ޑޮކްޓަރުންގެ ލަފާގެ މަތިން ސައުދީ އަރަބިއްޔާގެ ވަލީ އަހުދު އަމީރު މުހައްމަދު ބިން ސަލްމާން އަރަބި ސަމިޓށް އަލްޖީރިއާއަށް ދަތުރު ނުކުރައްވާނެ ކަމަށް ރިޕޯޓުތައް ބުނެފި އެވެ.
އަލްޖީރިއާގެ އޭޕީއެސް ނިއުސް އެޖެންސީއިން ބުނީ ނޮވެމްބަރު އެއް ވަނަ ދުވަހު ފަށާ އަރަބި ސަމިޓުގައި ބައިވެރިވެވެން ނެތުމުން ވަލީ އަހުދު މައާފަށް އެދިވަޑައިގެންނެވި ކަމަށެވެ.
އެ ނިއުސް އެޖެންސީއިން އިތުރަށް ބުނީ ވަލީ އަހުދުގެ ނިންމެވުން ބިނާ ކުރީ ދަތުރު ނުކުރުމަށް ޑޮކްޓަރުން ދެއްވި ލަފާތަކުގެ މައްޗަށް ކަމަށެވެ.
އެހެން ނަމަވެސް ދަތުރު ނުކުރެއްވުމަށް ޑޮކްޓަރުން ލަފާދެއްވީ ކީއްވެ ކަމެއް ސާފެއް ނޫނެވެ. ސައުދީ އަރަބިއްޔާގެ އޮފިޝަލުން އެކަމާ ގުޅޭ ގޮތުން ވަކި އެއްޗެއް ނުބުނެ އެވެ.
އަަލްޖީރިއާގެ ރައީސް އަބްދުލްމަޖީދު ތެބޫނާ ވަލީ އަހުދަށް ފޯނުން ގުޅުއްވި ކަމަށް ސައުދީ ޕްރެސް އެޖެންސީއިން ވެސް ރިޕޯޓުކުރި އެވެ. އެކަމަކު ޑޮކްޓަރުންގެ ލަފަ އާއި އަރަބި ސަމިޓާ ގުޅޭ އެއްވެސް ވާހަކައެއް އެ އެޖެންސީއިން ހާމައެއް ނުކުރެ އެވެ.
އުމުރުފުޅުން 37 އަހަރުގެ އަމީރު މުހައްމަދަކީ 2017 ވަނަ އަހަރުން ފެށިގެން ސައުދީ އަރަބިއްޔާގެ ވަލީ އަހުދެވެ.
އެމަނިކުފާނުގެ ބައްޕާފުޅު އުމުރުން 86 އަހަރުގެ ރަސްގެފާނު ސަލްމާން ބިން އަބްދުލް އަޒީޒްގެ ސިއްހީ ހާލުކޮޅާ ގުޅޭ ގޮތުން ގިނަ ގޮތްތަކަށް ހަބަރު ފެތުރެ އެވެ.
ސިއްހީ ހާލުކޮޅާ ހެދި ރަަސްގެފާނު މަގާމު ދޫކުރައްވައި، ވަލީ އަހުދާ ތަހުތު ހަވާލުކުރައްވަން އުޅޭ ކަމަށް 2017 ވަނަ އަހަރު ފެތުރުނު ހަބަރުތައް ސައުދީ އަރަބިއްޔާއިން ދޮގުކުރި އެވެ.
މި އަހަރުގެ ތެރޭގައި ސަލްމާން ރަސްގެފާނު ދެ ފަހަރެއްގެ މަތިން ހޮސްޕިޓަލުގައި އެޑްމިޓު ކުރެއްވި އެވެ. އެކަމަކު ވަލީ އަހުދުގެ ސިއްހީ މައްސަލައަކާ ގުޅޭ އެއްވެސް ރިޕޯޓެއް މިހާތަނަކަށް ނެތެވެ.
