މޯލްޑިވްސް މީޓިއޮރޯލޮޖިކަލް ސާވިސް (މެޓް އޮފީސް) އިން މިރޭ މެންދަމު އާންމުކުރި ސެޓްލައިޓު ފޮޓޯއިން ފެންނަ ގޮތުގައި ގާތްގަނޑަކަށް މުޅި ރާއްޖެ އެ ވަނީ ބޯ ވިލާތަކުން ބައްދައިލައިފަ އެވެ.
އެއީ ހުޅަނގު މޫސުމުގެ ބާރުގަދަ ވިލާތަކެވެ. ބޯކޮށް ވާރޭ ވެހޭނެ އެވެ. ރަށްތަކަކަށް އުދަ އަރާނެ ކަމަށް ވެސް މެޓް އޮފީހުން ލަފާކުރެ އެވެ.
ބުރާސްފަތި ދުވަހާއި ހުކުރު ދުވަހު ދިޔަވަރު އެންމެ ބޮޑު ވަނީ މެންދަމާއި މެންދުރު ވަގުތުގަ އެވެ.
ވިލާގަނޑުގައި ގުގުރުމާއެކު ބޯކޮށް ވާރޭ ވެހި، 45 މޭލަށް ވައި ވެސް ގަދަ ވާނެ ކަމަށް ވަނީ ލަފާކޮށްފަ އެވެ.
މެޓު އޮފީހުން މިރޭ ބުނެފައި ވަނީ ކުރިއަށް އޮތް ހަތަރު ދުވަހު މޫސުމް ގޯސް ވާނެ ކަމަށް ލަފާކުރެވޭ ކަމަށާއި އުތުރާއި މެދުރާއްޖޭގެ ތެރޭގައި ވައި ބާރުވެ، ކަނޑުތައް ވެސް ގަދަވާނެ ކަމަށެވެ.
ހުރިހާ ފަރާތްތަކަކުން ވެސް، ހާއްސަކޮށް ކަނޑުދަތުރުފަތުރު ކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް މެޓް އޮފީހުން އިލްތިމާސްކުރެ އެވެ.
