ކޮވިޑް ފެތުރުން ކޮންޓްރޯލް ކުރަން އަޅާފައިވާ ފިޔަވަޅުތަކާ ހެދި ޗައިނާގެ ބެއިޖިންގައި ހުންނަ ޔުނިވާސަލް ރިސޯޓް ތީމް ޕާކް ވަގުތީ ގޮތުން ބަންދުކޮށްފި އެވެ.
ހަރުކަށި ފިޔަވަޅުތައް އަޅާފައި ހުރި ނަމަވެސް، ބެއިޖިންގެ ކޮވިޑް ކޭސްތައް ދަނީ އުފުލެމުންނެވެ. ޗައިނާގެ ވެރިރަށުގައި 21 މިލިއަން މީހުން ދިރިއުޅޭ އިރު، އަންގާރަ ދުވަހު 20 ކޭސް ރިޕޯޓު ކުރި އެވެ.
ޗައިނާއިން ގެންގުޅޭ ޒީރޯ ކޮވިޑް ސިޔާސަތާ ހެދި ބޮޑެތި ސަރަހަައްދުތައް ލޮކްޑައުން ކުރަމުން ދާތީ، އެކި ސިނާއަތްތަކަށް ވަނީ އަަސަރުކޮށްފަ އެވެ.
އެމެރިކާގެ ކޮމްކާސްޓް ކުންފުނީގެ ހިއްސާ އޮންނަ ޔުނިވާސަަލް ރިސޯޓް ތީމް ޕާކް ބަންދުކުރި އިރު، އަލުން އެތަން ހުޅުވާނެ ތާރީހެއް ނުބުނެ އެވެ.
އެހެން ނަމަވެސް، އެޑްވާންސްކޮށް ނަގައިފައިވާ ޓިކެޓުތަކަށް ރީފަންޑުކޮށް ނުވަތަ ރީޝެޑިއުލްކޮށްދޭނެ ކަމަށް ބުންޏެވެ. ވީ އެންމެ އަވަހަކަށް ރިސޯޓް އަލުން ހުޅުވޭތޯ ބަަލާނެ ކަމަށް ވެސް ބުންޏެވެ.
ވަގުތީ ގޮތުން ރިސޯޓް ބަންދުކުރި ކަމަށް އިއުލާން ކުރުމާ އެކު ޗައިނާގެ ސޯޝަލް މީޑިއާ ވެއިބޯގައި ބައެއް މީހުން ހިތްހަމަނުޖެހުން ފާޅުކުރި އެވެ.
ކުރިން އެންގުމަކާ ނުލައި ކުއްލިއަކަށް އެގޮތަށް ނިންމުމުން، ޓިކެޓު ގަނެ މަސައްކަތުން ޗުއްޓީ ނެގި މީހުންނަށް ގެއްލުންވާ ކަމަށް ބައެއް ފަރާތްތަކުން ބުންޏެވެ.
ބެއިޖިންގައި ޔުނިވާސަލް ރިސޯޓް ތީމް ޕާކް ހުޅުވީ ސެޕްޓެމްބަރު 2021 ގަ އެވެ. މިއީ މި އަަހަރުގެ ތެރޭގައި އެ ރިސޯޓް ބަންދުކުރި ދެ ވަނަ ފަހަރެވެ.
މިދިޔަ މޭ މަހު ވެސް ކޮވިޑް ފިޔަވަޅުތަކާ ހެދި ހަ ހަފުތާ ވަންދެން އެ ތަން ބަންދުކުރި އެވެ. ފިޔަވަޅުތަކާ ހެދި ޗައިނާގެ އެހެން މަގްބޫލް މަންޒިލްތައް ވެސް ބަންދުކުރަން ޖެހިފައިވެ އެވެ.
އެގޮތުން މި އަހަރުގެ ކުރީކޮޅު ތިން މަސް ވަންދެން ޝަަންހާއީ ޑިޒްނީލޭންޑް ބަންދުކުރި އެވެ. ޖޫން މަހުން އަލުން ހުޅުވީ، ޒިޔާރަތް ކުރާ މީހުން މާސްކް އަޅައި ގައިދުރުކަން ބަހައްޓަން ޖެހޭ ގޮތަށެވެ.
