އަންނަ އަންގާރަ ދުވަހު އައިސްލޭންޑުން ފެށިގެން އިންޑިއާއާ ހަމައަށް ފަޅި އިރުކޭތައެއް ފެންނާނެ ކަމަށް ސައިންސްވެރިން ބުނެފި އެވެ.
ޕެރިސް އޮބްޒަވޭޓަރީގެ އައިއެމްސީސީއީ އިންސްޓިޓިއުޓުން ބުނީ ކޭތަ ހިފާނީ ހެނދުނު 08:58 ގައި އައިސްލޭންޑުން ފެށިގެން ކަމަށެވެ. ކޭތަ ނިމޭނެ ކަމަށް ބެލެވެނީ މެންދުރު 01:02 ގައި އިންޑިއާގެ އައްސޭރިފަށާ ހިސާބަށެވެ.
އިރުކޭތަ ހިފަނީ އިރާއި ދުނިޔެއާ ދެމެދަށް ހަނދު ވަދެ، އިރުގެ އައްޔަށް ހުރަސް އެޅުމުންނެވެ. ފުރިހަމަ އިރުކޭތަ ހިފަނީ ހަނދުގެ ސަބަަބުން އެއްވެސް ވަރަކަށް ދުނިޔެއާ ހަމައަށް އިރުގެ އަލިކަން ނުފެނުމުންނެވެ.
އެހެން ނަމަވެސް އަންގާރަ ދުވަހު ހިފަނީ ފަޅި ކޭތައެކެވެ. އަންގާރަ ދުވަހުގެ ކޭތައިގައި ހަނދުގެ ހިޔަނި ދުނިޔޭގެ ބިމަށް ނޭޅޭނެ ކަމަށް ޕެރިސް އޮބްޒަވޭޓަރީގެ ބަޔާނެއްގައި ބުންޏެވެ.
ކަޒަކިސްތާނުގެ މަތިން ބަލާއިރު އިރުގެ 82 ޕަސެންޓު ނުފެންނާނެ ކަމަށް ލަފާކުރެވެ އެވެ. އެހެން ނަމަވެސް، އުޑުމަތި އަނދިރިވާ ވަރަށް އަސަރެއް ނުކުރާނެ އެވެ.
ސައިންސްވެރިން ބުނާ ގޮތުގައި އުޑުމަތި އެއްކޮށް އަަނދިރި ވާނީ އިރުގެ 95 ޕަސެންޓު ނުފެންނަ ވަރު ވުމުންނެވެ. ކޭތަ ބެލުމަށް ޝައުގުވެރިވާ މީހުން ހަމަލޮލުން އިރަށް ނުބެލުމަށް ލަފާދީފަައިވެ އެވެ.
އެއީ މި އަހަރު ހިފާ ދެ ވަނަ ފަޅި އިރުކޭތަ އެވެ. އަދި މި ގަރުނުގެ ތެރޭގައި ހިފާ 16 ވަނަ ފަޅި އިރުކޭތަ އެވެ. ދެން އެންމެ އަވަަހަށް ފުރިހަމަ އިރުކޭތައެއް ހިފާނީ 2024 ވަނަ އަހަރުގެ އެޕްރީލް އަށް ވަނަ ދުވަހު ކަމަށް ނާސާއިން ބުނެ އެވެ.
