ޓިއުރިން (އޮކްޓޫބަރު 3) - އިޓާލިއަން ލީގުގައި ރޭ ބޮލޯނިއާ އަތުން 3-0 އިން މޮޅުވެ، ޔުވެންޓަސް އިން އެ ޓީމަށް ކުރިމަތިވެފައިވާ ޕްރެޝަރަށް ހަމަޖެހުމެއް ހޯދައިފި އެވެ.
މި މޮޅާ އެކު ޔުވެންޓަސްގެ ކޯޗު މެސިމޯ އަލެގްރީ އަށް އޮތް ޕްރެޝަރަށް ވެސް ކޮންމެވެސް ވަރެއްގެ ލުޔެއް ލިބޭނެ އެވެ. މި މެޗުގެ ކުރިން ޔުވެންޓަސް އިން އެންމެ ފަހުން ކުޅުނު ފަސް މެޗު ވެސް ނިންމާލީ މޮޅެއް ނުލިބި އެވެ.
"ގާތްގަނޑަކަށް މަހެއްހާ ދުވަހުގެ އިންތިޒާރެއް މި ކުރަން ޖެހުނީ މޮޅަކަށް. އެހެންވީމަ މި މެޗު ނިންމާލާފައި ޑްރެސިން ރޫމަށް ޓީމު ދިޔައިރު، ކޮންމެވެސް ކަމެއް ބަދަލުވެއްޖެކަމުގެ އިހުސާސާއި ޓީމާ މެދު އޮތް ޔަގީންކަން އިތުރުވެއްޖެ،" އަލެގްރީ ބުންޏެވެ.
މިއީ މި ފަހަރު ލީގުގައި ކުޅުނު އަށް މެޗުގެ ތެރެއިން ޔުވެންޓަސް ހޯދި ތިން ވަނަ މޮޅެވެ. އެއް މެޗުން ބަލިވިއިރު، ހަތަރު މެޗުން ވަނީ އެއްވަރުވެފަ އެވެ. ޔުވެންޓަސް ލީގުގެ ހަތް ވަނައިގައި 13 ޕޮއިންޓާ އެކު އޮތީ އެއް ވަނައިގައި އޮތް ނަޕޯލީއާ ދެމެދު ހަތް ޕޮއިންޓްގެ ފަރަގަކާ އެކު އެވެ.
ލީގުގެ އެއް ވަނައިގައި އޮތް ނަޕޯލީ އަށް އަށް މެޗުން 20 ޕޮއިންޓް ލިބިފައިވާއިރު، ދެ ވަނައިގައި އޮތް އެޓަލަންޓާ ވެސް ވަނީ ރޭ 1-0 އިން ފިއޮރެންޓީނާ ބަލިކޮށް، އަށް މެޗުން 20 ޕޮއިންޓް ހޯދައިފަ އެވެ.
ޔުވެންޓަސް ދަނޑުގައި ރޭ ކުޅުނު މެޗުގެ 24 ވަނަ މިނިޓްގައި އެ ޓީމަށް ލީޑުނަގައިދިނީ ފިލިޕް ކޮސްޓިޗް އެވެ. ހާފުގެ މެދެއްހާ ހިސާބުން ބޯޅަ ހިފައިގެން އައި ޑޫސާން ވްލަހޯވިޗް ހުސްކޮށްލާފައި އޭރިއާތެރެއިން ކޮސްޓިޗް އަށް ދިން ބޯޅަ އޭނާ ވަނީ ހަމަޖެހިލާފައި ގޯލުގެ ދުރު ކަނަށް ފޮނުވާލައިފަ އެވެ. މިއީ އޭނާ ޔުވެންޓަސް އަސް ކާމިޔާބު ކޮށްދިން ފުރަތަމަ ގޯލެވެ.
މެޗުގެ 59 ވަނަ މިނިޓްގައި ޔުވެންޓަސްގެ ދެ ވަނަ ގޯލު ޖެހީ ވްލަހޯވިޗް އެވެ. އޭނާ މި ގޯލު ޖެހީ ވެސްޓަން މެކްކެނީ ނެގި ހުރަހަކުން ބޮލުންނެެވެ. އޭގެ ތިން މިނިޓް ފަހުން، ޔުވެންޓަސްގެ ތިން ވަަނަ ގޯލު ޖެހީ ޕޮލެންޑްގެ ފޯވާޑް އާކަންޑިއުސް މިލިކް އެވެ. މިއީ ހުއާން ކުއަޑްރާޑޯ ބޮލުން ޖައްސާލި ބޯޅައެއް އޭރިއާތެރެއިން ހޯދައި، ގޯލުގެ މަތީ ދާގަނޑަށް އަމާޒުކޮށްލައިގެން މިލިކް ކާމިޔާބުކުރި ގޯލެކެވެ.
ޔުވެންޓަސް އަށް ދެން އޮތީ ޗެމްޕިއަންސް ލީގުގައި މެކަބީ ހައިފާއާ ދެކޮޅަށް ބުދަ ދުވަހު ކުޅޭ މެޗަށް ފަހު، ލީގުގައި އަންނަ ހޮނިހިރު ދުވަހުގެރޭ އެންމެ ފަހުގެ ޗެމްޕިއަން އޭސީ މިލާނާ ބައްދަލުކުރާ މެޗެވެ.
