ޕެރިސް (އޮކްޓޫބަރު 25) - މިދިޔަ އަހަރުގެ މެއި މަހު ރެއާލް މެޑްރިޑުގެ ކޯޗުކަމުން ވަކިވި ފަހުން ކޯޗިންއާ ދުރުގައި ހުރި ފްރާންސްގެ ޒިނެދިން ޒިދާން ވަރަށް އަވަހަށް އެނބުރި އަންނާނެކަން ހާމަކޮށްފި އެވެ.
ކުރިން މަޝްހޫރު މިޑްފީލްޑަރެއްގެ ގޮތުގައި ފާހަގަވި ޒިދާން، 2016 އިން 2018 އަށް ރެއާލްގެ ކޯޗެއްގެ ގޮތުގައި ގިނަ ކާމިޔާބީތަކެއް ހޯދި ޒިދާން އަކީ ޔޫރަޕްގެ ކްލަބް ފުޓްބޯޅައިގައި އެންމެ ބޮޑު މުބާރާތް، ޗެމްޕިއަންސް ލީގު ޖެހިޖެހިގެން ތިން ފަހަރު އެއް ކުލަބަކަށް ހޯދައިދިން ފުރަތަމަ ކޯޗެވެ. އޭނާ އެކަން ހާސިލްކުރީ ރެއާލްގައި ހުރެ އެވެ.
ޒިދާން އެންމެ ފުރަތަމަ ރެއާލް ދޫކޮށްލީ 2018 ވަނަ އަހަރުގެ ޗެމްޕިއަންސް ލީގު ފައިނަލަށް ފަހު އެވެ. އެކަމަކު، އޭރު ކްލަބް ދޫކޮށްލުމަށް ފަހު އޭނާ އެ ކުލަބާ ދެ ވަނަ ފަހަރަށް ގުޅުނީ 2019ގެ މާޗް މަހުގަ އެވެ. އޭހެ ފަހުން މިދިޔަ އަހަރުގެ މެއި މަހުގެ 27 ވަނަ ދުވަހު އެކުލަބު ދޫކޮށްލީ ކުލަބުން އޭނާ އަށް އިތުބާރު ނުކުރާކަމަށް ބުނެ އެވެ.
އޭގެ ފަހުން ކޯޗިން އާއި ދުރުގައި ހުރި ޒިދާން ވަަރަށް އަވަހަށް އެނބުރި އަންނާނެކަމުގެ އިޝާރާތެއް މިހާރު އޭނާ ވަނީ ދީފަ އެވެ.
ފްރާންސްގެ ނޫހަކަށް ދިން އިންޓައިވިއުއެއްގައި ޒިދާން ބުނީ ކޯޗިންގެ ތެރެއަށް އެނބުރި އަައުމަށް މިހާރު ތައްޔާރުވަމުން އަންނަ ކަމަށާއި، ވަރަށް އަވަހަށް ޓީމަކާ ހަވާލުވާނެ ކަމަށެވެ.
"އެނބުރި އަންނާނަން ވަރަށް އަވަހަށް. މިހާރު ތައްޔާރުވަމުން މި އަންނަނީ. ހުރިހާ އެންމެން ވެސް އަދި ކުޑަކޮށް އިންތިޒާރުކޮށްލާ" ނޫސްވެރިން އޭނާ އެނބުރި އަންނަނީ ކޮންއިރަކުންތޯ އެހުމުން ޒިދާން ބުންޏެވެ.
ރެއާލް ދޫކޮށްލި ފަހުން ޒިދާން ހޯދުމަށް ފްރާންސްގެ ޕީއެސްޖީ އާއި އިނގިރޭސި ކުލަބު މެންޗެސްޓާ ޔުނައިޓެޑުން ވަރަށް ބޮޑަށް މަސައްކަތްކުރި އެވެ. ޕީއެސްޖީގެ ކޯޗު ކަމުން މައުރީސިއޯ ޕޮޗެޓީނޯ ވަކިކޮށް ޒިދާނަށް ބޮޑު މުސާރައެއް އެފަހަރު ހުށަހެޅި އެވެ. އެކަމަކު، އޭނާ ބޭނުންވީ ކުލަބަކާއި ހާވާލުނުވެ މަޑުކުރާށެވެ.
މެންޗެސްޓާ ޔުނައިޓެޑުން ކުރީގެ ކޯޗު އޮލެ ގުނަ ސޯލްޝެއާ ވަކިކުރުމަށް ފަހު ދާއިމީ ކޯޗެއްގެ ގޮތުގައި އެރިކް ޓެން ހާގާ ޓީމާ ހަވާލުކުރުމުގެ ކުރިން ޒިދާނަށް އެ މަގާމު ހުށަހެޅިކަމަށް މީޑިއާތަކުން ރިޕޯޓުކުރި އެވެ.
ޒިދާން އެނބުރި އަންނާނެކަން ހާމަކުރުމާ އެކު މިހާރު މީޑިއާތަކުން ރިޕޯޓުކުރަނީ ޒިދާން ގުޅުން އެންމެ ގާތީ ފްރާންސްގެ ގައުމީ ޓީމާއި ކަމަށެވެ. ސަބަބަކީ އަންނަ މަހު ފަށާ ވޯލްޑް ކަޕަށް ފަހު ފްރާންސްގެ ކޯޗު ޑިޑިއޭ ޑެޝޯމްޕްސް ކޮންޓްރެކްޓް ހަމަވުމެވެ.
ފްރާންސްގެ ގައުމީ ޓީމްގެ އިތުރުން ކުޅުންތެރިއެއްގެ ގޮތުގައި ޒިދާން ފުރަތަމަ ވިދާލި އިޓަލީގެ ޔުވެންޓަސް އަށްވެސް ދިޔުން ގާތް ކަމަށް އިޓަލީގެ މީޑީއާ ތަކުން ރިޕޯޓްކުރެ އެވެ. އެކަމަކު، ޔުވެންޓަސް އާއި ޒިދާނާ ގުޅުވައިގެން ދެކެވޭ ވާހަަކަ އަށް އެކަށޭނެ ކުރިއެރުމެއް ނެތެވެ. އެއީ ޔުވެންޓަސްގެ ރައީސް އަންދްރެއާ އަގްނެލީ ވަނީ ޔުވެންޓަސްގައި ހުރި ކޯޗު މެސިމޯ އަލެގްރީ އަށް އިތުބާރު އެބައޮތް ކަމަށް ބުނެފަ އެވެ.
