ކޮކްސަޒް ބާޒާރު، ބަންގްލަދޭޝް (އޮކްޓޯބަރު 30) - ބަންގްލަދޭޝްގެ ރޮހިންޔާ ކޮމިއުނިޓީގެ ވެރިންނަށް އަމާޒުކޮށް ހަމަލާދިނުން އިތުރުވެފައި ވާތީ، ރެފިއުޖީ ކޭމްޕުތަކުގައި ފުލުހުންގެ ހާއްސަ އޮޕަރޭޝަނެއް ފަށައިފި އެވެ.
ފުލުހުންގެ ހާއްސަ އާމްޑް ޕޮލިސް ބެޓޭލިއަން ޔުނިޓުން، އިތުރު ސެކިއުރިޓީއާ އެކު 34 ރެފިއުޖީ ކޭމްޕެއްގައި އޮޕަރޭޝަން ހިންގަމުންދާ ކަމަށް ރިޕޯޓުތައް ބުނެ އެވެ. އެ ކޭމްޕުތަކުގައި މިލިއަނެއްހާ ރޮހިންޔާ މީހުން ދިރިއުޅެ އެވެ.
ހުކުރު ދުވަހު ފެށި އޮޕަރޭޝަނުގައި މިހާތަނަށް 56 މީހުން ހައްޔަރުކޮށްފައިވެ އެވެ.
މިޔަންމާގެ ސިފައިން ހިންގި ގަތުލުއާއްމުން ސަލާމަތްވުމަށް 2017 ވަނަ އަހަރު 740،000 ރޮހިންޔާ ދަރިކޮޅުގެ މީހުން ބަންގްލަދޭޝަށް ހިޖުރަކުރި އެވެ. އޭރު ވެސް ބަންގްލަދޭޝްގެ ކޭމްޕުތަަކުގައި 200،000 ރޮހިންޔާ މީހުން ތިއްބެވެ.
ފުލުހުން ބުނީ ކޭމްޕުތަކުގެ ސެކިއުރިޓީ ފަހަކަށް އައިސް ގޯސްވެފައިވާ ކަމަށާއި އެކި ހަމަލާތަކުގައި 15 މީހުން މަރުވެފައިވާ ކަމަށެވެ. އޭގެ ތެރޭގައި ގިނައިން ހިމެނެނީ ރެފިއުޖީ ކޭމްޕުތަކުގެ ވެރިންނެވެ.
"އޮޕަރޭޝަން ރޫޓް އައުޓް"ގެ ނަމުގައި ހުކުރު ދުވަހު ފެށި އޮޕަރޭޝަނުގައި 56 މީހުން ހައްޔަރުކޮށްފައިވާ އިރު، އޭގެ ތެރެއިން 24 މީހުންނަކީ ހަތް މަރެއްގެ ތުހުމަތު ކުރެވޭ މީހުންނެވެ.
"އެއީ ޓެރަރިސްޓުން. ކޭމްޕުތަކުގެ ސުލްހަ އާއި ސަލާމަތަށް ހުރަސް އަޅާ ޓެރަރިސްޓުން ނައްތާލުމުގެ މަސައްކަތް އަޅުގަނޑުމެން ކުރާނަން،" ފުލުހުންގެ ތަރުޖަމާނު ފާރޫކް އަހްމަދު ވިދާޅުވި އެވެ.
