ޖުޑިޝަލް ސާވިސް ކޮމިޝަން (ޖޭއެސްސީ) އެކުލެވިގެންވާ ގޮތް ބަދަލުކުރުމަށްޓަކައި އެޓާނީ ޖެނެރަލްގެ އޮފީހުން ކުރިއަށް ގެންދާ މަޝްވަރާގައި ބައިވެރިވުމުގެ ފުރުސަތު މަދަނީ ޖަމިއްްޔާތަކަށް ހުޅުވާލައިފި އެވެ.
ޖޭއެސްސީ ބަދަލުކުރުމުގެ މަޝްވަރާގައި ބައިވެރިވާން އޭޖީ އޮފީހުން މަދަނީ ޖަމިއްޔާތަކަށް ހުޅުވައިލީ ރޭގެ ވަގުތެއްގަ އެވެ. އެކަމަށް ޝައުގުވެރިވާ ޖަމިއްޔާތަކުން ފުރަން ޖެހޭނީ އޮންލައިން ފޯމެކެވެ.
އޭޖީ އޮފީހުން މީގެ ކުރިން ބުނެފައިވަނީ، ޖޭއެސްސީ އަކީ ދެފުށް ފެންނަ، ސިޔާސީ ނުފޫޒުން އެއްކިބާވެފައިވާ މުއައްސަސާއެއްކަން ކަށަވަރު ކުރުމަށްޓަކައި، ކަމާ ގުޅޭ ބައިނަލްއަގްވާމީ ހަމަތަކާއި އުސޫލުތަކަށް ރިއާޔަތްކޮށް، އެ ކޮމިޝަން އެކުލެވިގެންވާ ގޮތް ބަދަލު ކުރުމަށް ގާނޫނު އަސާސީގެ 158 ވަނަ މާއްދާއަށް އިސްލާހު ގެނައުމަށް ރައްޔިތުންގެ މަޖިލީހުގެ މިހާރު ހިނގަމުންދާ ދައުރަށް ބިލެއް ހުށަހެޅުމަށް ނިންމާފައިވާ ކަމަށެވެ.
އެ ބިލު އެކުލަވާލުމުގެ ގޮތުން ރާއްޖޭގެ ކޯޓުތަކާއި ޖޭއެސްސީ އާއި އެ ނޫން ކަމާގުޅޭ އެންމެހާ އިދާރާތަކާ މަޝްވަރާ ކުރާނެ ކަމަށް ވެސް އޭޖީ އޮފީހުން ބުނެފައިވެ އެވެ.
އެ މަޝްވަރާތައް ފަށައި، ޖޭއެސްސީ އާއި ސުޕްރީމް ކޯޓުގެ އިތުރުން، ހައި ކޯޓާއި ސްޕީރިއާ ކޯޓުތަކާ ވަނީ ބައްދަލުކޮށްފަ އެވެ. މަޝްވަރާތަކުގެ އިތުރު ތަފްސީލެއް ނުދެ އެވެ.
ޖޭއެސްސީގައި މަޖިލީހުގެ ރައީސް އާއި، މަޖިލީހުގެ މެންބަރަކާއި، އާންމުންގެ ތެރެއިން މަޖިލީހުން ކަނޑައަޅާ މެންބަރަކާއި، ރައީސް ކަނޑައަޅާ މެންބަރަކާއި، ބަންޑާރަ ނައިބު އިންނަވަން ޖެހެ އެވެ. އަދި ސުޕްރީމް ކޯޓުގެ ފަނޑިޔާރަކާއި، ހައި ކޯޓުގެ ފަނޑިޔާރަކާއި، ދަށު ކޯޓުގެ ފަނޑިޔާރަކާއި، ސިވިލް ސާވިސް ކޮމިޝަންގެ ރައީސްއާއި، ވަކީލުންގެ ތެރެއިން އިންތިހާބު ކުރެވޭ ވަކީލަކު އިންނަވަން ޖެހެ އެވެ.
ސަރުކާރުން ޖޭއެސްސީ އެކުލެވިގެންވާ ގޮތް ބަދަލުކުރުމަށް ހުށަހަޅަނީ ކޮން ގޮތަކަށް ކަމެއް ހާމަކޮށްފައެއް ނުވެ އެވެ. ޖޭއެސްސީ އެކުލެވިގެންވާ ގޮތް ބަދަލުކޮށް ސިޔާސީ ނުފޫޒުން އެ ކޮމިޝަން މިނިވަންކުރުމަކީ މި ސަރުކާރު ވެރިކަމަށް އައުމަށް ވި ބޮޑު ވައުދެކެވެ.
