ހަފުތާއެއްހާ ދުވަހުގެ ތެރޭގައި އިންޑިއާގައި ދެ ވަނަ ފަހަރަށް ގޫގްލް ޖޫރިމަނާކޮށްފި އެވެ.
ކޮމްޕެޝަން ކޮމިޝަން އޮފް އިންޑިއާ (ސީސީއައި) އިން 113 މިލިއަން ޑޮލަރުން ގޫގްލް ޖޫރިމަނާ ކުރީ ވާދަވެރިކަން ގެއްލޭ ފަދަ ގޮތްތަކަށް އަމަލު ކުރާ ކަމަށް ބުނެ އެވެ.
އެގޮތުން އެޕް ސްޓޯގައި ގޫގްލްއަށް ލިބިދޭ ނުފޫޒުގެ ނާޖައިޒު ބޭނުންކޮށް، އެޕް އުފައްދާ ފަރާތްތަކުން ގޫގްލްގެ އިން-އެޕް ޕޭމަންޓް ނިޒާމް ބޭނުން ކުރަން މަޖުބޫރު ކުރާ ކަމަށް ސީސީއައި އިން ބުންޏެވެ.
ސީސީއައިއިން ގޫގްލްއަށް އެންގީ ތިން ވަނަ ފަރާތެއްގެ ޕޭމަންޓް ހިދުމަތް ބޭނުން ކުރުމުގެ ފުރުސަތު އެޕް އުފައްދާ ފަރާތްތަކަށް ދިނުމަށެވެ.
ގޫގްލްއިން ބުނީ އެ ތުހުމަތުތައް ދިރާސާ ކުރަމުންދާ ކަމަށެވެ. ގޫގްލްއާ ދެކޮޅަށް އިންޑިއާގައި ގިނަ މައްސަލަތަކެއް ކުރިއަށް އެބަދެ އެވެ.
މިދިޔަ ހަފުތާގައި 161 މިލިއަން ޑޮލަރުން އެ ކުންފުނި ޖޫރިމަނާ ކުރީ ގޫގްލްގެ އެންޑްރޮއިޑް ޕްލެޓްފޯމް ބޭނުންކޮށްގެން މާކެޓު ހިސޯރު ކުރި ކަމަށް ބުނެ އެވެ.
ގޫގްލްއިން ސްމާޓްފޯން އުފައްދާ ކުންފުނިތަކާ އެކު "އެއް ފަރާތަށް ބުރަވާ އެއްބަސްވުންތައް" އެކުލަވާލަނީ ގޫގްލްގެ އެޕްތައް މާކެޓުގެ ކުރީގައި ދެމެހެއްޓުމަށް ކަމަށް ސީސީއައިއިން ބުންޏެވެ.
ސީސީއައި އިން ބުނީ ގޫގްލްގެ އެޕްތަކުގެ ތެރޭގައި ހިމެނޭ ކްރޯމް، ޔޫޓިއުބް، ގޫގްލް މެޕްސް ފަދަ އެޕްތައް މާކެޓުގެ ކުރީގައި ދަމަހައްޓަން އެކުލަވާލާ އެއްބަސްވުންތަކުގެ ސަބަބުން ވާދަވެރިކަން ނެތިގެންދާ ކަމަށެވެ.
