުން ފަދަ ކަންކަން އަޅުގަނޑުމެންނަށް ވަރަށް އުނދަގޫ،" އަބޫ ދާބީގައި ބޭއްވި ތެލާ ބެހޭ ކޮންފެރެންސެއްގެ ތެރެއިން ވިޖެސޭކަރަ ވިދާޅުވި އެވެ
އޭނާ ވިދާޅުވީ ނޮވެމްބަރު މަހުގެ ފަހުކޮޅު ޗައިނާއިން ޑީސެލް ޝިޕްމަންޓެއް ލަަންކާއަށް ފޯރާނެ ކަމަށާއި އެ ޝިޕްމަންޓުން ކުރިއަށް އޮތް މަސްތަކަށް ހަކަތަ ޔަގީންވާނެ ކަމަށެވެ.
ތެލުގެ ސިނާއަތް ޕްރައިވެޓައިޒްކޮށް، ބޭރުގެ އިންވެސްޓަރުން ގެންނަން ބޭނުންވި ނަމަވެސް، އެކަމުގައި ވެސް ކުރިއެރުމެއް ނުލިބޭ ކަމަށް ވިޖެސޭކަރަ ވިދާޅުވި އެވެ.
ތެލުގެ ދަތިކަމާ ހެދި ލަންކާއިން ދާދި ފަހުން ވަނީ ތެޔޮ މެނޭޖްކުރާނެ ގޮތުގެ ޕްރޮގްރާމެއް ގައުމީ ފެންވަރުގައި ހިންގައި، 40 ޕަސެންޓުން ހަކަތަ ބޭނުންކުރާ ވަރު މަދުކޮށްފަ އެވެ.
އޭގެ އިތުރުން ފައިސާގެ ދަތިކަން ހައްލު ކުރުމަަށް އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ މާލީ އެހީ ހޯދުމުގެ މަސައްކަތް ވެސް ދަނީ ކުރިއަށެވެ.
"ރަޝިއާގެ ތެޔި އިމްޕޯޓް ކުރަން ވެސް މި ދަނީ ވިސްނަމުން. ތެޔޮ ލިބޭ ތަނެއް އަޅުގަނޑުމެންނަކަށް މުހިއްމެއް ނޫން، އަޅުގަނޑުމެންނަށް މުހިއްމީ އޭގެ އަގު،" ވިޖެސޭކަރަ ވިދާޅުވި އެވެ.
