ޕެރިސް (އޮކްޓޫބަރު 22) - ފްރެންޗް ލީގުގައި ރޭ ކީލިއަން އެމްބާޕޭގެ ދެ ގޯލާ އެކު އުޖާކްސިއޯ އަތުން 3-0 އިން މޮޅުވެ، ޕީއެސްޖީ ލީގުގެ އެއް ވަނައިގައި ހަަމަޖެހިލައިފި އެވެ.
ޕީއެސްޖީ އެއް ވަނައިގައި އޮތީ 12 މެޗުން 32 ޕޮއިންޓާ އެކު އެވެ. ދެ ވަނައިގައި އޮތް ލޮރިއެންޓަށް 11 މެޗުން ލިބިފައިވަނީ 26 ޕޮއިންޓެވެ. ތިން ވަނައިގައި އޮތް ލެންސަށް 11 މެޗުން ވަނީ 24 ޕޮއިންޓް ލިބިފަ އެވެ.
ރޭގެ މެޗުގެ 24 ވަނަ މިނިޓްގައި ލިއޮނަލް މެސީ ދިން ބޯޅަ އަކަށް ހުސްކޮށް އަރައި، އޭރިއާތެރެއިން އެމްބާޕޭ ވަނީ ގޯލަށް ބޯޅަ ފޮނުވާލައިގެން ޕީއެސްޖީ އަށް ލީޑުނަގައިދީފަ އެވެ. އޭގެ ކުރިން ޕީއެސްޖީ އަށް ލީޑުނަގައިދޭން މެސީ ޖެހި ހިލޭ ޖެހުމެއް އުޖާކްސިއޯގެ ކީޕަރު، ބެންޖަމިން ލެރޯއި ވަނީ މަތަކޮށްފަ އެވެ.
ފުރަތަމަ ހާފު ނިމުމުގެ ކުރިން ޕީއެސްޖީގެ ލީޑުފުޅާކުރަން މެސީ އާއި އެމްބާޕޭގެ އިތުރުން ފަބިއާން ރުއިޒް އަަށް ލިބުނު ފުރުސަތުތަކުގެ ބޭނުމެއް ނުހިފުނެވެ.
ޕީއެސްޖީން ލީޑުފުޅާކުރީ މެޗުގެ 78 ވަނަ މިނިޓްގައި މެސީ ޖެހި ގޯލުންނެވެ. އެމްބާޕޭ ދިން ބޯޅަ އޭރިއާތެރެއިން ކޮންޓްރޯލް ކުރުމަށް ފަހު މެސީ ވަނީ ކީޕަރު ބެންޖަމިން ކައިރިން ނައްޓާފައި ގޯލަށް ބޯޅަ ފޮނުވާލައިފަ އެވެ. އޭގެ ތިން މިނިޓް ފަހުން، މެސީ ދިން ބޯޅަ އަކުން އެމްބާޕޭ ވަނީ ޕީއެސްޖީގެ ތިން ވަނަ ގޯލު ޖަހައިފަ އެވެ.
މެޗަށް ފަހު ޕީއެސްޖީގެ ކޯޗު ކްރިސްޓޮފް ގަލްޓިއޭ ބުނީ މި މެޗުން ފެނުނު މަންޒަރުތަކަށް ބަލާއިރު، އޭނާ އަށް އޮތް އެންމެ ބޮޑު ހިތްހަމަޖެހުމަކީ މެސީ އާއި އެމްބާޕޭގެ ކޮމްބިނޭޝަން ވަރަށް ރަނގަޅަށް މަަސައްކަތް ކުރުން ކަމަށެވެ. އަދި އެއީ ސީޒަން ކުރިއަށްދާ ވަރަކަށް އިތުރަށް ރަނގަޅު ކުރެވޭނެ ކޮމްބިނޭޝަނެއް ކަމަށާއި ޕީއެސްޖީ އިތުރަށް ވަރުގަދަވާނެ ކަމެއް ކަމަށް ގަލްޓިއޭ ވަނީ ބުނެފަ އެވެ.
