އިންޑިއާގެ ރޮކެޓެއްގައި ވަންވެބް ސެޓެލައިޓް ކުންފުނީގެ 36 ސެޓެލަައިޓް ޖައްވަށް ފޮނުވައިފި އެވެ.
އެ ސެޓެލައިޓްތައް ޖައްވަށް ފޮނުވީ އިންޑިއާގެ ސްރީހަރިކޯތާ ރަށުން ލޯންޗުކުރި ޖީއެސްއެލްވީ ރޮކެޓެއްގަ އެވެ.
ވަންވެބް ކުންފުނީގެ ޓެލެކޮމިއުނިކޭޝަންސް ނެޓްވޯކް ފުޅާކުރުމުގެ މަސައްކަތް މެދުކެނޑުނީ މިދިޔަ މާޗް މަހު ރަޝިއާގެ ސޮޔޫޒް ރޮކެޓްތައް ބޭނުންކުރުން ހުއްޓާލަން ޖެހުމުންނެވެ.
މިހާރު ދުނިޔޭގެ އޯބިޓުގައި އެ ކުންފުނީގެ 462 ސެޓެލައިޓް ދައުރުވެ އެވެ. އެއީ މުޅި ދުނިޔެއަށް ކަވަރޭޖް ދިނުމަށް ބޭނުންވާ ސެޓެލައިޓްތަކުގެ 70 ޕަސެންޓެވެ.
އިނގިރޭސި ސަރުކާރުގެ ހިއްސާ އޮންނަ ވަންވެބްގެ އަމާޒަކީ އަންނަ އަހަރުގެ މެދުތެރޭގައި މުޅި ދުނިޔެއަށް ކަވަރޭޖް ދެވޭ ވަރަށް ސެޓެލައިޓް ޖައްވަށް ފޮނުވުމެވެ.
ހޮނިހިރު ދުވަހުގެ ލޯންޗުގައި ބޭނުންކުރި ޖިއޯސިންކްރޮނަސް ސެޓެލައިޓް ލޯންޗު ވެހިކަލް (ޖީއެސްއެލްވީ) އަކީ އިންޑިއާގެ އެންމެ ބޮޑު އަދި އެންމެ ވަރުގަދަ ރޮކެޓެވެ.
އެ ރޮކެޓު ޖައްވަށް ފޮނުވައި، ހުރިހާ ސެޓެލައިޓުތަކެއް އޯބިޓަށް އަންލޯޑް ކުރުމަށް ދޮޅު ގަޑިއިރު ހޭދަވި އެވެ. ސެޓެލައިޓްތައް ފޮނުވީ 600 ކިލޯމީޓަރުގެ އެލްޓިޓިއުޑަކަށެވެ.
އޭގެ ފަހުން ސެޓެލައިޓްތަކުގެ އަޔޯން އިންޖީނު މަސައްކަތް ފަށައި، އޯބިޓުގައި 1200 ކިލޯމީޓަަރުގެ ހިސާބެއްގައި ހަމަޖެހެން އަދި ހަފުތާތަކެއް ނަގާނެ އެވެ.
