ލަންޑަން (އޮކްޓޫބަރު 8) - އިނގިރޭސި ޕްރިމިއާ ލީގުގައި މިރޭ ސައުތެމްޓަން އަތުން 4-0 އިން މޮޅުވެ، މެންޗެސްޓާ ސިޓީ ލީގުގެ އެއް ވަނަ އަށް ޖެހިލިއިރު، ޗެލްސީ އާއި ޓޮޓެންހަމް ހޮޓްސްޕާސް އިން މުހިންމު މޮޅެއް ހޯދައިފި އެވެ.
މިރޭ ކުޅުނު މެޗުން ޗެލްސީން އަމިއްލަ ދަނޑުގައި ވުލްވްސް އަތުން މޮޅުވީ 3-0 އިންނެވެ. އަދި ބްރައިޓަންގެ ދަނޑުގައި ޓޮޓެންހަމް މޮޅުވީ ހެރީ ކޭން ޖެހި ހަަމައެކަނި ގޯލުން 1-0 އިންނެވެ.
ސިޓީ އެއް ވަނައިގައި އޮތީ ނުވަ މެޗުން 23 ޕޮއިންޓާ އެކު އެވެ. ދެ ވަނައިގައި އޮތް އާސެނަލަށް އަށް މެޗުން ވަނީ 21 ޕޮއިންޓް ލިބިފަ އެވެ. އާސެނަލް މާދަމާރޭ އަމިއްލަ ދަނޑުގައި ލިވަޕޫލް އަތުން މޮޅުވެގެން ލީގުގެ އެއް ވަނަ އަށް އެރޭނެ އެވެ. ނުވަ މެޗުން 20 ޕޮއިންޓް ހޯދައިގެން ޓޮޓެންހަމް ލީގުގެ ތިން ވަނައިގައި އޮތްއިރު، ޗެލްސީ ހަތަރެއްގައި އޮތީ އަށް މެޗުން 16 ޕޮއިންޓާ އެކު އެވެ.
އިއްތިހާދު ސްޓޭޑިއަމްގައި ސިޓީން މިރޭ އަމިއްލަ ސަޕޯޓަރުންގެ ކުރިމަތީގައި ލީޑުނެގީ 20 ވަނަ މިނިޓްގައި ޔާއޯ ކަންސޭލޯ ޖެހި ގޯލުންނެވެ. މެޗުގެ 32 ވަނަ މިނިޓްގައި ކެވިން ޑި ބްރޭނާ ދިން ބޯޅައަކުން ސިޓީ އަށް ލީޑުފުޅާކޮށްދިނީ ފިލް ފޯޑެން އެވެ. ދެ ވަނަ ހާފްގެ ކުޅުން ފެށިގެން ހަތަރު މިނިޓް ތެރޭ ރޮޑްރީ ތަނަަވަސްކޮށްދިން ފުރުސަތެއްގައި ރިޔާދު މާރޭޒް ވަނީ ސިޓީގެ ހަތަރު ވަނަ ގޯލު ޖަހައިފަ އެވެ.
ކަންސޭލޯ ދިން ބޯޅައަކުން މެޗުގެ 65 ވަނަ މިނިޓްގައި ސިޓީގެ ހަތަރު ވަނަ ގޯލު ޖެހީ މި ވަގުތު ރަނގަޅު ފޯމެއް ދަމަހައްޓަމުން އަންނަ އާލިން ބްރައުޓް ހާލަންޑް އެވެ. ހާލަންޑް މި ވަނީ 13 މެޗުން 20 ގޯލު ޖަހައިފަ އެވެ. މީގެ ތެރެއިން ލީގުގައި ޖަހާފައިވަނީ ނުވަ މެޗުން 15 ގޯލެވެ.
ޗެލްސީގެ ބްރޯޔާ ގޯލު ޖެހުމަށް ފަހު އުފާފާޅުކުރަނީ.
ޗެލްސީން ވަނީ މިރޭގެ މެޗުގައި ވުލްވްސްއާ ދެކޮޅަށް ޖުމްލަކޮށް ބަލާއިރު ރަނގަޅު ކުޅުމެއް ދައްކައިފަ އެެވެ. ފުރަތަމަ ހާފުގެ އިތުރު ވަގުތުގައި ޗެލްސީން ލީޑުނެގީ ކައި ހަވާޓްޒް ޖެހި ގޯލުންނެވެ. މިއީ މޭސަން މައުންޓް ނެގި ހުރަހަކުން ހަވާޓްޒް ބޮލުން ޖެހި ގޯލެކެވެ. ދެ ވަނަ ހާފްގެ ކުޅުން ފެށިގެން ނުވަ ވަނަ މިނިޓްގައި ކްރިސްޓިއަން ޕުލިސިޗް ވަނީ ޗެލްސީގެ ލީޑުފުޅާކޮށްދީފަ އެވެ.
މި މެޗުގައި ޗެލްސީގެ ތިން ވަނަ ގޯލު ޖެހީ ބަދަލަކަށް ކުޅެން އެރި ފޯވާޑް އަރްމާންޑޯ ބްރޯޔާ އެވެ. މިއީ އޭނާ ޗެލްސީ އަށް ޖަހައިދިން ފުރަތަމަ ލީގު ގޯލެވެ. މިއީ ޗެލްސީގެ ކޯޗުގެ ގޮތުގައި ގްރަހަމް ޕޮޓާ އަމިއްލަ ދަނޑުގައި ހޯދި ފުރަތަމަ މޮޅެވެ.
ލީގުގައި މިރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ބޯންމައުތުން ވަނީ އަމިއްލަ ދަނޑުގައި 2-1 އިން ފަހަތުން އަރައި ލެސްޓާ ސިޓީ ބަލިކޮށްފަ އެވެ. ނިއުކާސަލް ޔުނައިޓެޑް ވަނީ އަމިއްލަ ދަނޑުގައި 5-1 އިން ބްރެންޓްފޯޑްގެ މައްޗަށް ކާމިޔާބު ހޯދައިފަ އެވެ.
