ލިވަޕޫލް (އޮކްޓޫބަރު 17) - އިނގިރޭސި ޕްރިމިއާ ލީގުގައި މިރޭ މުހައްމަދު ސަލާހުގެ ގޯލުން ލިވަޕޫލުން 1-0 އިން މެންޗެސްޓާ ސިޓީ ބަލިކުރިއިރު، ލީޑްސް ޔުނައިޓެޑް ދަނޑުގައި 1-0 އިން މޮޅުވި އާސެނަލަށް ލީގުގެ އެއް ވަނައިގައި ހަތަރު ޕޮއިންޓުގެ ލީޑެއް ނަގައިފި އެވެ.
އާސެނަލް އެއް ވަނައިގައި އޮތީ 10 މެޗުން 27 ޕޮއިންޓާ އެކު އެވެ. ދެ ވަނައިގައި އޮތް މެންޗެސްޓާ ސިޓީ އާއި ތިން ވަނައިގައި އޮތް ޓޮޓެންހަމް ހޮޓްސްޕާސް އަށް 10 މެޗުން ލިބިފައިވަނީ 23 ޕޮއިންޓެވެ. މިރޭ އެސްޓަން ވިލާ ދަނޑުގައި 2-0 އިން މޮޅުވި ޗެލްސީ ތިން ވަނައިގައި އޮތީ ނުވަ މެޗުން 19 ޕޮއިންޓް ހޯދައިގެންނެވެ.
ލީޑްސްގެ އެލަން ރޯޑުގައި މިރޭ ކުޅުނު މެޗު ފަށައިގެން 23 ސިކުންތު ތެރޭގައި ޖެހުނީ މެޗު ހުއްޓާލާށެވެ. އެއީ ވީޑިއޯ އެސިސްޓަންޓް ރެފްރީ (ވީއޭއާރް) އާއި ގޯލް ލައިން ޓެކްނޮލޮޖީގެ ބޭނުންނުކުރެވޭތީ އެކަން ކަން ރަނގަޅު ކުރުމަށެވެ. ބައިގަނޑިއިރެއްހާއިރު ފަހުން މެޗު އަލުން ފެށިއިރު، އާސެނަލުން ވަނީ ފުރަތަމަ ހާފުގައި ގޯލު ޖަހައިފަ އެވެ. މެޗުގެ 35 ވަނަ މިނިޓްގައި މާޓިން އޮޑެގާޑް ދިން ބޯޅައެއް އޭރިއާތެރެއިން ހޯދައި، ބުކާޔޯ ސަކާ ވަނީ ހަނި އޭންގަލުން ގޯލުގެ ތެރެއަށް ފޮނުވާލައިފަ އެެވެ.
ދެ ވަނަ ހާފުގައި ބަދަލަކަށް އަރައި، ލީޑްސްގެ ޕެޓްރިކް ބެމްފޯޑް ގޯލެއް ޖެހި އެވެ. އެކަމަކު، ރެފްރީ ކްރިސް ކަވަނާ ނިންމީ މިއީ ފައުލެއް ކޮށްފައި ބެމްފޯޑް ޖެހި ގޯލެއް ކަމަށްވާތީ ބަލައިނުގަންނާށެވެ. މި ހާފުގައި ލީޑްސް އަށް ލިބުނު ޕެނަލްޓީއެއް ވެސް ބެމްފޯޑް އަތުން ނާކާމިޔާބުވި އެވެ.
އާސެނަލްގެ ބުކާޔޯ ސަކާ ލީޑްސް ޔުނައިޓެޑްގެ ގޯލަށް ބޯޅަ ފޮނުވާލަނީ.--- ފޮޓޯ: އޭއެފްޕީ
މެޗުގެ އިތުރު ވަގުތުގައި އާސެނަލްގެ ގަބްރިއެލް މަގާޅައެސް އޭރިއާތެރެއިން ލީޑްސްގެ ބެމްފޯޑަށް ފައުލެއް ކުރި ކަމަށް ބަލައި ރަތް ކާޑެއް ދެއްްކި ނަމަވެސް ފަހުން އެ ނިންމުން ބަދަލުކުރަން ނިންމީ ވީއޭއާރް އިން ބަލައިފަ އެވެ.
ލިވަޕޫލް ދަނޑުގައި މިރޭ ސިޓީއާ ދެކޮޅަށް ކުޅުނު މެޗުގެ ފުރަތަމަ ހާފުގައި ލިވަޕޫލްގެ ޑިއޯގޯ ޖޮޓާ ޖެހި ބޯޅައެއް ސިޓީގެ ކީޕަރު އެޑަސަން މޮރާއޭސް އަތަށް އަމާޒުވިއިރު، ސިޓީގެ އާލިން ބްރައުޓް ހާލަންޑް ބޮލުން ފޮނުވާލި ބޯޅަ ލިވަޕޫލް ކީޕަރު އެލިސަން ބެކާ ވަނީ އަތަށް ނަގައިފަ އެވެ.
