ލަންޑަން (އޮކްޓޫބަރު 6) - މެންޗެސްޓާ ސިޓީ އަށް ކުޅެމުން އަންނަ އިނގިރޭސި ޑިފެންޑަރު، ކައިލް ވޯކާ އުކުޅުވަޅަށް ލިބުނު އަނިޔާއަކާ ގުޅިގެން ކުރި އޮޕަރޭޝަނަށް ފަހު ވޯލްޑް ކަޕަށް ފިޓްވުމުގެ ބިރާ ކުރިމަތިލާން ޖެހިއްޖެ އެވެ.
މިދިޔަ އާދިއްތަ ދުވަހު ސިޓީން 6-3 އިން މެންޗެސްޓާ ޔުނައިޓެޑް ބަލިކުރި މެޗުގެ ފުރަތަމަ ހާފުގައި ވޯކާ، 32، އަށް އަނިޔާވެގެން ވަނީ ބަދަލުކޮށްފަ އެވެ.
ވޯކާގެ އެ އަނިޔާގެ ތަފްސީލް ދެނެގަންނަން ހެދި ޓެސްޓްތަކުން އެނގުނީ ވޯކާ އޮޕަރޭޝަނެއް ނުކޮށް، އަރާމްކޮށްގެން އެނބުރި ކުޅުމަށް އަތުވެއްޖެނަމަ އަނެއްކާ ވެސް އެ ފަދަ އަނިޔާއެއް ތަކުރާރުވުމުގެ ފުރުސަތު އޮންނާނެ ކަމެވެ. އެހެންވެ، ސިޓީގެ މެޑިކަލް ޓީމުގެ ލަފަޔާ އެކު ވޯކާ ވަނީ އޮޕަރޭޝަން ކޮށްފަ އެވެ.
ފިޓްވެގެން ވޯކާ އަށް އެނބުރި ދަނޑަށް އާދެވޭނެ ތާރީހެއް ސިޓީން ހާމަކޮށްފައިނުވާއިރު، އިނގިރޭސި މީޑިއާ ރިޕޯޓްތައް ބުނާގޮތުން އަންނަ މަހުގެ ވޯލްޑް ކަޕަށް ފިޓްވެގެން ވޯކާ އަށް އެނބުރި އާދެވުމުގެ ފުރުސަތު އަދި އޮތީ ހަނިކޮށެވެ.
ވޯލްޑް ކަޕްގައި އިންގްލެންޑް ކުޅެން ޖެހޭ ފުރަތަމަ މެޗު އޮތީ އަންނަ މަހުގެ 21 ވަނަ ދުވަހު އީރާނާ ދެކޮޅަށެވެ.
ޔުނައިޓެޑް އަތުން .މޮޅުވި މެޗުގެ ތެރެއިން ވޯކާ އަށް ދަނޑުމަތީގައި ފަރުވާދެނީ.
އިންގްލެންޑް ގައުމީ ޓީމަށް 70 މެޗު ކުޅެދީފައިވާ ވޯކާ އަކީ އެ ޓީމުގެ ކޯޗު ގަރެތު ސައުތުގޭޓުގެ ޕްލޭނަށް މުހިންމު ކުޅުންތެރިއެކެވެ.
އިންގްލެންޑުން ފަސް ޑިފެންޑަރުން ލައިގެން ކުޅޭއިރު، ސެންޓްރަލް ޑިފެންސްގެ ތިން ކުޅުންތެރިންގެ ތެރޭގައި ވޯކާ ބޭނުންކުރާއިރު، ބައެއް ފަހަރު ފުލްބެކުގެ މަގާމަށް ވެސް އޭނާ ލަ އެވެ.
ވޯކާ، ވޯލްޑް ކަޕަށް ފިޓްނުވެއްޖެނަމަ އިންގްލެންޑުން ވޯލްޑް ކަޕަށް ނަގާ ސްކޮޑުން އެ ޖާގަ ދޭނެ ކަަމަށް ބެލެވެނީ ލިވަޕޫލްގެ ޓްރެންޓް އަލެކްސަންޑާ އާނޯލްޑް އަށެވެ. އެންމެ ފަހުން ނޭޝަންސް ލީގުގައި އިންގްލެންޑުން ކުޅުނު މެޗުތަކަށް ނެގި މެޗު ސްކޮޑުން އާނޯލްޑަށް ފުރުސަތު ނުލިބުނެވެ.
ވޯލްޑް ކަޕްގައި ވާދަކުރާ 32 ޓީމުން މުބާރާތުގައި ބޭނުންކުރާނެ ސްކޮޑެއް ފައިނަލް ކުރަން ދީފައިވާ އެންމެ ފަހުގެ މުއްދަތަކީ އަންނަ މަހުގެ 13 އެވެ.
