ބީއެމްލްއާއި މޯލްޑިވްސް މީޑިއާ ކައުންސިލް ގުޅިގެން ވިޔަފާރިއާއި އިގްތިސާދީ ރޮނގުން ނޫސްވެރިން ތަމްރީނު ކުރުމުގެ ވޯކްޝޮޕެއް ހިންގުމަށް ނިންމައިފި އެވެ.
މިއަންނަ މަހުގެ 19 ވަނަ ދުވަހު މެންހެޓަން ބިޒްނަސް ހޮޓެލުގައި ކުރިއަށް ގެންދިއުމަށް ހަމަޖެހިފައިވާ މި ވާކްޝޮޕު ހިންގައި ދެއްވާނީ ބީއެމްއެލްގެ ފަންނީ މާހިރުންނެވެ. އޭގެ ތެރޭގައި ޗާޓަޑް ބޭންކަރުން ވެސް ހިމެނެ އެވެ.
ދިވެހިރާއްޖޭގެ މީޑިއާތަކަށް ހުޅުވާލައިގެން ބާއްވާ މި ވޯކްޝޮޕުގައި ފައިނޭންޝަލް ރިޕޯޓުތަކާ ބެހޭ ގޮތުންނާއި އެންޓި މަނީ ލޯންޑަރިން އާއި ޓެރަރިޒަމް ފައިނޭންސިންއާ ގުޅޭ ގަވާއިދާއި އުސޫލުތަކުގެ އިތުރުން މަކަރާ ހީލަތުން ފައިސާ ހޯދާ އެކިއެކި ގޮތްތަކާ ބެހޭ ގޮތުން ކިޔަވައި ދޭނެ އެވެ.
އަދި އޭގެ އިތުރުން ވެސް އެ ދާއިރާއާ ގުޅޭ ތަފާތު އެކި މައުލޫމާތުތައް މި ވޯކްޝޮޕުގެ ބައިވެރިންނަށް ހިއްސާކުރާނެ އެވެ.
ޓެކްނޮލޮޖީއަށް އައި ކުރިއެރުމާ އެކު މަކަރާ ހީލަތުން ފައިސާ ހޯދުމާއި މަނީ ލޯންޑަރިން ފަދަ ބޮޑެތި ކުށްތައް މުޖުތަމައުގައި މިހާރު އާންމުވެފައި ވާއިރު، މުޖުތަމައުގެ ހޭލުންތެރިކަން އިތުރުކޮށް މިފަދަ ކަންކަމުން އާއްމުންނަށް ލިބޭ ގެއްލުން ކުޑަ ކުރުމަކީ މީޑިއާގެ އެންމެ އިސް އެއް ވާޖިބެވެ.
މިފަދަ ވޯކްޝޮޕެއް ހިންގުމަކީ މީޑިއާތަކުގައި މަސައްކަތް ކުރާ ނޫސްވެރިންނަށް އެކަމުގައި ބޮޑު އެހީތެރިކަމެއް ލިބިގެންދާނެ ކަމެއް ކަމުގައި ބީއެމްއެލްއިން ބުނެ އެވެ.
