އިންޑޮނީޝިއާގައި 99 ކުދިން މަރުވެ "ސިރަޕް" ނުވަތަ ދިޔާ ބޭސް ވިއްކުން ވަގުތީ ގޮތުން މަނާކޮށްފި އެވެ.
ދާދި ފަހުން އެފްރިކާގެ ގައުމެއް ކަމުގައިވާ ގެމްބިއާގައި ވެސް ކެއްސާތީ ބޯ ބޭސް ނުވަތަ "ކޯފް ސިރަޕް" ބޮއެގެން 70 ކުދިން މަރުވި އެވެ.
އިންޑޮނީޝިއާއިން ބުނީ ބައެއް ދިޔާ ބޭހުގައި "އެކިޔުޓް ކިޑްނީ އިންޖަރީޒް (އޭކޭއައި) ނުވަތަ ކިޑްނީއަށް ބޮޑެތި ގެއްލުންތައް ކުރިމަތިކުރުވާ މާއްދާތައް ހިމެނޭ ކަމަށެވެ.
އެ ގައުމުގެ އިދާރާތަކަށް ފާހަގަވި ބޭސްތަކަކީ އިމްޕޯޓް ކުރި ނުވަތަ އިންޑޮނީޝިއާގައި އުފެއްދި ބޭސްތަކެއް ކަަމެއް ސާފެއް ނޫނެވެ.
ބުރާސްފަތި ދުވަހު އިންޑޮނީޝިއާގެ ސިއްހީ އޮފިޝަލުން ބުނީ އޭކޭއައި ކުރިމަތިވި 200 އެއްހާ ކުދިންގެ ކޭސް ފާހަގަވާއިރު ގިނައީ ފަސް އަހަރުން ދަށުގެ ކުދިން ކަމަށެވެ.
ގެމްބިއާގައި ކުދިންތައް މަރުވި މައްސަލައިގައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ ހަތަރު ބާވަތެއްގެ ކެއްސާތީ ބޯ ބޭސް ބޭނުން ނުކުރުމަށް އަންގައިފަ އެވެ.
އިންޑިއާގެ ކުންފުންޏަކުން އުފެއްދި އެ ބޭސްތަކުގައި ޑަޔެތިލީން ގްލައިކޯލް އަދި އެތެލީން ގްލައިކޯލް ހިމެނެނީ ސިއްހަތަށް ނުރައްކާވާ މިންވަރަށް ކަމަށް ޑަބްލިއުއެޗްއޯއިން ބުންޏެވެ.
އިންޑޮނީޝިއާގެ ހެލްތު މިނިސްޓަރު ބުޑީ ގުނަޑީ ސަޑިކިން ވެސް ވިދާޅުވީ އެ ގައުމުގައި ޝައްކު ކުރެވުނު ބޭސްތަކުން ވެސް ފާހަގަވީ އެ ދެ ކެމިކަލް ކޮމްޕައުންޑް ކަމަށެވެ.
