ރާއްޖޭގެ އެކި ހިސާބުތަކުގައި ހިންގާ ގިނަ ކުޅިވަރު އެކެޑަމީތަކަކީ ވިޔަފާރި އުސޫލުން ހިންގާ ތަންތަން ކަމަށާއި އެހެންކަމުން، އެ ތަންތަނަށް އެހީވުމަށް ސީދާ އެ ގޮތަށް ކަނޑައަޅައިގެން ޔޫތު މިނިސްޓްރީން ޕްރޮގްރާމެއް ނުހިންގާ ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެ އެވެ.
މިނިސްޓަރު މަހުލޫފް މި ގޮތަށް ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި މަނަދޫ ދާއިރާގެ މެމްބަރު އަހުމަދު ހާރޫން ކުރެއްވި ސުވާލަކަށް ޖަވާބު ދެއްވަމުންނެވެ.
މެމްބަރު ހާރޫން ސުވާލުކުރެއްވިއިރު، ވިދާޅުވީ ރާއްޖޭގެ އެކި ކަންކޮޅުތަކެއްގެ ގިނަ ރަށްތަކެއްގައި ކުޅިވަރު އެކެޑަމީ ހިންގާ ކަމަށާއި އެ އެކެޑަމީތައް ހިންގަން މިނިސްޓްރީގެ ފަރާތުން ދޭ އެހީތެރިކަމާއި އެއްބާރުލުމަކީ ކޮބައިތޯ ސާފުކޮށްދެއްވުމަށެވެ.
ޖަވާބުގައި މިނިސްޓަރު މަހުލޫފް ވިދާޅުވީ އެކެޑަމީތައް ހިންގަން އެހީތެރިކަމެއް ދޭން އެ ގޮތަށް ވިސްނައިގެން ވަކި ޕްރޮގްރާމެއް ނެތް ކަމަށާއި އެކި ފަރާތްތަކުން އެދުމުން އެ ވެދެވެން އޮތް ގޮތަކަށް އެހީތެރިކަން ފޯރުކޮށްދޭ ކަމަށެވެ.
"އަޅުގަނޑަށް ފެންނަ، ގިނަ، ހަމަ ވަރަށް ގިނަ އެކެޑަމީތަކަކީ ވިޔަފާރި އުސޫލުން ހިންގާ ތަންތަން. އެއީ ހަގީގަތް، މިސާލަކަށް އެ ތަންތަނުން ޓެކްސް އެއްވެސް ނުދައްކާނެ، އެކަމުގެ ޝަކުވާތައް ވެސް އަޅުގަނޑުމެންނާ ހަމައަށް އެބައާދޭ،" މިނިސްޓަރު ވިދާޅުވި އެވެ.
"އެހެންމަ، އެކަމަކު ވެސް މިސާލަކަށް ކުޑަ އާބާދީއެއް އޮންނަ ރަށެއްގައި ފުޓްބޯޅަ އެކެޑަމީއެއް ހިންގާއިރު އަޅުގަނޑަށް ހީވަނީ ޗާޖް ވެސް ކުރާނީ ވަރަށް ކުޑަވަރެއް ހެން. އެހެންމަ، އެ ވިސްނުމުގައި އަޅުގަނޑުމެންނަށް ރިކުއެސްޓް އައީމަ ދެވެން އޮތް ވަރަކުން ދެން. އެކަމަކު، ކަނޑައެޅިގެން އެކެޑަމީތަކުގެ އެހީތެރިކަމަށޭ ކިޔާފައި ވަކި ޕްރޮގްރާމެއް ނުހިންގަން،"
ރާއްޖޭގެ އެކި ރަށްރަށުގަޔާއި މާލޭގައި އެކި ކުޅިވަރުތަކުން ކުޅުންތެރިން ޑިވެލޮޕްކުރަން އެކެޑަމީތައް ހިންގަ އެވެ. ކުރިން ގައުމީ ކުޅިވަރު އެސޯސިއޭޝަންތަކުން ޒުވާން އުމުރުގައި ކުޅުންތެރިން/އެތުލީޓުން ޑިވެލޮޕްކުރަން ހިންގާ ޔޫތު ޑިވެލޮޕްމަންޓް ޕްރޮގްރާމް މިހާރު އޮންނަނީ އެކެޑަމީތަކާ ގުޅިފަ އެވެ.
ގަލޮޅު ދަނޑުގެ މަސައްކަތް އޮތީ "ފަހު މަރުހަލާގައި"
މި އަހަރަށް ލަފާކުރި ބަޖެޓްގައި ސަރުކާރުން ގަލޮޅު ފުޓްބޯޅަ ދަނޑު ތަރައްގީ ކުރުމަށްޓަކައި އިންޑިއާގެ ލޯން އެހީގެ ތެރެއިން 55 މިލިއަން ރުފިޔާގެ ބަޖެޓެއް ވަނީ ހަމަޖައްސައިފަ އެވެ. މި އަހަރު ތެރޭގައި ގަލޮޅު ދަނޑު ތަޅާލައި، އާ ދަނޑެއް އެޅުމުގެ މަސައްކަތް ފަށާނެ ކަމަށް މިނިސްޓަރު މަހުލޫފް ވަނީ އެކި ޕޯޑިއަމްތަކުގައި ވިދާޅުވެފަ އެވެ. އެކަމަކު، މިހާތަނަށް ދަނޑުގެ އަމަލީ މަސައްކަތް އޮތީ ނުފެށި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ކަނޑިތީމު ދާއިރާގެ މެމްބަރު، އަބްދުﷲ ޝަހީމް ކުރެއްވި ސުވާލެއްގައި ވިދާޅުވީ ގަލޮޅު ފުޓްބޯޅަ ދަނޑަކީ ދިވެހިންގެ ފުޓްބޯޅައާ ވަރަށް ބޮޑަށް ގުޅިފައި އޮތް ދަނޑެއް ކަމަށާއި ރާއްޖޭގެ ރަސްމީ ފުޓްބޯޅަ ދަނޑެއްގެ ގޮތުގައި ގަލޮޅު ދަނޑު ތަރައްގީ ކުރުމުގެ ވިސްނުން އޮތީ ކިހިނެއްތޯ ސާފުކުރައްވަން ބޭނުންވާ ކަމަށެެވެ.
