ދިއްލީ އެއާޕޯޓުން ފުރަން ތައްޔާރުވި އިންޑިގޯ އެއާލައިންގެ ބޯޓެއްގެ އިންޖީނުގައި އަލިފާން ރޯވި މައްސަަލަ އިންޑިއާގެ އޭވިއޭޝަން ރެގިއުލޭޓަރީ އިދާރާއިން ބަލަން ފަށައިފި އެވެ.
ނިއު ދިއްލީއިން ބެންގަލޫރަށް 184 މީހުންނާ އެކު ދަަތުރު ކުރުމަށް ހަމަޖެހިފައި އޮތް ބޯޓުގެ އިންޖީނުގައި ރޯވީ ރަންވޭއިން ނައްޓާލުމަށް މަސައްކަތް ފެށުމާ އެކު އެވެ.
އަލިފާންގަނޑު ފެނުމާ އެކު ޕައިލެޓު ވަނީ ރަންވޭއިން ބޯޓު ބާލައި، ހުރިހާ އެންމެން އިވެކުއޭޓްކޮށްފަ އެވެ. އެ ހާދިސާގައި އެއްވެސް މީހަކަށް އަނިޔާއެއް ނުވެ އެވެ.
"އެންމެ ބޮޑު އިސްކަމެއް ދޭނީ މި ހާދިސާގެ ތަފްސީލް ތަހުގީގެއްކޮށް، އިންޖީނުގައި ރޯވި ސަބަބު ޔަގީން ކުރަން،" ސިވިލް އޭވިއޭޝަންގެ ޑިރެކްޓަރޭޓް ޖެނެރަލް އަރުން ކުމާރް ނޫސްވެރިންނަށް ވިދާޅުވި އެވެ.
"ނަސީބަކުން އަލިފާންގަނޑު ވަރަށް އަވަހަށް ނިވާލެވުނު. މިހާރު އެ ބޯޓު އޮތީ ގްރައުންޑްކޮށްފައި."
ބޯޓުގައި ތިބި ޕަސެންޖަރުން އިންޑިއާގެ ނޫސްތަކަށް ބުނީ އަލިފާންގަނޑު ފެނުމުގެ ކުރިން އެއްޗެއް ގޮވި އަޑު އިވުނު ކަމަށެވެ. އިންޑިގޯއިން ބުނީ ބޯޓަަށް ދިމާވީ ޓެކްނިކަލް މައްސަލައެއް ކަމަށެވެ.
ޕަސެންޖަަރުންނަށް އެހެން ފްލައިޓެއްގައި ދަތުރު ކުރެވޭނެ އިންތިޒާމް އިންޑިގޯއިން ހަމަޖައްސައިދިނެވެ. އިންޑިގޯއަކީ އިންޑިއާގެ އެންމެ ބޮޑު ޕްރައިވެޓް ބަޖެޓު އެއާލައިނެވެ.
އިންޑިއާގެ އެތެރޭގެ އުދުހުންތަކުގެ 60 ޕަސެންޓު ކޮންޓްރޯލް ކުރަނީ އިންޑިގޯއިންނެވެ. މި އަހަރުގެ ތެރޭގައި އެކަނިވެސް ވައިގެ ދަތުރުފަތުރުގެ ރައްކާތެރިކަމާ ހިލާފަށް އަމަލު ކުރި ގިނަ މައްސަލަތަކެއް އިންޑިއާގައި ފެންމަތިވި އެވެ.
އެގޮތުން އިންޑިއާގެ ދެ ވަނައަށް އެންމެ ބޮޑު އެއާލައިން ސްޕައިސްޖެޓުގެ ބޮޑެތި މައްސަލަތަކެއް ފާހަގަވި އެވެ. މިދިޔަ މޭ މަހު މުމްބާއީއިން ފުރި ސްޕައިސްޖެޓުގެ ބޯޓެއް ޓާބިއުލަންސްގައި ޖެހި 17 މީހުންނަށް އަނިޔާވި އެވެ.
އޭގެ ފަހުން ޖުލައި މަހު ޑުބާއީއަށް ދަތުރު ކުރި ބޯޓެއްގެ ކޮކްޕިޓުގެ ބޮތްކަކަށް މައްސަލަ ދިމާވެ، އެމެޖެންސީކޮށް ޕާކިސްތާނުގައި މަޑުކުރަން ޖެހުނެވެ.
މިދިޔަ މަހު އޮމާންގެ މަސްކަޓް އެއާޕޯޓުން ފުރަން އުޅުނު އެއާ އިންޑިއާާ އެކްސްޕްރެސް ބޯޓެއްގެ އިންޖީނުގައި ރޯވެ ބަޔަކަށް އަނިޔާވި އެވެ.
