ޖިންސީ ގޯނާގެ މައްސަލައަކާ ގުޅިގެން ގއ. ދާންދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް ލުއައްޔު އިބްރާހީމް ފަނޑިޔާރުކަމުގެ މަގާމުން ވަކިކުރަން ރައްޔިތުންގެ މަޖިލީހަށް ހުށަހަޅަން ނިންމައިފި އެވެ.
ޖުޑީޝަލް ސާވިސް ކޮމިޝަން, ޖޭއެސްސީން މިއަދު ބުނީ، ލުއައްޔުއާ ގުޅޭގޮތުން އެ ކޮމިޝަނަށް ހުށަހެޅި 22 މައްސަލައިގެ ތެރެއިން ދެ މައްސަލާގައި ފަނޑިޔާރުންގެ ސުލޫކާ ހިލާފުވެފައިވާކަން ސާބިތުވެފައިވާ ކަމަށެވެ. އެ ދެ މައްސަލައަކީ ޖިންސީ ގޯނާގެ މައްސަލައަކާއި، ވިޔަފާރީގެ މައްސަލައެކެވެ.
އޭނާ ގއ. ދާންދޫ މެޖިސްޓްރޭޓް ކޯޓުގައި ވަޒީފާ އަދާކުރި މުވައްޒަފަކާ މެދު ޖިންސީ ގޯނާގެ އަމަލެއް ހިންގާފައިވާކަން ސާބިތުވެފައިވާ ކަމަށް ޖޭއެސްސީން ބުނެ އެވެ. އަދި ކޯޓުގެ ރަސްމީ ގަޑީގަ އާއި އެ ނޫން ވެސް ވަގުތުތަކުގައި ލުއައްޔު ވިޔަފާރީގައި އަމަލީ ގޮތުން ހަރަކާތްތެރިވެފައިވާ ކަމަށާއި އެ މައްސަލާގައި ހިމެނޭ ހެކިންނަށް ނުފޫޒު ފޯރުވަން މަސައްކަތް ކުރިކަން ވެސް, ސާބިތުވެފައިވާ ކަމަށް ޖޭއެސްސީން ބުނެ އެވެ.
ޖޭއެސްސީން ބުނީ ލުއައްޔުގެ މައްޗަށް ސާބިތުވި ކަންކަމަކީ ފަނޑިޔާރުންގެ ގާނޫނުގެ 32 މާއްދާގެ (ހ)ގެ (8) ވަނަ ނަންބަރާއި (9) ވަނަ ނަންބަރާއި، ފަނޑިޔާރުންގެ ސުލޫކީ މިންގަނޑުގެ 1.8 ވަނަ ނަންބަރާއި، 6.1 ވަނަ ނަންބަރާއި، 3.2 ވަނަ ނަންބަރާއި، 4.1 ވަނަ ނަންބަރާއި ހިލާފު އަމަލުތަކެއް ކަމަށެވެ.
އެހެންކަމުން، ޖޭއެސްސީގެ ގާނޫނުގެ ދަށުން އޭނާ ފަނޑިޔާރުކަމުގެ މަގާމުން ވަކި ކުރަން މަޖިލީހަށް ހުށަހަޅަން ޖޭއެސްސީން ވަނީ ނިންމާފަ އެވެ.