ޖަވާބުގައި މިނިސްޓަރު މަހުލޫފް ވިދާޅުވީ އިންޑިއާގެ އެލްއޯސީ ތެރެއިން ކުރިއަށްގެންދާ ޕްރޮޖެކްޓް ތެރޭގައި ގަލޮޅު ދަނޑުގެ މަސައްކަތަކީ އެންމެ ބޮޑު އަގެއް ކަނޑައެޅިފައިވާ ކަންތައް ކަމަށެވެ. އަދި މިހާރު ގަލޮޅު ދަނޑުގެ މަސައްކަތް އޮތީ އެންމެ ފަހުގެ މަރުހަލާގެ ތެރޭގައި ކަމަށް ވެސް މިނިސްޓަރު ވިދާޅުވި އެވެ.
"ފުރަތަމަ ކަމަކަށް އޮތީ ހުޅުމާލޭގައި މި އޮތް ޓްރެކް ދަނޑުގައި ކުޅެވޭނެ ގޮތަށް ސެޓަޕް ހެދުން އެކަން ކޮށް، ނިންމާފައި ފުރަތަމަ ކަމަކަށް ގަލޮޅު ދަނޑު ތަޅާލަނީ. އެއާ އެކީގައި އެ ދަނޑު ވަރަށް ރަނގަޅު ފެންވަރެއްގެ ދަނޑެއްގެ ގޮތުގައި ތަރައްގީ ކުރެވިގެންދާނެ،" މަހުލޫފް ވިދާޅުވި އެވެ.
މިދިޔަ އަހަރުގެ ސާފް ޗެމްޕިއަންޝިޕް ރާއްޖޭގައި ހޯސްޓްކުރިއިރު، ގަލޮޅު ދަނޑުގައި މެޗުތައް ކުޅުނީ ސިޑިބަރިތައް ބޭނުންކުރަން އިންޖިނިއަރުންގެ ލަފާ ހޯދައިގެން އެ ތަންތަން ވަގުތީ ގޮތުން މަރާމާތުކުރަން ވަރަށް ބައިވަރު މަސައްކަތްތަކެއް ކޮށްގެންކަން މިނިސްޓަރުގެ ވާހަކައިގައި ފާހަގަކުރެއްވި އެވެ.
"ކޮންމެ ގޮތެއް ވިޔަސް ތަޅާލަން ޖެހޭ، އުވަޔާ އަކިރިން ހަދާފައި ހުރި ސިޑިބަރިތައް ގިނައީ، އެހެންވީމަ އެތަން ވީހާވެސް އަވަހަށް އެ މަސައްކަތް ކުރެވޭނެ. އެ ޕްރޮޖެކްޓްގެ ތެރޭގައި ނެޝަނަލް ބާސްކެޓްބޯލް އެރީނާ އާއި ނެޝަނަލް ވޮލީބޯލް ސެންޓަރާއި ނެޝަނަލް ޓޭބަލް ޓެނިސް ސެންޓަރާއި އަދި އޭގެ އިތުރުން ކުޅުދުއްފުށި، ހިތަދޫ، ތިނަދޫ އަދި ފުވައްމުލަކުގައި ސިންތެޓިކް ޓްރެކް އެޅުމުގެ މަސައްކަތް ހިމެނިފައިވަނީ، އުންމީދު މި ކުރަނީ މިހާރު މިދާ ސްޕީޑަށް ބަަލަންޏާ މި އަހަރު ފަހުކޮޅު ނޫނީ އަންނަ އަހަރުގެ ކުރީކޮޅު އެ މަސައްކަތްތައް ފެށިގެންދާނެ ކަމަށް،" މިނިސްޓަރު މަހުލޫފް ވިދާޅުވި އެވެ.
ޒަމާނުއްސުރެ ރާއްޖޭގެ ލޯކަލް އާއި ބައިނަލްއަގުވާމީ ފުޓްބޯޅައިގެ ހުރިހާ ކަމެއް މުޅިން އެއްކޮށް ކަހަލަ ގޮތަކަށް ބަރޯސާވެފައި އޮތީ ގަލޮޅު ދަނޑަށެވެ. ފަހުގެ ތާރީހެއްގައި ގަލޮޅު ދަނޑު ތިން ފަހަރެއްގެ މަތިން މަރާމާތު ކޮށްފައި ވަނީ މުބާރާތެއް ބޯމަތިވެފައި އޮއްވަ އެވެ. އެ ގޮތުން 2008 ވަނަ އަހަރު ރާއްޖެ އާއި ލަންކާގައި ހޯސްޓް ކުރި ސާފް ޗެމްޕިއަންޝިޕަށް ކޮންމެ ވެސް ވަރެއްގެ މަރާމާތެއް ކުރި އެވެ. އޭގެ ފަހުން 2014 ވަނަ އަހަރުގެ އޭއެފްސީ ޗެލެންޖް ކަަޕަށް 70 ވަރަކަށް މިލިއަން ރުފިޔާ ހަރަދުކޮށްގެން ގަލޮޅު ދަނޑުގެ ރޮސްޓްރަމް މަތީގައި މީޑިއާ އާއި ވީއައިޕީ އަށް ހާއްސަކޮށް އިމާރާތެއް ހެދި އެވެ.
