ޑުބާއީގައި ސޯޝަލް މީޑިއާ މެދުވެރިކޮށް ތުއްތު ކުއްޖަކު ވިއްކާލަން މަސައްކަތް ކުރި މައްސަލައެއްގައި ތިން މީހަކު ޖަލަށް ލުމަށް ހުކުމްކޮށްފި އެވެ.
އެންމެ ދެ މަހުގެ އެ ކުއްޖާގެ މަންމައަކީ 35 އަހަރުގެ އިންޑޮނީޝިއާ އަންހެނެކެވެ. އޭނާ ދަރިފުޅު ވިއްކާލަން ނިންމީ 3،200 ޑޮލަަރު (12،000 ޔޫއޭއީ ދިރްހަމް) އަށެވެ.
އޭނާއަށް އެހީވި ދެ މީހުން ވެސް ހައްޔަރު ކުރި އެވެ. އޭގެ ތެރެއިން އެކަކީ ސްރީ ލަންކާގެ އަންހެނެކެވެ. ފުލުހުން އެ މައްސަލައިގެ ތަހުގީގު ފެށީ ކުއްޖަކު ވިއްކާލަން ސޯޝަލް މީޑިއާގައި ޕޯސްޓު ކުރުމުން މިދިޔަ ފެބްރުއަރީ މަހު އެވެ.
ފުލުހުން ބުނީ ތުއްތު ފިރިހެން ކުއްޖާއަކީ ކައިވެނީގެ ބޭރުން ލިބުނު ކުއްޖެއް ކަމަށާއި ފައިސާގެ ދަތިކަން ދިމާވުމުން ކުއްޖާ ވިއްކާލަން އަންހެން މީހާ ނިންމީ ކަމަށެވެ.
މިދިޔަ ހަފުތާގައި މައްސަލައިގެ ޝަރީއަތްކޮށް، ތިން މީހުންގެ މައްޗަށް ވެސް ހިޔުމަން ޓްރެފިކިންގެ ކުށް ސާބިތުވި އެވެ. އެ މީހުން 4000 ދިރްހަމުން ޖޫރިމަނާކޮށް، ތިން އަހަރަށް ޖަލަށް ލާން ނިންމި އެވެ.
އޭގެ އިތުރުން ގާނޫނާ ހިލާފަށް ވިސާ ނެތި ޔޫއޭއީގައި އުޅެމުންދާތީ ތިން މީހުން އިތުރު އެއް މަހަަށް ޖަލަށް ހުކުމްކޮށް، 1000 ދިރްހަމުން ޖޫރިމަނާކުރި އެވެ.
ކޯޓުން ތުއްތު ކުއްޖާ ބެލެހެއްޓުން ހަވާލު ކުރީ ކުޑަކުދިންގެ މަރުކަޒަކަށެވެ.
