އަފްގާނިސްތާނުގެ ވެރިރަށް ކާބުލްގައި ހުންނަ ސްކޫލަކަށް ހަމަލާ ދިނުމުގައި ބައިވެރިވި އިސްލާމިކް ސްޓޭޓް (އައިއެސް) ޓެރަރިސްޓް ގްރޫޕްގެ ހަ މެމްބަރުން މަރާލައިފި އެވެ.
ސެޕްޓެމްބަރު 30 ވަނަ ދުވަހު ޓެރަރިސްޓަކު އަމިއްލައަށް މަރުވެގެން ދިން ހަމަލާގައި ބޮޑެތި ގެއްލުންތަކެއް ލިބުނެވެ. ޖުމްލަ 53 މީހުން މަރުވި އިރު، އޭގެ ތެރޭގައި 46 އަންހެން ކުދިން ހިމެނެ އެވެ.
ހަމަލާދިނީ ކާބުލްގެ ސްކޫލެއްގެ ހޯލު ތެރޭގައި ޔުނިވާސިޓީ އިމްތިހާން ހެދުމަށް އަންހެން ދަރިވަރުން ތައްޔާރުވަމުން ދިޔަ ވަގުތަކާ ދިމާކޮށްފަ އެވެ.
އެކަމުގެ ޒިންމާ އެއްވެސް ގްރޫޕަކުން ނުއުފުލަ އެވެ. އެކަމަކު ތާލިބާނުން ބުނީ އެކަމުގެ ފަހަތުގައި ތިބީ އައިއެސް ކަމަށާއި ހަމަލާއާ ގުޅުން ހުރި އައިއެސްގެ މެމްބަރުންތަކެއް މަރާލާފައިވާ ކަމަށެވެ.
ތާލިބާން އޮފިޝަލަކު ބުނީ ފަހަކަށް އައިސް އާއްމުންނަށް އަމާޒުކޮށް ދޭ ގިނަ ހަަމަލާތަކަށް ޒިންމާ ވާން ޖެހެނީ އައިއެސް ކަމަށެވެ. އޭގެ ތެރޭގައި ސްކޫލްތަކާއި މިސްކިތްތަކަށް ދިން ހަމަލާތައް ހިމެނެ އެވެ.
ހޮނިހިރު ދުވަހު ހިންގި އޮޕަރޭޝަނުގައި އައިއެސްގެ ހަ މެމްބަރުން މަރާލި އިރު، ދެ މެމްބަރުން ހައްޔަރު ކުރި އެވެ.
މީގެ އަހަރެއް ކުރިން ތާލިބާނުން ވެރިކަމަށް އައުމާ އެކު ބޮޑެތި ހަމަލާތައް މަދުވި އެވެ. އެހެން ނަމަވެސް، ކާބުލް އާއި ބައެއް އެހެން ސިޓީތަކުގައި އަދިވެސް ބޮމުގެ ހަމަލާތައް ދެ އެވެ.
ބައެއް ހަމަލާތަކުގެ ޒިންމާ އައިއެސްއިން އުފުލަ އެވެ. އައިއެސް އާއި ތާލިބާނުންނަކީ ސުންނީ ދެ ގްރޫޕް ނަމަވެސް، ދެ ގްރޫޕްގެ ގިނަ ތަފާތުތަކެއް ހުރެ އެވެ.
