ސައުދީ އަރަބިއްޔާއިން ބޭނުން ވަނީ ދުނިޔޭގެ ތެލުގެ އަގުތައް ހަމައަކަށް އަަޅުވަން ކަމަށް ރަސްގެފާނު ސަލްމާން ބިން އަބްދުލް އަޒީޒް ވިދާޅުވެއްޖެ އެވެ.
"އަޅުގަނޑުމެންގެ ގައުމުގެ ހަކަތައާ ބެހޭ ސްޓްރެޓެޖީގެ ދަށުން ދުނިޔޭގެ ތެލުގެ މާކެޓަށް ހަމަޖެހުން ގެންނަށް ދަނީ ބުރަ މަސައްކަތް ކުރަމުން،" ރަސްގެފާނު ވިދާޅުވި ކަމަށް ސައުދީ ޕްރެސް އެޖެންސީން ރިޕޯޓުކުރި އެވެ.
އެމަނިކުފާނު ވިދާޅުވީ ސައުދީ އަރަބިއްޔާއިން މުޅިން އަލަށް ފެންނަ ގޭސް ވަޅުތައް ތަރައްގީ ކުރުމުގެ މަސައްކަތް ހުއްޓުމެއް ނެތި ކުރިއަށް ދާނެ އެވެ.
އޭގެ އިތުރުން ކާބަން ނިޔުޓްރަލް ލަނޑުދަނޑި ހާސިލްކުރަން މަސައްކަތް ކުރާނެ ކަމަށާއި 2030 ވަނަ އަހަރުގެ ކުރިން ކޮންމެ އަހަރަކު 278 މިލިއަން ޓަނުގެ ކާބަން ބޭރުކުރުން މަދުކުރާނެ ކަމަށް ވިދާޅުވި އެވެ.
ޝުރާ ކައުންސިލްގެ ބައްދަލުވުންތައް ފެށުމުގެ ގޮތުން ވީޑިއޯ މެދުވެރިކޮށް ވާހަކަފުޅު ދައްކަވަމުން ރަސްގެފާނު ވިދާޅުވީ ދުނިޔެއަށް ސުލްހަ ގެނައުމުގައި ސައުދީން މުހިއްމު ދައުރެއް އަދާކުރަމުންދާ ކަމަށެވެ.
އެގޮތުން ޔޫކްރެއިނާއި ރަޝިއާގެ ގައިދީން ބަދަލުކުރުމުގެ އެއްބަސްވުމެއް އެކުލަވާލާފައިވާ ކަމަށާއި ނިޔުކްލިއާ މައްސަލައިގައި އިރާނުން އދ. އަށް އެއްބާރުލުން ދިނުމަށް ގޮވާލެއްވި އެވެ.
ޔަމަނު ހަނގުރާމައާ ގުޅޭ ގޮތުން ރަސްގެފާނު ވިދާޅުވީ ދާއިމީ ސުލްހަ ގެނައުމަށް ކުރެވެން ހުރި ހުރިހާ ކަމެއް ސައުދީ އަރަބިއްޔާއިން ކުރާނެ ކަމަށެވެ.
އޯޕެކް ޕްލަސް ގައުމުތަކުން ދާދި ފަހުން ތެޔޮ އުފެއްދުން މަދު ކުރަން ނިންމުމުން، އެމެރިކާގެ ނުރުހުން ސައުދީ އަރަބިއްޔާއަށް އަމާޒުވި އެވެ.
އޯޕެކް ޕްލަސް ގްރޫޕުން ބުނީ ދުނިޔޭގެ އިގްތިސާދު މަޑުޖެހެމުން ދާތީ ތެލުގެ އަގުތައް ވެއްޓެން ފަށާފައިވާ ކަމަށާއި އެކްސްޕޯޓް މަދު ކުރަން ނިންމީ އަގުތައް އެއްވަރެއްގައި ހިފެހެއްޓުމަށް ކަމަށެވެ.
