އިންޑޮނީޝިއާގެ ޖަމްބީ ޕްރޮވިންސްގައި ޕައިތަން ހަރުފައެއް އަންހެނަކު މަރާލައި، އޭނާ ހުރި ގޮތަށް ދިރުވާލައިފި އެވެ.
ރިޕޯޓުތައް ބުނާ ގޮތުން ރަބަރު ގަސް ދަނޑުގައި މަސައްކަތް ކުރާ އުމުރުން 50 ގެ އަހަަރުތައް ގުނަމުންދާ ޖަހްރާ ނަމަކަށް ކިޔާ މީހާ އެންމެ ފަހުން ފެނުނީ އެ ދަނޑުން އާދީއްތަ ދުވަހު އެވެ.
އެ ރޭ އެނބުރި ގެޔަށް ނައުމުން، އޭނާ ގެއްލިގެން ރިޕޯޓުކުރި އެވެ. އޭނާ ހޯދަން ނިކުތް ޓީމުތަކަށް ފެނުނީ ބަނޑު ވަރަށް ބޮޑަށް ފުފިފައި އޮތް ޕައިތަން ހަރުފަ އެކެވެ.
އެ ހަރުފައިގެ ބަނޑު ފަޅާލައި ބެލި އިރު، އަންހެން މީހާގެ ހަށިގަނޑު ފެނުނެވެ. އެއީ 16 ފޫޓު ދިގު ހަރުފައެއް ކަމަށް ރިޕޯޓުތައް ބުނެ އެވެ.
އިންސާނުން ހުރި ގޮތަށް ދިރުވާލުމަކީ ވަރަށް މަދުން ނޫނީ ޕައިތަން ހަރުފަ ނުކުރާ ކަމެކެވެ. އެކަމަކު މީގެ ކުރިން ވެސް އިންޑޮނީޝިއާގައި އެގޮތަށް ދިމާވެފައި އެބަ ހުއްޓެވެ.
ޕައިތަންއަކީ އާއްމު ގޮތެއްގައި އޭތި ޝިކާރަކުރާ ޖަނަވާރު ހުރި ގޮތަށް ދިރުވާލާ ހަރުފަ އެކެވެ. އެކަމަކު އާއްމުކޮށް އޭތި ކައި އުޅެނީ މީދަލެވެ.
އެހެން ނަމަވެސް ތަޖުރިބާކާރުން ބުނާ ގޮތުގައި ވަކި ވަރަކަަށް ވުރެ ހަރުފަ ބޮޑުވުމުން މީދާ ކެއުން ހުއްޓާލައި، އެއަށްވުރެ ބޮޑެތި ޖަނަވާރު ޝިކާރަ ކުރަން ފަށަ އެވެ.
