ޕެރިސް (އޮކްޓޫބަރު 17) - ފްރެންޗް ލީގުގައި ރޭ މާސޭ ކޮޅަށް ނޭމާ ޖެހި ގޯލާ އެކު 1-0 އިން މޮޅުވެ، ޕީއެސްޖީން ލީގުގެ އެއް ވަނައިގައި ތިން ޕޮއިންޓުގެ ލީޑެއް ނަގައިފި އެވެ.
ނޭމާ މި މެޗުގައި ޖެހީ ލީގު ފުޓްބޯޅައިގައި އޭނާ ކާމިޔާބުކުރި 200 ވަނަ ގޯލެވެ. ނޭމާ މީގެ ކުރިން ކުޅެފައިވަނީ ސަންޓޯސް އާއި ބާސެލޯނާ އަށެވެ. ސަންޓޯސް އަށް ބްރެޒިލް ލީގުގައި 54 ގޯލު ޖެހި ނޭމާ ވަނީ ސްޕެނިޝް ލީގުގައި ބާސެލޯނާ އަށް 68 ގޯލު ޖަހައިފަ އެވެ. އަދި ރޭ ޕީއެސްޖީ އަށް ޖަހައިދިނީ ފްރެންޗް ލީގުގައި ޖެހި 78 ވަނަ ގޯލެވެ.
ލީގުގެ އެއް ވަނައިގައި ޕީއެސްޖީ އޮތީ 11 މެޗުން 29 ޕޮއިންޓާ އެކު އެވެ. މި ފަހަރު ލީގުގައި ފުރަތަމަ ފަހަރަށް ބަލިވި މާސޭ ދެ ވަނައިގައި އޮތީ 11 މެޗުން 26 ޕޮއިންޓް ހޯދައިގެންނެވެ.
ޕީއެސްޖީން އަމިއްލަ ދަނޑުގައި ރޭގެ މެޗަށް ނުކުތްއިރު، އެ ޓީމަށް އޮތް އެންމެ ބޮޑު ހިތްހަމަޖެހުމަކީ އަނިޔާއިން ރަނގަޅުވެ، ލިއޮނަލް މެސީ އެނބުރި އައުމެވެ. މެސީ ވަނީ ރޭގެ މެޗުގައި ޕީއެސްޖީ އަށް ލީޑުނަގައިދިނުމާ ގާތަށް ޖެހިލައިފަ އެވެ. ހިލޭ ޖެހުމަކުން މެސީ ފޮނުވާލި ބޯޅަ އަމާޒުވީ ގޯލުގެ ހުރަސްދަނޑިއަށެވެ.
ނޭމާ، ރޭގެ މެޗުގައި ފެނިގެންދިޔަ ހަމައެކަނި ގޯލު ޖެހީ ފުރަތަމަ ހާފުގެ އިތުރު ވަގުތުގަ އެވެ. ކީލިއަން އެމްބާޕޭ އޭރިއާތެރެއިން ހުސްކޮށްލާފައި ދިން ބޯޅަ ނޭމާ ވަނީ ހަމަޖެހިލައިފައި ގޯލުގެ ދުރު ކަނަށް ފޮނުވާލައިފަ އެވެ. ދެ ވަނަ ގޯލެއް ޖަހަން ޕީއެސްޖީން ކުރި މަސައްކަތް ކާމިޔާބުނުވިއިރު، އެމްބާޕޭ އާއި އަޝްރަފް ހަކީމީ އަދި މެސީ ވަނީ ރަނގަޅު ޝޮޓްތަކެއް ފޮނުވާލައިފަ އެވެ.
މާސޭ އިން ނަތީޖާ ހަމަހަމަ ކުރަން ކުރި މަސައްކަތް ކާމިޔާބުނުވީ ޕީއެސްޖީގެ ކީޕަރު، ޖިއަންލުއީޖީ ޑޮންނަރުންމާގެ ހުށިޔާރުކަމުންނެވެ. މާސޭގެ ޖޮނަތަން ކްލައުސް ވަނީ ރަނގަޅު ހަމަލާއެއް ފޮނުވާލައިފަ އެވެ. މާސޭ އިން މެޗު ނިންމާލީ އެއް ކުޅުންތެރިއަކު މަދުކޮށެވެ. އެއީ އެ ޓީމުގެ ސެމުއެލް ގިގޯ އަށް ރަތް ކާޑު ދެއްކުމުންނެވެ. ބަދަލަކަށް ކުޅެން އެރި ގިގޯ އަށް ރަތް ކާޑު ދެއްކީ ނޭމާ އަށް ކުރި ފައުލަކަށެވެ.
