ގޫގްލްގެ އެންޑްރޮއިޑް ޕްލެޓްފޯމް ބޭނުންކޮށްގެން މާކެޓު ހިސޯރު ކުރި ކަމަށް ބުނެ، އިންޑިއާގައި އެ ކުންފުނި 161 މިލިއަން ޑޮލަރުން ޖޫރިމަނާކޮށްފި އެވެ.
އިންޑިއާގައި ކުންފުނިތަކުގެ ވާދަވެރިކަން ބަލަހައްޓާ އިދާރާއިން ބުނީ ގޫގްލްއިން ސްމާޓްފޯން އުފައްދާ ކުންފުނިތަކާ އެކު "އެއް ފަރާތަށް ބުރަވާ އެއްބަސްވުންތައް" އެކުލަވާލި ކަމަށެވެ. އެގޮތަށް އަމަލު ކުރީ ގޫގްލްގެ އެޕްތައް މާކެޓުގެ ކުރީގައި ދެމެހެއްޓުމަށް ކަމަށް ވެސް ބުންޏެވެ.
އެ އިދާރާއިން ގޫގްލްއަށް އެންގީ އެފަދަ ގޮތްތަކަށް އަމަލު ނުކުރުމަށެވެ. އެކަމާ ގުޅޭ ގޮތުން ގޫގްލްއިން ވަކި އެއްޗެއް ނުބުނެ އެވެ.
ކޮމްޕެޓިޝަން ކޮމިޝަން އޮފް އިންޑިއާ (ސީސީއައި) އިން ބުނީ ގޫގްލްގެ އެޕްތަކުގެ ތެރޭގައި ހިމެނޭ ކްރޯމް، ޔޫޓިއުބް، ގޫގްލް މެޕްސް ފަދަ އެޕްތައް މާކެޓުގެ ކުރީގައި ދަމަހައްޓަން އެކުލަވާލާ އެއްބަސްވުންތަކުގެ ސަބަބުން ވާދަވެރިކަން ނެތިގެންދާ ކަމަށެވެ.
ފޯނު އުފައްދާ ކުންފުނިތަކުން ގޫގްލްގެ އެޕްތައް އިންސްޓޯލް ކުރަން މަޖުބޫރު ނުކުރުމަށް ސީސީއައިއިން އެންގި އެވެ. އަދި ފޯނުގެ ސެޓަޕް ކުންފުނިތަކުން ހަދާ އިރު، އެ ކުންފުންޏެއް އިހްތިޔާރު ކުރާ ކޮންމެ އެޕެއް ވެސް ބޭނުންކުރެވެން ޖެހޭނެ ކަމަށް ބުންޏެވެ.
ސްމާޓްފޯނުގެ އިތުރުން ސްމާޓް ޓީވީ މާކެޓާއި އިން-އެޕް ޕޭމަންޓް ނިޒާމު ގޫގްލްއިން ގެންގުޅޭ ގޮތާ ބެހޭ މައްސަލަތަކެއް ވެސް އިންޑިއާގައި ދަނީ ބަލަމުންނެވެ.
