ފަނޑިޔާރުންގެ ސުލޫކީ މައްސަލަތައް ބަލައި ފިޔަވަޅު އެޅުމަށް ގާނޫނު އަސާސީގެ ދަށުން އުފައްދާފައިވާ ޖުޑީޝަލް ސާވިސް ކޮމިޝަން އެކުލެވިގެންވާ ގޮތް އިސްލާހު ކުރަމުންދާއިރު އެކަމަށް އާންމުގެ ހިޔާލު ވެސް ހޯދުމަށް ބަންޑާރަ ނައިބުގެ އޮފީހުން ބުނެފި އެވެ.
ޖޭއެސްސީ އެކުލެވިގެންވާ ގޮތް އިސްލާހު ކުރުމަށްޓަކައި މުރާޖައު ކުރުމުގެ މަސައްކަތްްތައް ބަންޑާރަ ނައިބުގެ އޮފީހުން ފެށީ މިދިޔަ ބުރާސްފަތި ދުވަހެވެ. އޭގެ ފަހުން، ޖޭއެސްސީ އެކުލެވިގެންވާ ގޮތް މުރާޖައު ކުރުމަށް ޖަމިއްޔާތަކަށް ވެސް އޮތީ ހުޅުވާލައިފަ އެވެ.
"އިސްވެ ދެންނެވި ބިލު އެކުލަވާލުމުގައި، ޝަރުއީ ދާއިރާ އާއި ކަމާބެހޭ އެނޫން ވެސް ފަރާތްތަކާ މަޝްވަރާކުރުމުގެ އިތުރުން، ރައްޔިތުންގެ ހިޔާލު ހޯދުމަކީ މުހިންމު ކަމެއް ކަމުގައި ފެންނާތީ، ކަމާގުޅޭގޮތުން ޢާންމުންގެ ހިޔާލު ހޯދުމަށްޓަކައި، އެ ފުރުޞަތު ޢާންމުކޮށް ހުޅުވާލަން،" ބަންޑާރަ ނައިބުގެ އޮފީހުން ބުނެފައިވެ އެވެ.
އާންމުންނަށް ދެގޮތަކަށް ހިޔާލު ހުށަހެޅިދާނެ އެވެ. އެއް ގޮތަކީ އޮންލައިން ފޯމެއް ފުރުމެވެ. އަނެއް ގޮތަކީ އެ އޮފީހަށް އީމެއިލް ކުރުމެވެ. އާންމުނަށް ހިޔާލު ހުށަހެޅުމުގެ ސުން ގަޑިއަކީ އޮކްޓޯބަރު 20، އެވެ.
ފެހި ގާނޫނު އަސާސީގެ ދަށުން ސެޕްޓެމްބަރު 4، 2008 ގައި އެކުލަވާލި ޖޭއެސްސީގައި 10 މެމްބަރުން ތިއްބަވަ އެވެ. އެއީ ރައްޔިތުންގެ މަޖިލީހުގެ ރައީސާއި އެ މަޖިލީހުންގެ ކަނޑައަޅާ މެމްބަރަކާއި ރައީސުލްޖުމްހޫރިއްޔާ ކަނޑަައަޅުއްވާ މެމްބަރަކާއި ބަންޑާރަ ނައިބާއި ސުޕްރީމް ކޯޓުގެ ފަނޑިޔާރަކާއި ހައި ކޯޓުގެ ފަނޑިޔާރަކާއި ދަށު ކޯޓުތަކުން ކަނޑައަޅާ ފަނޑިޔާރަކާއި ސިވިލް ސާވިސް ކޮމިޝަނުގެ ރައީސާއި ވަކީލުންގެ ތެރެއިން މީހަކާއި އާންމުންގެ ތެރެއިން ނަގާ މީހެކެވެ.
ނަމަވެސް ޖޭއެސްސީގައި ސިޔާސީ މެމްބަރުން ގިނަވުމުން، އެންމެ އެކަށީގެންވާ ގޮތަށް އެ ކޮމިޝަން ނުހިންގޭ ކަމަށް ފުރަތަމަ ދުވަހުން ވެސް ބައެއް ފަރާތްތަކުން ދިޔައީ ކިޔަމުންނެވެ. ޖޭއެސްސީއަށް "ބޮޑު ބަދަލުތަކެއް" ގެނައުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ. އެމަނިކުފާނު ވިދާޅުވެފައި ވަނީ ޖޭއެސްސީ ސިޔާސީ ނުފޫޒުން ސަލާމަތްކޮށް، ފަނޑިޔާރުންނަށް ފުރުސަތު ދިނުމާއެކު މެމްބަރުންގެ ދައުރަކީ ތިން އަހަރު ކަމަށް ކަނޑައަޅުއްވާނެ ކަމަށެވެ.