މި މެޗުގެ ދެ ވަނަ ހާފްގެ ކުޅުން ފެށިގެން މާގިނައިރެއް ނުވެ، ލިވަޕޫލްގެ ސަލާހަށް މުޅުން ހުސްކޮށް ލިބުނު ފުރުސަތެއްގައި އޭނާ ޖެހި ބޯޅަ ކީޕަރު އެޑަސަން ވަނީ މަތަކޮށްފަ އެވެ. ސަލާހަށް އެ ބޯޅަ ޖޮޓާ އަށް ދީގެން ޖެހެން އޮތް ނަމަވެސް ނިންމީ އަމިއްލަ އަށް ޖެހުމަށެވެ.
ސިޓީން ވަނީ މެޗުގެ 53 ވަނަ މިނިޓްގައި ގޯލެއް ޖަހައިފަ އެވެ. ފިލް ފޯޑެން ޖެހި މި ގޯލު ބަަލައިނުގަންނަން ނިންމީ ވީއޭއާރް އިން ބަލައިފަ އެވެ. އެއީ އެ އެޓޭކް ފެށިއިރު، ސިޓީގެ ހާލަންޑް ލިވަޕޫލްގެ ފަބީނިއޯގެ ޖޯޒީގައި ހިފަހައްޓާފައިވާތީ އެވެ. އެ ނިންމުމާ މެދު ސިޓީގެ ކޯޗު ޕެޕް ގާޑިއޯލާ ވަނީ ވަރަށް ބޮޑަށް ހިތްހަމަ ނުޖެހުން ފާޅުކޮށްފަ އެވެ.
ލިވަޕޫލުން މެޗުގައި ޖެހި ހަމައެކަނި ގޯލު ކާމިޔާބުކުރީ 76 ވަނަ މިނިޓްގައި ސަލާހު އެވެ. ކީޕަރު އެލިސަން ޖެހި ބޯޅައެއް ސިޓީގެ ޔާއޯ ކަންސޭލޯ އަތުން ހޯދައިގެން، ސަލާހު މި ގޯލު ޖެހީ ހަމަޖެހިލައިފަ އެެވެ. މިއީ މި ފަހަރު ލީގުގައި ސަލާހު ޖެހި ތިން ވަނަ ގޯލެވެ.
މިއީ މި ފަހަރު ލީގުގައި ސިޓީ ބަލިވި ފުރަތަމަ މެޗެވެ. އަދި ޕްރިމިއާ ލީގުގައި އެންމެ ފަހުން ރަށުންބޭރުގައި ކުޅުނު 22 މެޗުން ބަލިނުވެ، ސިޓީން ދެމެހެއްޓި ރެކޯޑަށް މި ވަނީ ނިމުން އަތުވެފަ އެވެ.
ލިވަޕޫލް މި މޮޅާ އެކު ލީގުގެ އަށް ވަނައިގައި އޮތީ ނުވަ މެޗުން 13 ޕޮއިންޓް ހޯދައިގެންނެވެ. މިރޭގެ މެޗުގައި ލިވަޕޫލްގެ ކޯޗު ޔާގެން ކްލޮޕް އަށް ވަނީ ރަތް ކާޑެއް ދައްކައިފަ އެެވެ. އެއީ ރެފްރީގެ ނިންމުންތަކާ ހިތްހަމަނުޖެހުން ފާޅުކުރިއިރު، ލައިންސްމަނާ ދިމާކޮށްލުމުންނެވެ. ކްލޮޕް އެންމެ ބޮޑަށް ހިތްހަމަނުޖެހުނީ ސަލާހަށް ސިޓީގެ ބެނާޑޯ ސިލްވާ ކުރި ފައުލަށް ހިލޭ ޖެހުން ނުދިނުމުންނެވެ.
އެސްޓަން ވިލާ ދަނޑުގައި މިރޭ ޗެލްސީގެ ދެ ގޯލު ވެސް ޖެހީ މޭސަން މައުންޓް އެވެ. ފުރަތަމަ ހާފުގައި މައުންޓް، ޗެލްސީ އަށް ލީޑުނަގައިދިނީ އެސްޓަން ވިލާގެ ޓައިރަން މިންގްސް ހެދި ގޯހެއްގެ ފައިދާނަގައިގެންނެވެ. ދެ ވަނަ ހާފުގައި މައުންޓް ޗެލްސީގެ ދެ ވަނަ ގޯލު ޖެހީ ހިލޭ ޖެހުމަކުންނެވެ.
މިރޭގެ މެޗުން ޗެލްސީ މޮޅުވުމުގެ ކްރެޑިޓް ހައްގުވާ އެއް ކުޅުންތެރިއަކީ ގޯލްކީޕަރު ކެޕާ އަރިއްޒަބަލާގާ އެެވެ. އެސްޓަން ވިލާ އިން ފޮނުވާލި ގިނަ ބޯޅަތަކެއް ހުއްޓުވުމުގައި ކެޕާގެ ހުށިޔާރުކަން ފެނިގެންދިޔަ އެވެ.
އަމިއްލަ ދަނޑުގައި މިރޭ ކުޅުނު މެންޗެސްޓާ ޔުނައިޓެޑް ވަނީ ލަނޑެއް ނުޖެހި ނިއުކާސަލް ޔުނައިޓެޑާ 0-0 އިން އެއްވަރުވެފަ އެވެ. ނުވަ މެޗުން 16 ޕޮއިންޓާ އެކު މެންޗެސްޓާ ޔުނައިޓެޑް އޮތީ ލީގުގެ ފަސް ވަނައިގަ އެވެ.
