ވިކިލީކްސްގެ ފައުންޑަރު ޖޫލިއަން އަސާންޖަށް ތާއީދު ކުރާ މީހުން އިނގިރޭސި ޕާލަމެންޓު ވަށާލައި "ޗޭނެއް" ހަދައި، އޭނާ މިނިވަން ކުރަން ގޮވާލައިފި އެވެ.
އެއްވި މީހުންގެ ތެރޭގައި އިނގިރޭސި އިދިކޮޅު ލޭބާ ޕާޓީގެ ކުރީގެ ލީޑަރު ޖެރެމީ ކޯބީން ވެސް ހިމެނެ އެވެ. އެ މީހުން ވަނީ ޕާލަމެންޓުން ފެށިގެން ގޮސް ތޭމްސް ކޯރާ ހަމައަށް "ޗޭނެއް" ހަދައިފަ އެވެ.
އޮސްޓްރޭލިއާގެ އެކްޓިވިސްޓް އަސާންޖްގެ އަންހެނުން ސްޓެލާ ބުނީ އިނގިރޭސި ސަރުކާރުން އިސްނަގައިގެން ފިޔަވަޅު އަޅަން ޖެހޭ ކަމަށެވެ.
އަސާންޖް ބަންދުކޮށްފައި ހުރީ އިނގިރޭސިވިލާތުގަ އެވެ. އެމެރިކާއިން 2019 ވަނަ އަހަރު ވަނީ އޭނާ އެމެރިކާއަށް ގެންދަން "އެކްސްޓްރަޑިޝަން" ގެ މަސައްކަތް ފަށައިފަ އެވެ.
"މިހާރު ވެސް މިކަން ކުރިއަށްދާތާ ތިން އަހަރާއި ހަ މަސް ވެއްޖެ. މިއީ އިނގިރޭސިވިލާތާއި ބައިޑެން ސަރުކާރަށް އޮތް ބޮޑު ލައްގަނޑެއް،" ސްޓެލާ ބުންޏެވެ.
އަސާންޖްގެ ސަޕޯޓަރުން އެމެރިކާގެ ވޮޝިންޓަނުގައި ހުންނަ ޑިޕާޓްމަންޓް އޮފް ޖަސްޓިސްގެ ބޭރުގައި އެއްވެ އަޑު އުފުލުމަށް ވެސް ހަމަޖެހިފައިވެ އެވެ.
އުމުރުން 51 އަހަރުގެ އަސާންޖްއާ ދެކޮޅަށް 18 ދައުވާއެއް އުފުލަން އެމެރިކާއިން ބޭނުންވެ އެވެ. އޭގެ ތެރޭގައި އެމެރިކާގެ އަސްކަރީ އަދި ޑިޕްލޮމެޓިކް ކަންކަމާ ގުޅޭ ސިއްރު ލިޔުންތައް ވިކިލީކްސް މެދުވެރިކޮށް އާއްމު ކުރުމުން ޖާސޫސް ކުރުމުގެ ދައުވާ ހިމެނެ އެވެ.
އެމެރިކާއިން ބުނީ އަސާންޖްގެ ސަބަބުން ގިނަ ބަޔެއްގެ ފުރާނަ ނުރައްކަލަށް ހުށަހެޅޭ ކަމަށެވެ. އެކަމަކު އޭނާގެ ސަޕޯޓަރުން ބުނަނީ އަފްގާނިސްތާނާއި އިރާގުގައި އެމެރިކާއިން ހިންގާފައިވާ ޖަރީމާތައް ހާމަކުރުމުން، އެމެރިކާއިން އޭނާއަށް ޓާގެޓުކޮށްފައިވާ ކަމަށެވެ.
އަސާންޖް އެމެރިކާއާ ހަވާލުކުރުމަށް އިނގިރޭސިވިލާތުން ވެސް ނިންމާފައި ވާތީ، އޭނާގެ ގާނޫނީ ޓީމުން ވަނީ އިނގިރޭސިވިލާތުގެ ހައި ކޯޓަށް މައްސަލަ ހުށަހަޅާފަ އެވެ.
