ޕެރިސް (ސެޕްޓެމްބަރު 9) - ފްރާންސް ލީގުގައި ރޭ ރެއިމްސް އާއި ޕީއެސްޖީ ބައްދަލުކުރި މެޗު ލަނޑެއް ނުޖެހި އެއްވަރުވިއިރު، ޕޮއިންޓަކާ އެކު ވެސް މި މެޗުގެ ބޮޑުބައި ދިހަ މީހުންނާ އެކު ކުޅުނު ޕީއެސްޖީ އަށް ލީޑު ފުޅާކުރެވިއްޖެ އެވެ.
ރެއިމްސްއާ ދެކޮޅަށް ކުޅުނު މެޗު އެއްވަރުވިޔަސް، ތާވަލްގެ އެއް ވަނައިގައި އޮތް ޕީއެސްޖީ އަށް ޕޮއިންޓަކާ އެކު ވެެސް ލީޑު ފުޅާކުރެވުނީ ތާވަލްގެ ދެވަނައިގައި އޮތް މާސޭ ލީގުގައި ރޭ ކުޅުނު މެޗުން ބަލިވުމުންނެވެ.
ރެއިމްސްގެ ދަނޑުގައި ރޭ ކުޅުނު މެޗަށް ޕީއެސްޖީން ނުކުތީ ބައެއް ބަދަލުތަކާ އެކު އެވެ. އެ ގޮތުން ބްރެޒިލްގެ ފޯވަޑް ނޭމާ އާއި ޑިފެންޑަރު އަޝްރަފް ހަކީމީ ރޭގެ މެޗު ފެށީ ބެންޗުންނެވެ.
މެޗުގެ ފުރަތަމަ ހާފު ނިމެނިކޮށް، ޕީއެސްޖީގެ ތަޖުރިބާކާރު ޑިފެންޑަރު, ސާޖިއޯ ރާމޮސް އަށް ވަނީ ދެ ވަނަ ރީނދޫ ކާޑާ އެކު، ރަތްކާޑު ދައްކައިފަ އެވެ. ރާމޮސް އަށް ދެ ކާޑު ވެސް ދެއްކީ ރެފްރީގެ ނިންމުމަކާ މެދު ހިތްހަމަޖެހުން ފާޅުކުރަމުށް އޭނާ ބުނި އެއްޗެއްގެ ސަބަބުންނެވެ. މިއީ ރާމޮސްގެ ކެރިއަރުގައި އޭނާ އަށް ދެއްކި 28 ވަނަ ރަތްކާޑެވެ.
"އަހަންނަށް ހީވަނީ އެއީ ރާމޮސް ރެފްރީއާ ދިމާލަށް ބުނި އެއްޗެއް ނޫންހެން،" ޕީއެސްޖީގެ ކޯޗު ކްރިސްޓޯފް ގަލްޓިއޭ ބުންޏެވެ.
"އެއީ އާންމުކޮށް ސްޕެއިންގައި (ދަނޑުމަތީގައި އެކަކު އެނަކަކަށް) ބޭނުންކުރާ ބަސްތަކެއް. އެކަމަކު ރެފްރީ އަށް ހީވީ އެއީ (ރާމޮސް) ރެފްރީއާ ދިމާލަށް ބުނި އެއްޗެއް ކަމަށް."
މެޗުގެ ފަހުކޮޅު ވެސް ދެ ޓީމުން ކުރި ފައުލަތަކާ ގުޅިގެން ދެ ޓީމުގެ ކުޅުންތެރިން ހޫނުވެ، ރީނދޫ ކާޑުތަކެއް ވަނީ ފެނިފަ އެވެ.
ތާވަލްގެ ދެ ވަނައިގައި އޮތް މާސޭ ވަނީ ރޭ ކުޅުނު މެޗުގައި ތާވަލްގެ ފުލުގައި އޮތް އަޖާސިއޯ އަތުން 2-1 އިން ބަލިވެފަ އެވެ. މިއީ މި ސީޒަންގެ ފްރާންސް ލީގުގައި މާސޭ ބަލިވި ފުރަތަމަ މެޗެވެ.
މާސޭގެ ދަނޑުގައި ކުޅުނު މެޗުގެ 15 ވަނަ މިނިޓުގައި ލިބުނު ޕެނަލްޓީއަކުން އެ ޓީމަށް ލީޑު ހޯދައިދިނީ ތަޖުރިބާކާރު މިޑްފީލްޑަރު ޑިމީޓްރީ ޕަޔެޓް އެވެ. މިއީ ޕަޔެޓް ،35، ފްރާންްސް ލީގުގައި ޖެހި 100 ވަނަ ލަނޑެވެ. ޕަޔެޓަކީ ފްރާންސް ލީގުގައި 100 ގޯލު ޖަހައި، 100 ގޯލު ޖަހަން ފުރުސަތު ތަނަވަސްކޮށްދިން ފުރަތަމަ ކުޅުންތެރިޔާ އެވެ.
އެކަމަކު، މެޗުގެ 25 ވަނަ މިނިޓުގައި އަޖާސިއޯގެ ފޯވަޑް ބެވިކް މުސީޓީ އޮކޯ ވަނީ ލަނޑެއް ޖަހައި މެޗުގެ ނަތީޖާ އެއްވަރުކޮށްފަ އެވެ.
މެޗުގެ 47 ވަނަ މިނިޓުގައި އަޖާސިއޯ އަށް ލީޑު ލިބުނީ މާސޭގެ ޑިފެންޑަރު ލިއޮނާޑޭ ބަލޭޑީ އަތުން ބައިކޮޅަށް ވަތް ލަނޑަކުންނެވެ.
"އަހަރެން އުންމީދެއް ނުކުރަން މުޅި ސީޒަން ބަލިނުވެ ނިންމާލެވޭނެކަމަށް،" މެޗަށް ފަހު ރުޅިގަދަވެފައި ހުރި މާސޭގެ ކޯޗު އީގޯ ޓޫޑޯ ބުންޏެވެ.
"އެކަމަކު އަމިއްލަ ދަނޑުގައި ތާވަލްގެ ފުލުގައި އޮތް ޓީމު އަތުން ބަލިވުމަކީ ބަލައިގަންނަން އުނދަގޫ ނަތީޖާއެއް."
ޕީއެސްޖީ ތާވަލްގެ އެއްވަނައިގައި އޮތީ 26 ޕޮއިންޓާ އެކު އެވެ. ދެ ވަނައިގައި މާސޭ އޮތީ 23 ޕޮއިންޓާ އެކު އެވެ. ލީގުގައި އަންނަ ހަފުތާ ކުޅޭ މެޗުގައި ޕީއެސްޖީ އާއި މާސޭ ކުރިމަތިލާނެ އެވެ.
