ކޮލޮމްބޯ، ސްރީލަންކާ (އޮކްޓޯބަރު 31) - ފާއިތުވި 12 މަހުގެ ތެރޭގައި ފުރަތަމަ ފަހަރަށް ސްރީލަންކާގެ އިންފްލޭޝަން ވެއްޓުނު ނަމަވެސް، އަދިވެސް ތަކެތީގެ އަގުތައް އުޅެނީ މީގެ އަހަރެއް ކުރިއާ އަޅާ ބަލާއިރު 66 ޕަސެންޓު މަތީގައި ކަމަށް ރަސްމީ ތަފާސްހިސާބުތަކުން ދައްކައިފި އެވެ.
ޑިޕާޓްމަންޓް އޮފް ސެންސަސް އެންޑް ސްޓެޓިސްޓިކްސްގެ ތަފާސްހިސާބުން ދެއްކި ގޮތުގައި އޮކްޓޯބަރު މަހު އިންފްލޭޝަން އުޅެނީ ސެޕްޓެމްބަރު މަހާ އަޅާ ބަލާއިރު، ހަތަރެއް ޕަސެންޓު ދަށުގަ އެވެ. ސެޕްޓެމްބަރު މަހުގެ އިންފްލޭޝަން ރޭޓަކީ 69.8 ޕަސެންޓެވެ.
ސެޕްޓެމްބަރު މަހު ކާބޯތަކެތީގެ އިންފްލޭޝަން 94.9 ޕަސެންޓުގައި ހުރި އިރު، އޮކްޓޯބަރު މަހު 85.6 ޕަސެންޓަށް ވެއްޓުނެވެ.
އިންފްލޭޝަަން ވެއްޓުނު ސަބަބެއް އެ ޑިޕާޓްމަަންޓުގެ ތަފާސްހިސާބުން ސާފެއް ނުވެ އެވެ. އެހެން ނަމަވެސް އިދާރާތަކުން ވަނީ އޮކްޓޯބަރު މަހުގެ ތެރޭގައި ދެ ފަހަރެއްގެ މަތިން ތެލުގެ އަގު ކުޑަކޮށް، 20 ޕަސެންޓުން އަގު ތިރިކޮށްފަ އެވެ.
އެކަމަކު ޕެޓްރޯލްގެ އަގު އަދިވެސް އުޅެނީ މި އަހަރުގެ ކުރީކޮޅާ އަޅާ ބަލާއިރު، ދެ ގުނަ ބޮޑުކޮށެވެ. އަދި ޑީސެލްގެ އަގު ތިން ގުނަ ބޮޑެވެ.
ކާބޯތަކެއްޗާއި ތެލުގެ އަގު ބޮޑުތަނުން އުފުލުމުން، ޑިމާންޑު ވެއްޓުނެވެ. އެހެންވެ، ޕެޓްރޯލާއި ޑީސެލް އަދި ގޭސް ގަންނަން ހަދާ ކިޔުތައް ވެސް ފަހަކަށް އައިސް ކުރުވި އެވެ.
ވޯލްޑް ބޭންކުން އިންޒާރުދޭ ގޮތުގައި މި އަހަރު ސްރީލަންކާގެ އިގްތިސާރު 9.2 ޕަސެންޓުން ކުޑަވާނެ ކަމަށް ބެލެވެ އެވެ.
