ތައިލޭންޑުގެ އިރުއުތުރުގައި ހުންނަ ޑޭކެއާ ސެންޓަރެއްގައި ވަޅި އާއި ބަޑިން ދިން ހަމަލާއެއްގައި 37 މީހުން މަރުވެއްޖެ އެވެ.
އެ ހަމަލާ ދިނީ ކުރިން ފުލުސް ވަޒީފާ އަދާ ކުރި މީހެކެވެ. ނޮންގް ބުއާ ލަމްފޫ ޕްރޮވިންސްގެ ޑޭކެއާގައި ހަމަލާ ދިނުމަށް ފަހު އޭނާ ފިލި އެވެ.
ހަމަލާއަށް ފަހު ފިލުމުން، ހޯދަން އިއުލާންކޮށްފައި.
އެ މީހާ ހޯދަން ފުލުހުންގެ އޮޕަރޭޝަން ފެށުމާ އެކު އާއިލާގެ އެންމެން މަރާލައި އަމިއްލައަށް މަރުވި އެވެ. ޑޭކެއާގައި ގިނަ އަދަދެއްގެ ކުޑަކުދިން މަރުވި އެވެ.
ފުލުހުން ބުނީ އުމުރުން 34 އަހަރުގެ ފިރިހެން މީހާ މިދިޔަ ޖޫން މަހު ވަޒީފާއިން ވަކިކުރީ މަސްތުވާތަކެތި ބޭނުން ކުރާތީ ކަމަށެވެ.
ހަމަލާ ދިނީ ކީއްވެ ކަމެއް ނޭނގެ އެވެ. އުއްތައި ސަވަން އަވަށުގައި ދިން ހަމަލާގައި މަރުވި މީހުންގެ ތެރޭގައި މަދުވެގެން 22 ކުދިން ހިމެނެ އެވެ.
އޭގެ ތެރެއިން ބައެއް ކުދިންނަކީ އުމުރުން ކިރިޔާ ދެ އަހަަރު ފުރިފައި ތިބި ކުދިންނެވެ. އެ ކުދިންނަށް ހަމަލާ ދިނީ ނިދާފައި ތިއްބަ އެވެ.
ސްކޫލެއްގެ ގޮތުގައި ހިންގާ ޑޭކެއާގެ އެންމެ އިސް ޓީޗަރު ނަންތިޗާ ޕަންޗުމް ބުނީ ހަމަލާ ދިން މީހާގެ ފިރިހެން ދަރިފުޅު ވެސް ކުރިން ދިޔައީ އެ ސެންޓަރަށް ކަމަށެވެ.
އެކަމަކު އެ ކުއްޖާ ހާޒިރު ނުވާތާ މިހާރު މަހެއް ވެއްޖެ އެވެ. ޕަންޗުމް ބުނީ ދަރިފުޅު ގޮވައިގެން އެ ތަނަށް ދަނީ އެ ފިރިހެން މީހާ ކަމަށާއި އޭނާ އަބަދުވެސް ވާހަކަދައްކަނީ ވަރަށް އިހްތިރާމާ އެކު ކަމަށެވެ.
އާއްމުކޮށް އެ ޑޭކެއާގައި ކޮންމެ ދުވަހަކު ވެސް 90 ވަރަކަށް ކުދިން ތިބެ އެވެ. އެކަމަކު ބުރާސްފަތި ދުވަހު މޫސުން ގޯސްވުމުގެ ސަބަބުންނާއި ބަސް ހަލާކުވުމުގެ ސަބަބުން ތިބީ 20 ވަރަކަށް ކުދިންނެވެ.
ބޮޑު ވަޒީރު ޕްރަޔުތް ޗަން އޮޗާ ވަނީ އެ ހަމަލާއާ ގުޅިގެން ހިތާމަ ފާޅުކުރައްވައިފަ އެވެ. ތައިލޭންޑްގައި ބަޑި ޖަހައި އެއް ފަހަރާ ގިނަ މީހުން މެރުމުގެ ހާދިސާތައް ވަރަށް ނުހިނގަ އެވެ.
އެހެން ނަމަވެސް ގަވާއިދާ އެއް ގޮތަށް އަދި ވަގަށް ވެސް ތައިލޭންޑްގެ ގިނަ ބަޔަކު ބަަޑި ގެންގުޅޭ ކަމަށް ރޮއިޓާޒް ނޫހުން ބުނެ އެވެ.
