ރާއްޖޭގައި ގެނެސްދޭ ފީފާ ވޯލްޑު ކަޕް ކަވަރެޖްގެ ޓައިޓްލް ޕާޓްނަރަކަށް އުރީދޫ މޯލްޑިވްސް ހަމަޖައްސައި، އެއްބަސްވުމުގައި އިއްޔެ ސޮއިކޮށްފި އެވެ.
އެ އެއްބަސްވުމުގައި އުރީދޫގެ ފަރާތުން ސޮއިކުރެއްވީ ސީއީއޯ އަދި އެމްޑީ ހާލިދް އަލް-ހަމަދީ އަދި ސީސީއޯ ހުސެން ނިޔާޒު އެވެ. މީޑިއާނެޓުގެ ފަރާތުން ސޮއި ކުރެއްވީ ސީއީއޯ އަދި އެމްޑީ އަހުމަދު ޝަފީއު އާއި ސީއޯއޯ އަހުމަދު ނަބާހު އެވެ.
ފީފާ ވޯލްޑް ކަޕް ޓީވީ ޖަވަރޭޖުގެ ޓައިޓްލް ޕާޓްނަރު އުރީދޫ މޯލްޑިވްސްއާއެކު މީޑިއާނެޓުން ސޮއިކުރުމުގެ ހަފުލާގެ ތެރެއިން -- ފޮޓޯ: އުރީދޫ
ރާއްޖޭގައި ވޯލްޑް ކަޕްގެ މެޗްތައް ދެއްކުމުގެ ބްރޯޑްކާސްޓިން ރައިޓްސް ގަނެފައިވަނީ މީޑިއާނެޓުންނެވެ.
ފީފާ ވޯލްޑް ކަޕް ކަވަރޭޖުގެ ޓައިޓްލް ސްޕޮންސަރާއެކު ސޮއިކުރުމުގެ ހަފުލާގައި މީޑިއާނެޓާއެކު ސޮއިކުރުމުގެ އިތުރުން، މެޗްތައް ގެނެސްދޭ ރާއްޖެޓިވީ އަދި އައިސް ޕްލަސްއިން ވެސް އުރީދޫއާ އެކު ސޮއިކުރި އެވެ.
އެ ހަފުލާގައި އުރީދޫގެ ސީއީއޯ ހާލިދް ވިދާޅުވީ ފުޓުބޯޅައަކީ ދިވެހީންގެ ހިތްތަކުގައި ހާއްސަ ލޯތްބެއް އޮންނަ ކުޅިވަރެއް ކަމަށާއި ފުޓުބޯޅައަކީ އުރީދޫ ގުރޫޕާއި ވެސް ވަރަށް ގާތްކަމެއް އޮންނަ ކުޅިވަރެއް ކަމަށެވެ.
މި އަހަރުގެ ވޯލްޑް ކަޕަށް އަޅުގަނޑުމެންގެ އަމާޒަކީ ދިވެހި ސަޕޯޓަރުންނަށް ކުލަގަދަ، އަދި ފޯރިގަދަ ތަޖުރިބާތަކެއް ހޯދައިދިނުން. އެގޮތުން ރާއްޖޭގެ އެކި ކަންކޮޅުތަކުގައި ތިއްބެވި ކަސްޓަމަރުންނަށް މެޗުތައް ބަލާލުމުގެ ފުރުސަތު ފަހިކޮށްދިނުމަށް މީޑިއާނެޓާއި މިއަދު މި ޕަރޓަނާޝިޕް ގާއިމް މިކުރީ ނުހަނު އުފަލާއެކު،" އޭނާ ވިދާޅުވި އެވެ.
މީޑިއާނެޓުގެ ނަބާހު ވިދާޅުވީ އުރީދޫގެ އެއްބާރުލުން ލިބިގެން ދިއުމަކީ މީޑިއާނެޓްއަށް ވެސް ލިބިގެންދާ ޝަރަފެއް ކަމަށެވެ.
ފީފާ ވޯލްޑު ކަޕްގެ މެޗްތައް ގެނެސްދޭ ދެ ޓީވީ ކަމުގައިވާ އައިސް ޕްލަސް އާއި ރާއްޖެ ޓީވީއާއެކު ވެސް އިއްޔެ އުރީދޫން ސޮއިކުރި -- ފޮޓޯ: އުރީދޫ
ފުޓުބޯޅައިގެ އެންމެ ބޮޑު އީދު ކަމުގައިވާ ފީފާ ވޯލްޑު ކަޕު ގަތަރު 2022 ފަށާނީ ނޮވެމްބަރު 20ގަ އެވެ. އެ މުބާރާތަށް ތައްޔާރުވުމުގެ ގޮތުން ސަޕޯޓަރުންނަށް ހާއްސަކޮށްގެން މީޑިއާނެޓާއި ޕާޓުނަރުން ގުޅިގެން ރާއްޖޭގެ އެކި ކަންކޮޅުތަކުގައި ބޮޑު ސްކްރީންތައް ބެހެއްޓުމާއި ރޯޑުޝޯތައް ބޭއްވުމަށް ވަނީ ހަމަޖެހިފަ އެވެ.
